1 Iitatuu ooninne yederssennan bak’atiino; shin s’illotuu gaammuwaa mala s’ala.

2 Itti kawutetsay makkalanchcha gidooppe, Aa mooddiyaawanttu laametti laametti mooddino. Shin kaaletsiyaawanttu aad’d’eeda eranchchaanne akeekanchcha gidiyaa wode, mino gidiide, daro wodiyaa takkee.

3 Hiyyeesatuwaa uk’k’unniyaa daannay katsaa d’ayissiyaa wolk’k’aama iraa mala.

4 Higgiyaa bonchchenna uray bayzzanchchaa sabbee; shin higgiyaa bonchchiyaawe bayzzanchchatuwaa k’ofaa p’alk’k’ee.

5 Iita asatoo suure pirddaabay gelenna; shin Med’inaa Godaw goyinniyaawanttoo ubbabaykka gelee.

6 Geella asaa gidiide, dure gidiyaawaappe suure asaa gidiide, hiyyeesaa gidiyaawe keeka.

7 Higgiyaa naagiyaa wodallay akeekanchcha. Shin patsenna shufurotuwaanna zuppetiyaawe bare aawuwaa yeellayee.

8 Miishshaa dichchaw immiyaawaaninne yeluwaan durettiyaa Asay he mas’uwaa hiyyeesatoo keekkiyaa asaw shiishshee.

9 Higgiyaa sisanaappe giide, bare haytsaa wora zaariyaa uraa woosay S’oossaa sheneyiyaawaa.

10 Suuretuwaa iita ogiyaa kaaletsiyaa uray bare bookkeedda ollaan barew kunddana; shin geeshsha Asay lo"obaa laattana.

11 Dure Asay barena aad’d’eeda eranchcha giide k’oppee; shin akeekay de’iyaa hiyyeesay Aa paac’c’ee.

12 S’illotuu s’ooneedda wode, Asay ubbay nashettee; shin iitatuu maataa oyk’k’eedda wode, Asay k’osettee.

13 Bare nagaraa gentsiyaa uray aac’enna; shin paas’iyaawenne nagaraa aggiyaawe maarettanawaa.

14 Med’inaa Godaw ubbaa gede yayyiyaa Asay anjjetteedawaa; shin bare wozanaa guzuntsiyaa Asay metuwaan gelana.

15 Hiyyeesaa asaa mooddiyaa iita daannay gudiyaa gaammuwaanne koshateedda babark’k’iyaa mala.

16 Wozani pac’c’eedda daannay bare asaa naak’k’ee; shin asaa naak’k’iyaawaa is’s’iyaawe daro laytsaa mooddana.

17 Asaa wod’eedda Asay hayk’k’ana gakkanaw bak’atiidde de’ee; Aa ooninne shiishshi akkena.

18 Borii bayinnan hamettiyaa uray k’ohettennan attanawaa; shin geella Asay itti kutsan kunddana.

19 Bare gadiyaa ootsiyaa uray katsaa kallee. Shin shufurotuwaa kaalliyaa uray ubbaa gede hiyyeesiide de’ee.

20 Ammanetteeda uray daro anjjettana; shin durettanaw jaamiyaawe murettenan attena.

21 Shaakkiide maaddiyaawe lo"enna; shin Asay guutsa ukitsaa diraw giidekka, balabaa ootsiino.

22 Uuzetiyaa uray durettanaw jaamee; barena hiyyeesatetsay oyk’k’anawaakka erenna.

23 Asaa c’oo sabbiyaa uraappe seeriyaa uray guyyeppe galatettee.

24 Bare aawuwaappenne bare aattippe wuu"iide, «Taani ayinne nagaraa ootsabeykke» yaagiyaa uraynne bayzziyaa uray itti mala.

25 Uuzetiyaa uray walassaa dentsee; shin Med’inaa Godaan ammanettiyaawe kallee.

26 Barenan ammanettiyaa Asay booza; shin aad’d’eeda eratetsan hamettiyaawe saro de’ee.

27 Hiyyeesaw immiyaa uraw pac’c’enna; shin unttuntta be’anaappe giide c’iilimmiyaawe shek’aa akkana.

28 Iita asatuu suntsettiyaa wode, Asay k’osettee; shin unttunttu d’ayiyaa wode, s’illotuu c’orattiino.