1 पतरस 5

पुरानो आरू नवयुवको क संदेश

1 तुमू मा जो पुरानो छे, हाव ओको समान डाहडा आरू मसीह क दुःख क गवा आरू प्रगट होयनेवावी महिमा मा सहभागी हईन तीनुक यो समझाड़ता छे। 2 ✝5:2 यहुन्ना 21:15-17कि यहोवा–भगवान क उना टुळा क, जो तुमरे वीच मा छे राखवाळी करो; आरू यो कोय क कयनो सी नी बाकुन यहोवा–भगवान की मरजी क लारे खुशी छे, आरू सिर्फ कमाय क करता नी पर मन लागाड़ कर। 3 जो मानसे तुमूक आपी गया छे, उन पर हक नी जितावु, वरना टुळान करता विजुत बने।