Mateus 26

Yesuusa Bolla Mak’k’etteeddino

1 Yesuusi ha timirttiyaa ubbaa wurisseedda wode, barena kaalliyaawantta, 2 «Laa"u gallassaappe guyyiyaan, Paasigaa Baalaa bonchchiyaa gallassaa gidiyaawaa eriita. He gallassi Taana, Asaa Na’aa, Asay mask’k’aliyaa bolla misimaariyan d’ishiide kak’k’anaw aatsiide immana» yaageedda.✝26:2 Kes. 12:1-27

3 He wode k’eesatuwaa kaappatuunne gadiyaa c’imatuu K’ayaafaa geetettiyaa k’eesatuwaa ubbatuwaa kaappuwaa wogga golliyaan shiik’iide, 4 asay erennaan Yesuusa oyk’k’iide, wod’anaw mak’k’eteeddino. 5 Shin unttunttu, «Asay walassaa kessenna mala, Paasigaa bonchchiyaa gallassi hewaa ootsokko» yaageeddino.

Itti Mac’c’a Mishiratta Yesuusa Shittuwaa C’ac’c’afaaddu

6 Yesuusi Biitaaniyaa katamaan oolluwaa harggiyaa Simoona soyin de’ishshin, 7 itti mishiratta albbass’s’iroosa geetettiyaa shuchchaappe oosetteedda albbass’s’iroosa baareeta kumeedda darii al"o shittuwaa akkaade yeeddawunna k’umaa I miina, he shittuwaa Yesuusa huup’iyaan c’ac’c’afaaddu. 8 Shin Yesuusa kaalliyaawanttu hewaa be’iide, «Ha shittuwaa c’oo bayizzussay ayaasee? 9 Ayaw gooppe, ha shittuwaa al"o gatiyaan zal"iide, miishshaa hiyyeesaw immanaw danddayettee» yaageeddino.

10 Yesuusi unttunttu giyaawaa eriide, unttuntta hawaadan yaageedda; «Ha mishiratto ayaw waayissiitee? Iza taw lo"obaa ootsaaddu. 11 Hiyyeesatuu ubbaa wode hinttenanna de’iino; shin taani hinttenanna ubbaa wode de’ikke;✝26:11 Zar. 15:11 12 Iza ha shittuwaa ta bolla tigiyaawe taana mooganaw giigissanaassa. 13 Taani hinttenttoo tumuwaa oday; sa’aa ubbaan ha wonggalaa mishiraachchuwaa odiyaasan hak’aninne, Asay izo wozanaa aatsana mala, iza ootseeddawe odettanawaa» yaageedda.

Yihuday Yesuusa Aatsiide Immanaw Yewuwaan Giigeedda

14 He wode tammanne laa"u Yesuusa kaalliyaawanttuppe ittuu Yihudaa Ask’k’orootu yaagettiyaawe k’eesatuwaa kaappatuwaakko 15 biide, «Taani hinttenttoo Yesuusa oytsooppe, taw ayaa immanitee?» yaagina unttunttu aw hattamu biraa k’oppiide immeeddino.✝26:15 Zak. 11:12 16 Hewaappe guyyiyaan, Yihuday Yesuusa aatsi immanaw injjetiyaa wodiyaa wochchee.

Yesuusi Ayihudatuu Paasigaa Kawuwaa Barena Kaalliyaawanttunna Meedda

17 Baalaa daabbuwaa miyaa gallassaa bonchchiyaa koyro gallassi, Yesuusa kaalliyaawanttu aakko yiide, «Paasigaa bonchchiyaa gallassi neeni maana k’umaa hak’an giigissanee?» yaageeddino.

18 Hewaappe guyye Yesuusi unttuntta, «Katamaa biide, itti bitaniyaa, ‹Tamaarissiyaawe neena, «Taw wodii gakkeedda; taani taana kaalliyaawanttunna Paasigaa bonchchiyaa gallassaa ne soyin aatsana» geedda› giite» yaageedda.

19 Aa kaalliyaawanttu Yesuusi barentta azazowaadan ootsiide, Paasigaa bonchchiyaa gallassi maana k’umaa giigisseeddino.

20 Sa’ay omarsseedda wode, Yesuusi tammanne laa"u Aa kaalliyaawanttunna k’umaa maanaw utteedda. 21 Unttunttu miishshin, Yesuusi unttuntta, «Taani hinttenttoo tumuwaa oday; hintteppe itti uray taana aatsiide immanawaa» yaageedda.

22 Unttunttu darii dagammiide, huup’iyaan huup’iyaan, «Godaw, tumu taaneeshsha?» guussaa doommeeddino.

23 Yesuusi zaariide, «Bare kushiyaa taananna ittippe woc’iitiyaappe yeddiide tushiyaawe taana aatsi immana.✝26:23 Maz. 41:9 24 Taani, Asaa Na’ay, S’oossaa Mas’aafay hayk’k’ana geeddawaadan hayk’k’ana; shin Taana, Asaa Na’aa, aatsi immiyaa uraw aayyero; he uray yelettennaan atteeddentto aw lo"a shshin» yaageedda.

25 Aa aatsi immiyaa Yihuday zaariide, «Tamaarissiyaawoo, neeni giyaawe taanee?» yaageedda.

Yesuusi zaariide Aa, «Neeni ne huup’iyaan gaadda» yaageedda.

Godaa Kawuwaa Akkiyaa Wogaa

26 Unttunttu miishshin, Yesuusi daabbuwaa akkiide, S’oossaa galateedda; he daabbuwaa mentsereetsiide, barena kaalliyaawanttoo immiidde, «Heytte; miite; hawe ta ashuwaa» yaageedda.

27 S’uu’aa akkiide, S’oossaa galateedda. Unttunttoo immiidde, «Ubbay hawaappe ushite; 28 ayaw gooppe, hawe daro asaa nagaray atto geetettana diraw gukkiyaa ta suutsaa; ta suutsay ooratsa c’aak’uwaa.✝26:28 Kes. 24:8; Erm. 31:31-34