1 Pedro 4

Vewaulta von Gott siene Jnod

1 Wiels nu Christus fa ons em Fleesch jeläden haft, bewaufent junt selfst met dämselwjen Senn; wiels wäa em Fleesch jeläden haft, haft met Sind oppjehieet, 2 daut hee de äwaje Tiet em Fleesch nich lenja no Menschen äare Losten läwen sull, oba no Gott sien Wellen. 3 Wiels daut es jenuach, daut wie de vegone Tiet von ons Läwen toojebrocht haben no de Heiden äa Wellen, aus wie waundelden en Onveschämtheit, Losten, Besopenheit, Schmoasel, Drinkjarie un grulje*4:3 Ooda: ruchulje. Aufjettarie. 4 Daut schient äant framd to sennen, daut jie nich metranen en dautselwje heilloose Tooben, un see lastren; 5 see oba woaren Räakjenschoft jäwen to däm, dee reed es, to rechten de Läwendje un de Doodje. 6 Wiels doawäajen es uk daut Evangelium vekjindicht worden to de Doodje, soo daut see muchten no Menschen no, em Fleesch jerecht woaren, oba no Gott no, em Jeist läwen.

7 Oba daut Enj von aules es dichtbie jekomen. Siet dan besonnen un nichta toom Jebäd. 8 Ver aules oba habt unjarenaunda aunhoolende Leew; wiels de Leew bedakjt de Menj von Sinden. 9 Siet gaustfrie unjarenaunda onen Murren. 10 Soo aus een jiedra de Gow jekjräajen haft, deent junt unjarenaunda, aus goode Vewaulta von Gott siene välfache Jnod. 11 Wan irjent eena rät, lot am daut räden aus Gott sien Wuat*4:11 Ooda: Utspricha.; wan irjent eena deent, lot am daut doonen ut daut Vemieejen, waut Gott jeft; daut Gott mucht en aules veharlicht woaren derch Jesus Christus, däm jehieet Harlichkjeit un Macht von Eewichkjeit to Eewichkjeit. Amen.

Lieden aus een Christ

12 Leefste, lot junt de fieeje Proow, dee junt bejäajent, nich framd sennen, aus wan junt waut Framdet passieet; 13 oba freit junt, ensooväl aus jie Christus sien Lieden deelhauftich sent; soo daut, en de Openboarunk von siene Harlichkjeit, jie muchten uk froo sennen, met ne besondre*4:13 Ooda: jubelnde. Freid. 14 Seelich sent jie, wan jie om Christus sien Nomen vespott woaren; wiels de Jeist von Harlichkjeit un von Gott, rut opp junt. Bie äant es Hee velastat, oba bie junt es Hee veharlicht. 15 Lot kjeenen von junt lieden aus een Merda, ooda een Deef, ooda een Vebräakja, ooda aus eena, dee sikj om aundre äare Sachen kjemmat. 16 Litt hee oba aus een Christ, lot am sikj nich schämen; lot am oba Gott veharlichen en disem Faul. 17 Wiels daut es Tiet, daut Jerecht aun to fangen bie Gott sien Hus. Un wan ieeschtens bie ons, waut fa Enj woaren dee haben, waut daut Evangelium von Gott nich jleewen? 18 Un wan de Jerajchta afens jerat woat, wua woat de Gottloosa un de Sinda to stonen komen? 19 Doawäajen sullen uk dee, waut no Gott sien Wellen lieden, däm truen Schepfa äare Seelen aunvetruen en Goodet doonen.