Provérbios 25

Solomon S’aafeedda Hara Leemisatwaa

1 Hawanttukka k’ay, Yihudaa Kaatiyaa Hizk’k’iyaasa asatuu duuk’k’iide s’aafeedda Solomona leemisatwaa.

2 S’uuraa gentsiyaawe S’oossaw bonchcho; s’uuraa pilggiide kessiyaawe k’ay kaatetoo bonchcho.

3 Salotuwaa d’ok’k’atetsaanne sa’aa c’iimmatetsaa Asay gakkennawaadan, kaatetuwaa k’ofaakka Asay eranaw danddayenna.

4 Biraappe k’itaa digga; hewaappe guyyiyaan, wogaac’ii k’os’s’iide, lo"obaa kessana.

5 Kaatiyaa sintsappe iitatuwaa digga; yaatooppe, Aa kawutetsaa araatay s’illotetsan min ek’k’ana.

6 Kaatiyaa sintsa aad’d’iyaa wode c’eek’ettoppa; wolk’k’aama asatuwaappe gidduwaan sa’aa koyoppa.✝25:6-7 Luk'. 14:8-10 7 Neeppe gitatiyaa asaw sa’aa immanaw kaappuu neena dentsina kawushiyaawaappe, kaappuu neena, «Hawaakko d’ok’k’u ga» giyaawe new keeka.

8 Ne ayifiyaan be’eeddawaa markkattanaw dabaabaa baanaw elleelloppa; ayaw gooppe, neeni markkatta simmina, hara Asay ne markkatetsay balaa gidiyaawaa k’onc’c’issooppe, neeni yeellatana. 9 Neeppenne ne shooruwaappe gidduwaan palumii med’ettooppe, aanana haasayaade ne palumiyaa wurssa. Hara asaa s’uuraa k’onc’c’issoppa. 10 Hewe d’ayooppe, neeni odiyaawaa siseedda Asay neena kawushshana; hewan ne suntsay laa"entso simmennaadan bayana.

11 Koshshiyaa wodiyaan haasayetteedda likke k’aalay biraa bolla tigeedda work’k’aa alleek’k’uwaa mala.

12 Hayzziyaa uraa eranchcha Asay zoriyaa zorii haytsaan wotseedda work’k’aa woy geeshsha work’k’aappe ootseedda alleek’k’uwaa mala.

13 Katsaa c’akkiyaa boniyaan irs’s’a haatsay ushina aliyaawaadan, kiittina ammanettiyaa Asay barena kiittiyaawantta nashechchee.

14 Immennabaa «Immana» yaagiidde c’eek’ettiyaa Asay iray bayinna shaariyaanne c’arkkuwaa mala.

15 Danddayanchcha Asay deriyaa mooddiyaawoo odiide amantsee; liik’o k’aalay mek’etsaa aad’d’iidde gelee.

16 Eessaa demmooppe, kallana gakkanaw ma; shin darissooppe, neeni c’ooshana. 17 Neena uufiide is’s’ennaadan, ne shooruwaa golle ubbaa gede booppa.

18 Bare shooruwaa bolla wordduwaan markkattiyaa Asay gatimay, mashshaynne k’ara aday asaa k’ohiyaawaa keeshshaa k’ohee.

19 Metuwaa wode ammanettena uran zemppiyaawe k’aas’s’iyaa matan c’oommiyaawaanne sileedda gediyaan hamettiyaawaa mala.

20 Kayyotti utteedda asaw yetsaa yes’s’iyaawe meeguwaa gallassi mayuwaa k’aariyaawaanne madutsaa bolla c’aalabaa tigiyaawaa mala.

21 Ne morkkii koshattooppe, miza; saamettooppe, ushsha.✝25:21-22 Rom. 12:20 22 Ayaw gooppe, neeni hewaa ootsiyaawe Aa huup’iyaan tamaa bonk’k’uwaa kaashiide k’oliyaawaa mala. Med’inaa Godaykka new woytana.

23 Dolahaa bagga c’arkkuu iraa ahiyaawaadan, zigirssay hank’k’uwaa ayee.

24 Walak’ettiyaa machchattinna itti golliyaan de’anaappe golliyaa kashaan de’iyaawe keeka.

25 Daabureedda uray irs’s’a haatsaa ushiide aliyaawaadan, haakko biittaappe yiyaa lo"o oduu nashechchee.

26 Iita asaa sintsaan kunddiyaa s’illo Asay bulluk’k’eteedda pulttuwaanne bayeedda ollaa haatsaa mala.

27 Daro eessaa miyaawe lo"a gidenna; hewaadankka, bare bonchchuwaa koyiyaawe bonchchissenna.

28 Bare huup’iyaa naagenna Asay dirssay me"eedda katamaa mala.