Maatoossa Mishiraachchuwaa 25

Wodiyaa Wurssetsaan Hanana Pirddaa

31 «Taani, Asaa Na’ay, kiitanchchatuwaa ubbatuwanna bonchchuwaan yiyaa wode, ta bonchcho kawutetsaa oydiyaan uttana.✝25:31 Mat. 16:27; 19:28 32 Sa’aan de’iyaa Asay ubbay ta sintsa shiik’anawantta; heemmiyaawe dorssatuwaa deeshshatuwaappe shaakkiyaawaadan, taani he asaa laa"u kessaade shaakkana. 33 K’ay dorssatuwaa taappe ushechcha baggana essaade, deeshshatuwaa taappe haddirssa baggana essana.

34 «Hewaappe guyyiyaan, taani kaatii taappe ushechcha baggana de’iyaawantta hawaadan yaagana; ‹Ta Aabbu anjjeeddawantto, haa yiide sa’ay med’ettoodeppe hachche gakkanaw, hinttenttoo giigeedda kawutetsaa laattite. 35 Ayaw gooppe, taani koshattina mizeeddita; saamettina ushsheeddita; imatsaa gidaade biinakka mokkeeddita. 36 Taani kallottina mayzzeeddita; harggina be’eeddita; k’ashettina taakko gakkiide oochcheeddita› yaagana.

37 «Hewaappe guyyiyaan, s’illatuu zaariide, Aa hawaadan yaagana; ‹Godaw, neeni koshattina, awude be’iide mizeeddoo? Woy neeni saamettina, awude be’iide ushsheeddoo? 38 Neeni imatsaa gidaade yiina awude be’iide mokkeeddoo? Woy neeni kallottina awude mayzzeeddo? 39 K’ay neeni harggina, woy k’ashettina neekko biide awude neena be’eeddoo?› yaaganawantta. 40 Taani kaatii zaaraade, ‹Taani hinttenttoo tumuwaa oday; hinttenttu ha ta ishatuwaa ubbaappe haray atto, laafiyaa ittoo ootseeddawaa gidinttokka, hewaa taw ootseeddita› yaagana.

41 «He wode, taappe haddirssa baggana de’iyaawantta taani yaagana; ‹Ha shek’etteeddawanttoo, ta matappe kichchite; biide s’alahiyaa kaappoonne Aa kiitanchchatoo giigeedda med’inaa tamaan gelite. 42 Ayaw gooppe, taani koshattina, taana mizibeykkita; saamettina ushshibeykkita. 43 Taani imatsaa gidaade biina, taana mokkibeykkita; kallottina mayzzibeykkita; k’ay harggina, k’ashettinakka taana be’ibeykkita› yaagana.

44 «He wode unttunttu k’ay hawaadan yaagiide zaaranawantta; ‹Godaw, neeni koshattina woy saamettina, woy imatsaa gidaade biina woy kallottina, woy harggina woy k’ashettina, awude be’iide, neena maaddennaan is’s’eeddoo?› yaaganawantta.

45 «He wode taani kaatii zaaraade unttuntta, ‹Taani hinttenttoo tumuwaa oday; hinttenttu ha ubbaappe laafiyaa ittuwaa maaddennaan is’s’eeddawe, taana maaddennaan is’s’eeddawaa› yaagana. 46 Hewanttu med’inaa muraw baana; shin s’illatuu med’inaa de’oo baana» yaageedda.✝25:46 Dan. 12:2