1 Yaatina, nuuni waaganee? S’oossaa aad’d’o keekatetsay daranaadan, nagaraan minniide de’anee? 2 Gidenna; nuuni nagaraa ootsenna mala hayk’k’idiggeeddo. Yaatina, nuuni hawaappe sintsaw wooti Aa giddon de’anee? 3 Woy nuuni ubbatuu Kiristtoosa Yesuusanna ittippe gidanaw, s’ammak’etteedda wode, Aa hayk’uwaankka aanana ittippe gidanaw s’ammak’etteeddawaa erikkitee? 4 Hewaa diraw, Kiristtoosi bare Aawuwaa bonchcho wolk’k’aan hayk’uwaappe denddowaadan, nuunikka ooratsa de’uwaa de’anaw, Aa hayk’uwaa aanana shaakkanaw s’ink’k’ataani aanana ittippe moogetteeddo.

5 Ayaw gooppe, nuuni I hayk’k’eeddawaadan hayk’k’iide, aanana ittuwaa gidooppe, hawaadankka, hayk’uwaappe I denddowaadan nuunikka denddiide, aanana ittuwaa gidana. 6 Nuuni hawaappe sintsaw nagaraw ayile gidenna mala, k’ay nu nagaranchcha asatetsaa wolk’k’ay d’ayana mala, nu ec’a asatetsaa Kiristtoosanna mask’k’aliyaa bolla misimaariyan d’ishetti kak’etteeddawaa ereetto. 7 Ayaw gooppe, itti uray hayk’k’iyaa wode nagaraa wolk’k’ay Aa mooddenna; shin 8 nuuni Kiristtoosanna hayk’k’eeddawaa gidooppe, aanana k’ay de’anawaa ammaneetto. 9 Ayaw gooppe, Kiristtoosi hayk’uwaappe denddeeddawaa, k’ay laa’entsuwaa I hayk’k’ennawaanne hayk’uu sintsappe Aa mooddennawaa nuuni ereetto. 10 I itti kaallakka hayk’k’eedda; nagaraw Aa bolla wolk’k’ay baawa; shin I ha de’iyaa de’uwaa S’oossaw de’ee. 11 Hawaadan k’ay hintte nagaraa ootsennaadan, hinttentta hayk’k’eeddawaadan k’oppite; shin Godaa Kiristtoosa Yesuusa baggana S’oossaw hintte pas’a de’iyaawaadan, hinttentta k’oppite.

12 Hewaa diraw, hintte hinttenttu asatetsaa amoo azazettana mala, nagaray hayk’k’iyaa hintte asatetsaa mooddoppo. 13 K’ay hintte asatetsaappe itti saanne iita oosuwaa ootsanaw nagaraw immoppite; shin hayk’uwaappe denddeedda asaadan hinttentta S’oossaw immite; k’ay hintte kumentsaa asatetsaakka s’illo oosuwaa ootsanaw S’oossaw immite; 14 ayaw gooppe, nagaray hinttentta mooddanaw danddayenna; hintte S’oossaa aad’d’o keekatetsaa garssanna de’iitappe attin, higgiyaappe garssanna de’ikkita.

15 Yaatina, waananee? S’oossaa aad’d’o keekatetsaa garssanna de’iinoppe attin, higgiyaappe garssanna de’enna diraw, nagaraa ootsanee? Gidenna; 16 hintte hinttentta itti uraw azazettanaw, ayiliyaadan ootsiide immiyaa wode, he hinttentta azaziyaawoo ayiletuwaa gidiyaawaa eriita; woy hintte hinttenttoo hayk’uwaa ahiyaa nagaraw eeno giita; woy hintte hinttentta s’illo ootsiyaa azazoo eeno giita. 17 Shin S’oossaw galatay gido; ayaw gooppe, nagaraw kase hintte ayile; shin guyyeppe hintte akkeedda timirttiyaa giddon de’iyaa tumatetsaw hintte kumentsaa wozanaappe azazetteeddita. 18 Hinttenttu nagaraa ayiletetsaappe kesiide, s’illotetsaw ayile gideeddita.

19 Hinttenttu med’etaan daaburanchcha gidiyaa diraw, taani oossikka geliyaa haasayaa haasayay; hintte kase hintte kumentsaa asatetsaa naak’uwaa ootsanaw, tunatetsawunne naak’oo ayile ootsiide immeeddita; ha"i hewaadankka hintte kumentsaa asatetsaa geeshshabaa ootsanaw, s’illotetsaw ayile ootsiide immite.

20 Hinttenttu nagaraw ayiletiide de’iyaa wode, s’illotetsay hinttenttoo godaa gidenna. 21 Hinttentta ha"i yeellayiyaa yewatuwaa he wode ootseeddawaappe ay maaduwaa demmeedditee? Ayaw gooppe, he yewatuwaa wurssetsay hayk’uwaa. 22 Shin nagaraa ayiletetsaappe hintte kesiide, S’oossaw eeno geeddita; k’ay hintte ootsiyaa ubbabaan hinttentta ubbakka aw aatsiide immeeddita. Hewe hinttenttoo wore; hewaa wurssetsay med’inaa de’uwaa. 23 Ayaw gooppe, nagaraa gatii hayk’uwaa. Shin S’oossay nu Godaa Kiristtoosa Yesuusa baggana immiyaa imotay med’inaa de’uwaa.