1 Muse Toop’p’iyaa biittaa mishirato akkeedda. I akkeedda Toop’p’iyaa mac’c’aani diraw, Miiriyaamanne Aarooni Musa boreeddino. 2 Unttunttu, «Med’inaa Goday Muse bagga s’alalana haasayeeddeyye? K’ay I nu baggana haasayibeenneeyye?» yaageeddino. Med’inaa Goday hewaa siseedda. 3 Muse gadiyaan sa’aan ubbaan de’iyaa asaa ubbaappe aad’d’iyaa ashkke asaa.

4 Med’inaa Goday ellekka Musew, Aaroonawunne Miiriyaamiw, «Hintte heezzuukka Gaketiyaa Dunkkaaniyaakko kesite» yaageedda; unttunttu heezzuukka keseeddino. 5 S’oossay shaariyaa tuussaan duge wod’d’eedda; Dunkkaaniyaa penggiyaan ek’k’iide, Aaroonanne Miiriyaamo s’eeseedda. Unttunttu laa"uukka Aa sintsa shiik’ina, 6 I unttuntta, «Ta odiyaawaa sisite: Hintte gidduwaan timbbitiyaa odiyaawe de’ooppe, taani Med’inaa Goday taana aw sas’aan k’onc’c’issay; taani aw akumuwaan oday. 7 Shin ta k’oomaa Musena hewaadan gidenna; I ta golliyaa ubbaan ammanetteedawaa.✝ 8 Taani Musena sintsa sintsaan haasayayippe attina, leemisuwaan haasayikke. I Med’inaa Godaa malaa be’ee. Yaatina ta k’oomaa Musa boranaw hintte ayaw yayyibeykkitee?» yaageedda.

9 Med’inaa Godaa hank’k’uu unttunttu bolla ees’s’i keseedda; Med’inaa Goday beedda. 10 Shaarii Dunkkaaniyaa bollaappe denddeedda wode, Miiriyaama wolk’k’aama galbbaa harggiyaan mils’s’i gaade boos’s’aaddu. Aarooni iikko simmiide s’eelliyaa wode, wolk’k’aama galbbaa harggiyaan oyk’k’etteeddaano be’eedda. 11 Yaatina I Musa, «Hay ta godaw, nuuni eeyyatetsan ootseedda nagaraw nuuna muroppa. 12 Bare daay uluwaappe kesiyaa wode, Aa ashuwaappe baggay meetetti kichchina, hayk’k’i kichchiide yeletteedda gac’ino na’aa mala gidoppaarekkee» yaageedda.

13 Muse, «Hay S’oossaw, izo patsaarikkii!» yaagiide Med’inaa Godaw waasseedda.

14 Med’inaa Goday Musa, «I aawuu I som"iyaan c’uchchaa c’uchcheeddawaa gidinttonne, laappun gallassaa iza yeellaa mayyaade uttana gidekkeeyye? Hewaa diraw, neeni izo laappun gallassaa dunkkaaneedda sa’aappe gas’aa baggana dumma sa’aan utissa; hewaappe guyyiyaan, simmaade yu» yaageedda.✝ 15 Yaatina Miiriyaama Asay dunkkaaneedda sa’aappe gas’aa kesaade laappun gallassaa uttaaddu. Aa simmana gakkanaw Asay baanaw denddibeenna. 16 Hewaappe guyyiyaan, Asay Has’eroota giyaa saappe denddiide, Paaraana mela biittaa dunkkaaneedda.