1 Coríntios 11

जन्नीनके भुट्ला छोप्ना बात

1 तुहुरे मोरिक अनुशरण करो, जसिके मै ख्रीष्टके अनुशरण करथुँ।

2 मै तुहुरिन्के प्रशंसा करथुँ, काकरेकी हर समय तुहुरे महिन्हे सम्झती रथो; और जोन शिक्षा मै तुहुरिन्हे देले बतुँ, उ आज्ञाहे सावधानीसे पालन करतो। 3 पर मै चहथुँ कि तुहुरे एकथो बात जानलेऊ, कि सक्कु थारु मनैनके अगुवा ख्रीष्ट हुइँत। थारु मनैया अपन जन्नीक अगुवा हो, और परमेश्वर ख्रीष्टके अगुवा हुइँत।

4 प्राथना करेबेर या परमेश्वरके वचन घोषणा करेबेर यदि केऊ अपन मुन्टाहे छोपत कलेसे ऊ ख्रीष्टके महिमाहे छोपत, और असिक करके ऊ ख्रीष्टके अपमान करत।

5 पर जोन जन्नी मनैया बिना कपार छोप्ले प्राथना या अगमवाणी करत कलेसे उ जन्नी अपन थरवक आदर नै करत, जे ओकर मुन्टा हुइतिस। यी जन्नी मनैयकमे और अपन भुट्ला खौरके लज्जित हुइल जन्नी मनैयकमे कौनो फरक नै हो। 6 कौनो जन्नी मनैया अपन कपार नै छोपत कलेसे ऊ अपन भुट्ला फेन खौरालेहे; यदि जन्नी मनैयक लग भुट्ला खौरना लाजके बात हो कलेसे ऊ अपन कपारीमे लुग्गा ओँह्रा लेहे।

7 थारु मनैया अपन कपार छोप्ना सही नै हो। काकरेकी थारु मनैयाहे परमेश्वर अपन रुपमे बनैले बताँ। और थारु मनैया परमेश्वरके महिमाहे जनाइत; और जन्नी मनैया थारु मनैयक महिमाहे जनाइत। 8 काकरेकी सुरुवातमे जब परमेश्वर सुरुक थारु और जन्नी मनैयाहे बनैलाँ। तब जन्नी मनैयक शरीरमेसे थारु मनैयाहे नै बनैलाँ। बेन थारु मनैयक शरीरमेसे जन्नी मनैया बनागिल रहे। 9 और थारु मनैयाहे जन्नी मनैयक फाइदक लग नै बनागिल रहे। पर जन्नी मनैया थारु मनैयाहे सहयोग करक लग बनागिल रहे। 10 यहे कारणसे स्वर्गदूतनके हेर्ती रलक कारण, एकथो जन्नी मनैया अपन थरवक अधिनमे बा कहिके देखाइक लग अपन कपार छोपत।

11 पर विश्वासीनके बिच्चेम जन्नी मनैया थारुक लग महत्त्वपूर्ण बा, और थारु मनैया जन्नी मनैयक लग महत्त्वपूर्ण बा। 12 भले परमेश्वर सुरुक थारु मनैयकमेसे सुरुक जन्नी मनैयाहे बनैलाँ। पर आब थारुनहे जलम देहुइया ते जन्नीए मनै हुइँत।

13 मै चहथुँ कि तुहुरे अप्निहीँ निर्णय करो कि का कौनो जन्नी मनैयक लग समूहमे आराधना करेबेर बिना कपार छोप्ले परमेश्वरसे प्राथना करना सही हो? 14 स्वभाविक रुपमे फेन तुहुरे जन्थो, कि यदि थारु मनैया नम्मा भुट्ला पालल कलेसे ओकर लग लाजके बात हुइतिस। 15 यदि जन्नी मनैयक कपारिक भुट्ला नम्मा बतिस कलेसे मनै उहिहे सुग्घुर बा कहिके सोँच्थाँ। जसिके जन्नी मनैनहे प्राकृतिक रुपमे नम्मा भुट्ला देगिल बतिन। ओस्तेहेँके समूहमे आराधना करेबेर ओइने अपन भुट्ला छोपिँत। 16 पर यदि केऊ महिन्से सहमत नै हो कलेसे, यकर बाहेक हमार थेन और परमेश्वरके दोसुर मण्डलीमे औरे कौनो चलन नै हो।

प्रभु-भोज

17 उ विषयके बारेमे मै कहे जाइतुँ, मै तुहुरिन्के प्रशंसा करे नै सेकम। काकरेकी तुहुरे मजक लग नै होके बेन आकुर खराबीक लग जमा हुइथो। 18 काकरेकी पहिले मै असिके सुनु कि जब तुहुरे आराधना करक लग मण्डलीमे एक्के थेन जम्मा हुइथो ते तुहुरिन्केमे फुट रहत। पर महिन्हे विश्वास बा कि यम्ने कुछ हदसम सच्चाई बा। 19 पर पक्कै फेन, परमेश्वरके अनुमोदन किहिहे बा कहिके चिन्हक लग तुहुरिन्के बिच्चेम विभाजन हुई परत।

20 जब तुहुरे हमार प्रभु येशू ख्रीष्टके मृत्युहे याद करक लग एक्के ठाउँमे जमा हुइथो, तब तुहुरिन्के व्यवहार उ मनैनके लग सहज नै रथिन, जेने प्रभुभोज*11:20 प्रभुभोज विश्वासीनके मुख्य रीति यी रहिन कि जब ओइने एक्के थेन जमा हुइँत तब ओइने सक्कु जाने एक्के संग मिलके खाइँत, जोन चिज हर मनै अपन संग नानिँत, ओकर पाछे कुछ रोटी फेन खालिँत और कुछ अंगुरके रस फेन पिलिँत। असिके यी चिज ओइन्के प्रभु येशूक मृत्युहे याद करना साधन रहिन। खाइक लग जमा हुइथाँ। 21 काकरेकी महिन्हे बतागिल बा, तुहुरिन्मेसे बहुत जाने अपन खाना बिना बँट्ले खालेथो। तबेकमारे कौनो मनै भुँख्ले रहिजिथाँ, और केऊ भर मतवार होजिथो। 22 तुहुरे अपन-अपन घरेम खाई, और पिए सेक्थो! तुहुरिन्हे लागत कि परमेश्वरके मण्डली खास नै हो, और तुहुरे उ मनैनके लाज करैथो जेने गरीब बताँ। मै तुहुरिन्हे का बताऊँ? का मै तुहुरिन्के प्रशंसा करुँ? असिन कर्लक कारण मै तुहुरिन्के प्रशंसा नै करम।

23 जोन शिक्षा मै प्रभु येशूक थेनसे भेटैनु, वहे शिक्षा मै तुहुरिन्हे देनु। अथवा जोन रात प्रभु येशू पकरवा पैलाँ। वहे रात प्रभु येशू रोटी लेलाँ। 24 और धन्यवाद देके सेकके येशू उ रोटीहे खन्टैलाँ। और कलाँ, "यी तुहुरिन्के लग मोरिक शरीर हो। मोरिक सम्झनामे असिके करहो।"

25 तब् खाके सेकके येशू खोरिया उठाके असिके कलाँ, "तुहुरे सक्कु जाने यम्नेहेँसे पिओ, यी खोरिया मोरिक खुनमे रलक लावा करार हो। जब-जब तुहुरे यी पिबो, महिन्हे सम्झक लग असिके कर्ती रहहो। 26 काकरेकी जब-जब तुहुरे यी रोटी खैबो, और यी खोरियामेसे अंगुरके रस पिबो, हुँकार नै आइतसम तुहुरे प्रभुक मृत्युक घोषणा करथो। 27 तबेकमारे जे ख्रीष्टके अनादर करके प्रभुक रोटी खाइत, या प्रभुक खोरियामेसे अंगुरके रस पिअत, उ मनैया प्रभुक शरीर और खुनहे अपवित्र बनैलकमे दोषी ठहरी। 28 प्रत्येक मनै अपन आघे अपन व्यवहार सही बा कि नै हो कहिके जाँचित, तब किल ऊ प्रभुक रोटी खाए, और प्रभुक खोरियामेसे अंगुरके रस पिए। 29 काकरेकी ख्रीष्टके शरीरहे बिना आदर कर्ले केऊ रोटी खाइत, और खोरियामेसे अंगुरके रस पिअत कलेसे ऊ परमेश्वरके न्याय अपन उप्पर अप्निहीँ नानत। 30 तबेकमारे तुहुरिन्मेसे बहुत जाने बेमार बतो; तुहुरिन्मेसे बहुत जहनके शरीर कमजोर फेन बा, और बहुत जाने मुसेकल बताँ। काकरेकी यहे परमेश्वरके देहल सजाय हो।

31 यदि हम्रे सुरुएमे अपनहे जाँच कर्थी कलेसे ख्रीष्टके लग हमार व्यवहारमे निन्दा करक लग कुछु फेन नै रही। काकरेकी हम्रे प्रभु भोजमे अपन खाना बाँटके खैथी। 32 पर प्रभु हमार न्याय करथाँ, और हम्रिहिन्हे अनुशासित करथाँ, ताकि अन्त्यक दिनमे परमेश्वर हम्रिहिन्हे संसारके मनैनके संग दोषी ना ठहराइँत।

33 तबेकमारे हे मोरिक विश्वासी भैयो, जब तुहुरे प्रभुभोज खाइक लग जमा हुइबो, तब तुहुरे एकदोसर जहनहे अँस्यालेऊ, ताकि तुहुरे सक्कु जाने एक्के संग खाई सेको। 34 यदि केऊ भुँख्ले बा कलेसे ऊ अपन घरहीँ खालेहे, ताकि जब तुहुरे एक्के थेन जमा हुइबो ते तुहुरे सही व्यवहार देखाई सेको। और परमेश्वर तुहुरिन्के न्याय नै करहीँ। और दोसुर बातहे मै जब तुहुरिन्के थेन अइम, तब सुल्झैम।"