Mateus 26

Jesuh ami ceng

1 Jesuh naw acuna mtheimthangnake a jah pyen päng üng, axüisaw he üng, 2 ✝26:2: Ex 12:1-27"Lätnak Pawi a phanak vai mhnüp nghngih hlü hamki ti nami ksingki, Khyanga Capa kutlamktung üng ami hnim vaia man law khaie," ti lü a jah mtheh.

3 Acunüng, ktaiyü ngvaie, thumksinge ja, angvaie cun, ktaiyü ngvai säih Kaiphah ami tia abawi ima ngbum lawki he. 4 Jesuh ampyuaa man lü hnim khai hea cengkie. 5 "Acunsepi, lätnak pawi k’um üng ta käh pawh vai, khyang he suksak khaie ni," ami ti.

Bethaniha Jesuh ksi ng’ui am buih

6 Jesuh Bethanih mlüh, mnehkse mnehki Sihmona ima veki. 7 ✝26:7: Lk 7:37,38Jesuh naw buh a ei k’um üng, nghnumi mat naw aphu küi alabasta ksi ng’ui um mat üng lawpüi lü, a lu khana a buih law. 8 Axüisawe naw hmuh u lü ami mlung so se, "Ivai ahikba a päihcaihsak ni? 9 "Hina ksi ng’ui khawhaha jawi lü, khuikha msih mpyaki he üng jah pet vai sü," ami ti.

10 Jesuh naw ami pyen ksing lü, "Ivai hina nghnumi nami suksakeikie ni? Ani naw ka khana akdaw säih pawhki ni. 11 ✝26:11: Deut 15:11"Sih mpyaki he cun aläa nami hlawnga ve khaie. Acunsepi, kei cun nami hlawnga aläa am ve hlü nawng. 12 "Hina ksi ng’ui ka khana a buih hin ka ng’utnak vaia pyangki ni. 13 "Akcanga ka ning jah mthehki, khawmdek van üng hawia pi, thangkdaw ami sang hü u üng, hina nghnumi naw hikba a pawha mawng pi ani sümnak vaia pyensih khaie" a ti.

Judah Iskarot naw Jesuh phyeheiki

14 Acunüng, axüisaw he xaleinghngih üngka mat Judah Iskarot naw ktaiyü ngvaiea veia cit lü, 15 ✝26:15: Zakh 11:12"Ani nami veia ka phyehei üng, i ja nami na pet kawm?" a ti. Ngui thumkip khe ma u lü ami pet. 16 Acunkäna Judah Isakarot naw Jesuh a phyeheinak vaia lam suiki.

Jesuh ja axüisaw hea Lätnak pawi buh ei

17 Nghngen am ngcawkia buh pawhnaka mhnüp kcük üng, axüisaw he Jesuh veia law u lü, "Hawia ni, Lätnak pawi buh na ei vaia kami pyen vai na ngjak hlü?" ami ti.

18 Jesuh naw, "Ngnam k’uma khyang mata veia cit u lü, ‘Saja naw Ka kcün pha law ve; ka hnükläke ja Kei naw na ima Lätnak pawi buh ei khai, ti ve’ va ti ua" a ti.

19 Jesuh naw a jah mtheha mäiha axüisaw he naw Lätnak pawi buh pyang vaikie.

20 Khaw amü law üng, axüisaw xaleinghngihe ja Jesuh ei khaia ngaw yümkie. 21 Ami ei k’um üng Jesuh naw, "Ka ning jah mthehki, nangmi üngka mat naw na phyehei khai," a ti.

22 Axüisawe amsüma pukse u lü, "Bawipa aw, acun mä kei vai aw?" ti lü mat mat cima ami kthäh u.

23 ✝ 26:23: Sal 41:9 Jesuh naw, "Kbe mat üng atänga na kpuiheipüiki naw na phyehei khai. 24 "Khyanga Capa cun Cangcim üng a ng’yuka mäiha thi khai. Acunsepi, Khyanga Capa phyehei khaia phäh ihlawk kyühkse khai ni. Acuna khyang hin angtüia käh a ngtüi law xaa ta a phäha daw bawk khai sü," a ti.

25 Phyehei khaia khyang Judah naw, "Rabbi, acun mä kei phäi aw?" a ti.

Jesuh naw, "Ä, na pyen cang ve," a ti.

Bawipaa müei

26 Acukba ami ei k’um üng, Jesuh naw muk lo lü ktaiyü ma lü boki naw, axüisaw he üng a jah pet. "Lo u lü, ei ua; hin hin keia mtisa ni," a ti.

27 Acunüng, Jesuh naw khawt lo lü Pamhnam üng jenak mtheh lü, axüisaw he üng a jah pet. "Nami van naw hin aw ua. 28 ✝26:28: Ex 24:8; Jer 31:31-34Hin hin ka thisen, Pamhnama khyütamnak kthai, khyang khawhah mkhyekatnak mhlätnak vaia lawngki ka thisen ni.