१ कोरिन्थी 1:1-3

1 मै पावल यी चिट्ठीहे लिखतुँ, मै ख्रीष्ट येशूक निउतरह्या हुइक लग परमेश्वरके इच्छासे रोजगिल बतुँ। मै यहाँ हमार विश्वासी संघरिया सोस्थेनेसके संग बतुँ, जे महिन्हे सहयोग करता। 2 मै यी चिट्ठी कोरिन्थ शहरमे रहल मण्डलीक विश्वासीनहे लिखतुँ, जेनहे परमेश्वर येशूक संग एकतामे करके अपन मनैनके रुपमे अल्गैले बताँ, और ऊ तुहुरिन्हे अपन पवित्र मनै बनाइक लग बलैले बताँ। ऊ तुहुरिन्हे ओस्तेहेँके पवित्र कर्ले बताँ, जसिके ऊ हरेक ठाउँमे सक्कु मनैनहे कर्ले बताँ, जेने हमार प्रभु येशू ख्रीष्टसे प्राथना करथाँ। 3 मै प्राथना करतुँ कि हमार परमेश्वर बाबा और प्रभु येशू ख्रीष्ट तुहुरिन्हे अनुग्रह करिँत, और तुहुरिन्हे शान्तिक अनुभव कराँइत।