1 काय हामु पछु आपसी बढ़ाई करने लाग्या? या हामु दिसरा मानसे क समान सिफारिश की पत्री या तुमरे साथे लानी या तुमू छे लेनु छे? 2 हामरी पत्री तुमू ही होय, जो हामरे हृदय पर लिख्यो होय छे आरू ओको सब मानुस उवखता आरू भनता छे। 3 यो प्रगट छे कि तुमू मसीह कि चिठ्ठी होय। जिनाक हामु ने सेवक क समान लिख्या, आरू जो शाही छे नी पुन जीवता यहोवा–भगवान क आत्मा छे, दगड़ा कि पट्टी पर नी पुन हृद्य कि मास रूपी पट्टीया पर लिख्यो छे।

4 हामु मसीह क द्वारा यहोवा–भगवान पर ओसो ही विश्वास राखता छे। 5 यो नी कि हामु आपने आप छे इनीये योग्य छे कि आपने आरू छे काही वाद क विचार कर सख्या, पर हामरी योग्यता यहोवा–भगवान कि आरू छे, 6 जो हामु नवलो वाचा क सेवक हुयने क योग्य भी कर्‍या, ओवाज क सेवक नी वरना आत्मा क; काहकि ओवाज मारतो छे, पर आत्मा जीवाडे छे।

7 यदि मरला कि वो वाचा ओका अक्सर दगड़ा पर खुदीन गया हुता, याहा तक तेजोमय होय कि मूसा क मुय पर क तेज क कारण जो घटता भी जाता हुता, इस्राएल ओका मुय पर दृष्टि नी कर सकता हुता, 8 तो आत्मा कि वाचा आरू भी तेजोमय काय नी होयछे? 9 यदि सजव दोषी ठेरायनेवावा सेवकाई तेजोमय होती, तो न्यायी ठेरावने वावी सेवकाई आरू भी तेजोमय काय नी होयछे? 10 आरू जो तेजोमय हुता वो भी ओको तेज क कारण जो ओका सी बढ़िन बढ़ाई न योग्य तेजोमय हुता काही तेजोमय नी ठहराव्यो। 11 काहकि जव वो जो घटता जाता हुता तेजोमय हुता तो वो जो स्थिर रवछे आरू भी तेजोमय काय नी होयछे?

12 एरकरीन ओसी आश राखीन हामु हियाव क साथे बुलता छे, 13 आरू मूसा क समान नी, जो आपने मुय पर परदा नाख्यो होतो ताकि इस्राएल उना घटने वावा तेज क आखरी क नी देख्यो। 14 पुन वो मतिमन्द होय गया, काहकि आज तक जुनलो नियम मा भनता टेहाव ओको हृदय पर चो परदा देखता रयता छे, पर वो मसीह मा उठ जाता छे। 15 आज तक जव कदी मूसा कि किताब भणी जाती छे, तो ओको हृदय पर परदा पड़ रयता छे। 16 पुन जव कदी ओको हृदय पोरबु कि आरू पछु, तव वो परदा उठ जाछे। 17 पोरबु तो आत्मा छे: आरू वा काही पोरबु क आत्मा वो स्वतंत्रता छे। 18 पुन जव हामु सब क उघाड़ चेहरा छे पोरबु क प्रताप इनीये प्रकार क प्रगट हुयसे छे, जिना प्रकार दर्पण मा, तो पोरबु क द्वारा जो आत्मा छे, हामु तीनी तेजस्वी रूप मा अंश करीन बदलता जाता छे।