1 Ta na’aw, taani neena tamaarissiyaawaa dogoppa; ta azazotuwaakka ne wozanaan wotsa. 2 Ayaw gooppe, unttunttu ne laytsaa adussana; ishalo de’uwaanne sarotetsaa new gujjana. 3 Aggena siik’uunne tumatetsay neeppe haakkoppino; unttuntta ne k’ood’iyaan k’achcha; ne wozanaankka unttuntta s’aafa. 4 Yaatooppe, neeni S’oossaanne asaa sintsan sabettananne nashettana.✝3:4 Luk'. 2:52

5 Ne polo wozanaan Med’inaa Godaa ammanetta; ne akeekan zemppoppa. 6 Neeni ootsiyaa oosuwaa ubbaan Aa sintsaya; I neena suure ogiyaa kaaletsana. 7 Neena ne huup’iyaan aad’d’eeda eranchcha kessoppa; Med’inaa Godaw yayya; iitaappekka haakka.✝3:7 Rom. 12:16 8 Hewe ne bollaa pas’a wotsana; ne mek’etsaakka minisana. 9 Med’inaa Godaa ne duretetsan bonchcha; koyiro ayifeedda katsaa ubbaappekka s’eeraa aw immiyaawan Aa bonchcha. 10 Yaatooppe, ne yeesetuwaan katsay kumana; ne baatsaakka ayife woyniyaa eessay kumiide palahana.

11 Ta na’aw, Med’inaa Godaa seeraa kad’oppa; I neena seeriyaa wodekka lanc’c’oppa.✝3:11 Yob. 5:11✝3:11-12 Ibr. 12:5-6 12 Ayaw gooppe, aawuu bare siik’iyaa na’aa seeriyaawaadan, Med’inaa Goday bare dosiyaa uraa seeree.✝3:12 Sas'. 3:19 13 Aad’d’eeda eratetsaa demmiyaa uray, akeekaakka barewaa ootsiyaa uray anjjetteedawaa. 14 Ayaw gooppe, aappe demmiyaa go"ay work’k’aappenne biraappe demmiyaa go"aappe aad’d’eenne keekee. 15 Aad’d’eeda eratetsay ink’k’uwaappe loytsi al"ee; neeni demmanaw amottiyaa ubbay aad’d’eeda eratetsaanna likkettenna. 16 Aad’d’eeda eratetsay ne laytsaa adussee; I new duretetsaanne bonchchuwaa gujjee. 17 Aa ogetuu nashechchiyaa ogetuwaa; Aa loossuwaa ubbaykka saruwaa. 18 I barena oyk’k’iyaawanttoo de’uwaa mitsaa; Aa minisi oyk’k’iyaa ubbatuukka anjjetteedawantta.

19 Med’inaa Goday bare aad’d’eeda eratetsan sa’aa med’d’eedda; bare akeekankka salotuwaa miniseedda. 20 Aa eratetsan shaafatuu goggiino; shaaratuuwaappekka iray bukkee.

21 Ta na’aw, lo"o aad’d’eeda eratetsaanne adussi k’oppiyaawaa naaga; unttunttu neeppe shaakkettoppino. 22 Unttunttu new de’uwaa gidana; unttunttu new ishaluwaanne nashshechchaa de’uwaa immana. 23 He wode neeni ne ogiyaan hirggi bayinnan hamettana; ne gediikka d’ubettenna. 24 Neeni giseedda wode, yayakka; gisaadekka mal"o gem"ishshuwaa gem"ishana. 25 Akeekenan gakkiyaa bashshaw, woy iitatuu d’ayiyaa d’ayoo yayakka. 26 Ayaw gooppe, Med’inaa Goday new ammanettiyaawaa gidana; ne gediikka p’iriyaan oyk’ettennaadan, I neena naagana.

27 New wolk’k’ay de’ishiina, metooteeddawoo lo"obaa ootsiyaawaa aggoppa. 28 Ha"i new de’ishiina, ne shooroo, «Simmaade ya; taani new wontti immana» yaagoppa. 29 Neenan ammanettiide, ne matan de’ishiina, ne shooruwaa bolla iitabaa ootsanaw k’oppoppa. 30 Neena naak’k’ibeenna asaa, c’oo moottoppa. 31 Sugetsaa ootsiyaa asatuwaa k’ulloppa; unttunttu iita oosuwaakka kaalloppa. 32 Ayaw gooppe, Med’inaa Goday iitaa ootsiyaawantta is’s’ee; shin suuretuwaa I uloppe siik’ee. 33 Med’inaa Godaa shek’ay iitaa ootsiyaawanttu soyina; shin Aa anjjuu suurebaa haniyaawanttu soyina. 34 Otorettiide k’iliic’iyaawantta S’oossaykka k’iliic’ee; shin barentta kawushshiyaawantta nashshee.✝3:34 Yak'. 4:6; 1 P’es'. 5:5 35 Aad’d’eeda eranchchatuu bonchchuwaa demmana; shin boozatuu kawushshana.