Nghnumi ja Kpami
21 Khritaw nami leisawngnak am mat ja mat mlung mhnem ua.
22 5:22: Kol 3:18; 1Pit 3:1 Nghnumie Bawipa kea nami veia kba nami ceia kea pi ve ua. 23 Isetiakyaküng, Khritaw cun sangcima khana ana a vea kba kpami cun a nghnumia khana ana veki, Khritaw a mät cun amäta pumsaa kyaki sangcima küikyan Bawi ni. 24 Sangcim cun Khritawa kea a vea kba nghnumie pi ami ceiea kea ve u se.
25 5:25: Kol 3:19; 1Pit 3:7 Khritaw naw sangcim mhlä na lü a sak a peta kba kpamie naw pi nami khyu jah mhlä na ua.