Marcos 11

Jesuh hlüngtainak am Jerusalem a luha mawng

1 Jerusalem pha law hlü lü Betphake la Bethanih mlüh pei ami pha law üng Olip mcunga lawki he. Acunüng Jesuh naw axüisaw he üngka nghngih la na tüi lü, 2 "Nani maa ngnama va cit nia. Nani va pha la sanghngaksaü ngphungki, u naw pi am a ngcumnak ham nani hmu khai. Sut ni lü hia lawpüi nia. 3 Khyang*11:3 Mkhang, am acunüng kamah. naw, ‘Ivai acen nani pawhki ni?’ ami ti üng, ‘Bawi naw ngjahlü ve, asäng tha law be khai ni’ nani ti vai," a ti.

4 Acunüng cit ni lü sanghngaksaü cun lama pei mkawt üng ngphung se, hmu ni lü, ani suh. 5 Acunüng ngdüikia khyang avang naw, "Ise, acena sanghngaksaü nani sutki ni?" ami ti u.

6 Jesuh naw a jah mtheha kba jah mtheh ni se, acunüng ami jah cehsak. 7 Acuna sanghngaksaü cun Jesuha veia lawpüi ni se, a khana ami suisak mtaih u lü Jesuh ngawki. 8 Khyang he naw ami suisak he lama jah phah u se, avang naw thing hnah he jah ksawm u lü lama ami jah phah. 9 ✝11:9: Sal 118:25,26A ma citki he la a hnua läkia khyang he naw, "Hosana! ‘Bawipa ngming üng lawki hin Pamhnam naw dawnak pe seh!’ 10 Pha law khaia khaw cun Davita uknaka kcün üngka kba josenaka am be se," tia ngpyangki he.

11 Jesuh Jerusalema lawki, temple k’uma lut lü avan jah tengki. Khaw mü law hlükia kyase axüsaw xaleinghngih he am Bethanih mlüha citki he.

Jesuh naw Fik Thing a Yünce

12 Angawi, Bethanih üngka naw ami law be üng Jesuh a ei ngaih lawki. 13 Fik thing a hnah naw a bu athuknak üngka naw hmu lü akthei ve khai aw, ti lü teng khaia citki. Cunsepi a phung a pha üng a ngtheinaka kcüna am kyakia kyase a hnah däng a hmuh. 14 Jesuh naw fik dung üng, "U naw pi na ktheih ä ei be ti se," ti se,

axüisaw he naw ami ngjak.

Jesuh Templea a Ceha Mawng

15 Jerusalem ami pha law üng Jesuh temple üng lut lü, ngui mthawngki hea ngawhnak he la müme jah jawituki hea ngawhnak he a jah hukin. 16 Jesuh naw Temple jawihtuknaka kba ami summang vai am ti. 17 ✝11:17:Hesa 56:7; Jer 7:11Acunüng jah mthei lü, "Cangcim üng Pamhnam naw, ‘Ka im cun khyangmjü avana ktaiyünaka im ti khai he, tia ng’yuki,’ Cunsepi nangmi naw m’yukei hea umnaka pawh ve uki," a ti.

18 Acun ktaiyü ktung he la thum jah mtheiki he naw ami ngjak üng Jesuh ami hnimnak vaia lam suiki he. Ani cun kyühki he isetiakhyaüng a ja mtheimthanga phäha khyang he ami cäileta phäh kyaki.

19 Khaw mü law se Jesuh la axüisaw he cun Jerusalem üngka naw akcea citeiki he.

Fik Thing üngka naw Ngtheinak

20 Angawi ngawilam, ami ceh lama fik thing a pya cäpa ng’yawngei se ami hmuh. 21 Pita naw süm law be lü, "Saja aw tenga, Fik thing na yünce cen ng’yawngei ve!" a ti.

22 Jesuh naw jah msang lü, "Pamhnam jum ua. 23 ✝11:23: Mt 17:20; 1Kor 13:2Akcanga ka ning jah mthehki, u naw pi a pyena kba kya khai tia jum lü hina khawmcung üng, ‘Ngnawn lü mliktui üng kyaa’ a ti üng, a tia kba kya khai. 24 Acunakyase ka ning jah mthehki, ipi ktaiyünak am nami kthäh üng yah lü nami ka na khaia ksing ua, acunüng nami yah khai. 25 ✝11:25,26Mt 6:14,15Nami ktaiyü üng ua khana pi mlung am jenak nami tak üng mhlät ua. Acunüng nami Pa, khankhawa ka naw nangmia katnak pi ning jah mhlät khai" a ti. *11:25-26 Cangcim khawjah naw hina 26 am yuk si u. 26 khyanga katnak am nami mhlät üng khankhawa awmkia nami pa naw nangmia katnak pi am ning jah mhlät khai ni" a ti.

Jesuh naw ana a taka Mawng Ngthähnak

27 Jerusalema law be tüki he. Jesuh temple k’uma a ceh üng, ktaiyü ktung he, thum jah mtheiki he la, axüngvai he a veia law u lü, 28 "Ia ana am hina ngkhaw he na jah pawhki ni? U naw hina ana a ning pet ni?" tia, ami kthäh.

29 Jesuh naw jah msang lü, "Kei pi mat ka ning jah kthäh khai, nami na msang üng kei naw pi ia ana am hina ngkhaw he ka jah pawh ning jah mtheh kawng. 30 Johana Baptican petnak hawia ka naw lawki? Mhnam üngka naw lawki aw, khyang üngka naw lawki aw? Na mtheh ua," a ti.

31 Amimät he ngthäh u lü, "I mi ti khai? Mhnam üngka mi ti üng mä, acunüng ise Johan am nami jumki ni? ti khai. 32 Khyang üngka mi ti üng mä, (Khyang avan naw Johan cun sahma mata ami ngaia kyase)" tia khyang he jah kyüh u lü, 33 "Am ksing ve ung," ami ti.

Jesuh naw jah msang lü, "Kei naw pi ia ana am hina ngkhaw he ka jah pawh am ning jah mtheh hlü veng," a ti.