1,2 He wode S’ammak’iyaa Yohaannisi asaa, «Saluwaa kawutetsay matatteedda diraw, hintte nagaraappe simmite» yaagiidde, Yihudaa mela biittaan odiidde yeedda.✝ 3 Ayaw gooppe, nabiyaa Isiyaase, Yohaannisabaa odiidde,

«Ittuu mela biittaan bare k’aalaa d’ok’k’u ootsiide,

‹Godaa ogiyaa giigissite.

I hemettana loossuwaakka

aw sitti ootsite› geedda»

yaageedda.✝

4 Yohaannisaw gaaluwaa isikiyaa dadetteedda mayuu de’ee; k’ay bare s’eessan dafuwaa danc’c’eedda; I miyaa k’umaykka booliyaanne bazzuwaa eessaa.✝ 5 Asay he wode Yerusaalameppe, Yihudaa gadiyaa ubbaa saappenne Yorddaanoosa Shaafaa heeraan de’iyaa gadiyaa ubbaappe aakko yiino. 6 Barenttu nagaraa paas’ina, Yorddaanoosa Shaafaan asaa s’ammak’eedda.

7 Shin Yohaannisi daro Parisaawatuunne* Saduk’aawanatuu* s’ammak’ettanaw barekko yiyaawantta be’iide, «Ha shooshshatoo, S’oossaa hank’k’uu yaana haniyaawaappe attana mala, hinttew oonee odeeddawe? 8 Simmi hintte, hinttenttu nagaraappe simmeeddawaa erissiyaa oosuwaa, ootsite. 9 Hintte hinttenttu wozanaan, ‹Abraahaame nu aabba› giide k’oppiyaawaa hinttew malatoppo. Ayaw gooppe, taani hinttenttoo oday; S’oossay ha shuchchatuwaappe Abraahaamoo naanaa ootsi dentsanaw danddayee. 10 Bees’i mitsaa s’ap’uwaan k’ans’s’anaw giigi utteedda; lo"o ayfiyaa ayfena mitsaa ubbay k’ans’s’ettiide, tamaan yegettana.

11 «Hintte hinttenttu nagaraappe simmiyaawaa bessanaw, taani hinttena haatsaan s’ammak’ay; shin taappe guyyenna yiyaawe, hinttentta Geeshsha Ayyaanaaninne tamaan s’ammak’ana.* I taappe daro minnee; Aa c’aammaa tookkanawukka taani bessiyaa asaa gidikke. 12 Aa kushiyan katsaa ses’s’iyaa layday de’ee. Uddumaan de’iyaa katsaa loytsi geeshshee; bare zarggaa diyiyaan k’olana; shin dalaa to’enna tamaan guuddana» yaageedda.

13 Yesuusi he wode Yohaannisan s’ammak’ettanaw, Galiilaappe Yorddaanoosa geetettiyaa shaafaa aakko beedda. 14 Shin Yohaannisi, «Taani neenan s’ammak’ettanaw bessiyaa wode, neeni taakko yay?» yaagiide, Aa digganaw koyyeedda.

15 Shin Yesuusi zaariide Aa, «Nuuni s’illotetsaa oosuwaa ubbaa hawaadan polanaw bessiyaa diraw, ha"i taw eeno ga» yaageedda. Yohaannisikka aw eeno geedda.

16 Yesuusi s’ammak’ettowaappe guyyiyaan, ellekka haatsaappe keseedda; saluu dooyettina, S’oossaa Ayyaanay harap’p’iyaadan saluwaappe wod’d’iide bare bolla yiyaa wode be’eedda; 17 k’ay saluwaappe, «Taani siik’iyaa, taana nashechchiyaa, ta Na’ay hawaa» yaagiyaa k’aalay yeedda.✝