1 Taani tumuwaa haasayay; taani Kiristtoosassa; k’ay worddotikke. Geeshsha Ayyaanay mooddiyaa ta tilla wozanay taani worddotennawaa taw markkattee. 2,3 Taw ashuwaan zare gidiyaa taanaadan ammaniyaawanttoo, ta wozanaan daro k’aretaynne aggena k’ofay de’ee. Ayaw gooppe, taani ta huup’ew unttunttu diraw, S’oossaa shek’aappe garssanna de’aarikkitaashsha! K’ay Kiristtoosappekka shaakettaarikkitaashsha! 4 Unttunttu Israa’eeliyaa asatuwaa; S’oossay unttuntta bare naanaa ootsiide, bare bonchchuwaa unttunttunna shaakkeedda. Unttunttunna k’aalaa geliide, higgiyaa unttunttoo immeedda. Unttunttu S’oossaw bessiyaa ogiyaan goyinniino; k’ay S’oossay immana geeddawaakka akkeeddino.✝ 5 Unttunttu zeretsaan kase aawotuwaa zare; k’ay Kiristtoosikka ashuwaan unttunttu zare. I, ubbaappe bolla gidiide mooddiyaa, med’inaw galatetteeddawe S’oossaa. Amen"i.

6 Shin taani, «S’oossay immana geeddawe attana» yaagikke. Ayaw gooppe, Israa’eeliyaa asaa ubbatuu S’oossay dooreeddawantta gidikkino. 7 K’ay Abraahaame zeretsatuu ubbatuu S’oossaa naanaa gidikkino. S’oossay Abraahaamoo, «Ne zeretsay Yisaak’a baggana s’eesettanawaa» yaageedda.✝ 8 Hewaa guussay unttunttu S’oossay immana geedda ogiyaan yeletteedda naanay zariyaadan paydettana; shin asaa k’ofaadan yeletteeddawanttu S’oossaa naanaa gidikkino guussaa. 9 Ayaw gooppe, S’oossay immana giide haasayeeddawe hawaa; «Taani ha geetetteeddawaadan he wode yaana; Saarakka attuma na’aa yelana» yaageedda.✝

10 Hewaa s’alalaakka gidenna; Irbbik’a yeleedda mantte naanaa aawuu ittuwaa; ikka nu aawuwaa Yisaak’a. 11,12 Shin itti na’aa dooreedda S’oossay bare huup’ew k’oppeeddawaa gidanaadan, S’oossay Irbbik’iw, «Bayiray teefaw azazettana» yaageedda; I hewaa unttunttu yelettanaappenne iitabaa woy lo"obaa ayinne ootsanaappe kasenna geedda. Hewaa diraw, S’oossaa dooruu Aa s’eeseeddawaadanippe attin, unttunttu ootseeddawaanna gidenna.✝ 13 S’oossaa Mas’aafay, «Yaak’ooba siik’aaddi; shin Eesaa is’s’aaddi» yaagee.

14 Yaatina, nuuni waaganee? S’oossay deshissiide pirddii? Hewaa gidenna. 15 Ayaw gooppe, Musew I,

«Taani maaranaw koyyiyaawantta maarana;

k’ay k’arettanaw koyyiyaawanttookka k’arettana»

yaageedda.✝ 16 Simmi S’oossay asaa maariyaawe I maaranaw koyyiyaa diraassappe attin, Asay koyyiyaa woy ootsiyaa diraassa gidenna.

17 Ayaw gooppe, S’oossaa Mas’aafay Gibs’e kaatiyaw, «Taani ta wolk’k’aa neenan bessanawunne ta suntsay alamiyaa ubbaan odettanaw, hewoo taani neena kawutsaad» yaagee.✝ 18 Simmi S’oossay maarana koyyiyaawaa maaree; k’ay wozanaa gorddana koyyiyaawaa wozanaa gorddee.

19 Simmi hintte taana, «Hewe tuma gidooppe, S’oossay asaa bayizzoo ayaw tooshii? S’oossay geeddawaa is’s’aaddi gaanawe oonee?» yaaganaw danddayiita.

20 Shin ta laggew, S’oossaw zaaranaw neeni oonee? Urk’k’aappe med’etteedda miishshay guyye zaariide barena med’d’eeddawaa, «Taana hawaadan ayaw med’d’aaddii?» giide oochchanaw danddayii?✝ 21 Woy urk’k’aa med’d’iyaawe bare med’d’iyaa urk’k’aa bare koyyiyaawaadan ootsanawunne itti mala urk’k’aappe ittuwaa bonchcho miishshaa ootsiide, k’ay ittuwaa tooshetteedda oosuwaa ootsiyaa miishshaa ootsiide med’d’anaw aw maati baawee?

22 S’oossay ootseeddawe hawaanna ittuwaa. I bare hank’k’uwaa bessanawunne bare wolk’k’aa erissanaw koyyeedda; I bare hank’k’uwaan pirddanawantta, bayizzanaw giigi utteeddawantta, daro genc’c’uwaan danddayeedda. 23 K’ay I maareeddawanttoo, bare bonchchuwaa akkanaw giigissi wotseeddawanttoo I ay keenaa bonchchettinttonne bessanaw koyyeedda. 24 Nuuni I s’eeseeddawantta; shin Ayihuda asaa s’alalaappe gidennaan, Ayihuda gidenna asaa giddoppekka s’eeseedda.

25 Hoose’a mas’aafan I giyaawe hawaa;

«Ta asaa gidennawantta,

‹Ta asaa› gaade s’eesana.

Taani siik’abeenna zariyaakka,

‹Ta siik’k’aatoo› gaade s’eesana.✝

26 ‹Hinttenttu ta asaa gidikkita› giyaawaa,

unttunttu siseedda he sa’aan,

unttunttu, ‹De’uwaa S’oossaa naanaa› geetettiide s’eesettanawantta»

yaagee.✝ 27 Isiyaasi Israa’eeliyaa asaabaa yaagiide haasayeedda;

«Israa’eeliyaa Asay abbaa matan

de’iyaa shafiyaa keena gidooppekka,

unttunttuppe amareedawanttu s’alalay attana.✝

28 Ayaw gooppe,

Goday sa’aa bollan de’iyaa asaa ubbaa bolla,

ellekka pirddana»

yaageedda. 29 Isiyaasi kasetiide,

«Ubbaappe Wolk’k’aama Goday,

nuw amareedda zeretsaa ashshenentto,

nuuni, Sodoomaa katamaadaaninne,

Gamoora katamaadan haneeddoshshin»

yaagi haasayeedda.✝

30 Yaatina, nuuni waaganee? S’illotetsaa koyyibeenna Ayihuda gidenna Asay ammanuwaan s’illeedda; 31 shin Israa’eeliyaa Asay barentta s’illissiyaa higgiyaa koyyeeddawanttu he higgiyaa demmibeykkino. 32,33 Ayaw demmibeykkinoo? Unttunttu oosuwaanappe attin, ammanuwaan s’illotetsaa koyyibeenna diraassa. Unttunttu S’oossaa Mas’aafay,

«Akeekite; taani S’iyoonen asaa d’ubbiyaa shuchchaa,

unttunttu ogiyaan zaallaa wotsana.

Shin aan ammaniyaa ooninne yeellatenna»

yaagiide s’aafettowaadan d’ubbiyaa shuchchaan d’ubetteeddino.✝