1 एकदोसर जहनहे प्रेम करना कोशिस करो। और तुहुरे आकुर मजा आत्मिक वरदान भेटैना इच्छा करो, विशेष करके अगमवाणी बोल्ना इच्छा करो। 2 काकरेकी अन्य भाषामे बोलुइया मनैनसे नै बोलत, पर परमेश्वरसे बोलत। तबेकमारे ओइन्के बात केऊ नै बुझत, काकरेकी ओइने पवित्र आत्मक शक्तिसे गोप्य बात बतैथाँ। 3 पर जे परमेश्वरके सन्देशहे प्रचार करत, ऊ विश्वासीनहे बल्गर बनाइक लग, उत्साहा देहक लग और ओइन्के मनहे सन्तुष्टि देहक लग सहायता करत। 4 जे अन्य भाषामे बोलत, ऊ अपन विश्वासहे किल पक्का बनाइत; पर जे अगमवाणी बोलत, ऊ मण्डलीक सक्कु विश्वासीनके विश्वासहे पक्का बनाइत।

5 मै चहथुँ कि तुहुरे सक्कु जाने अन्य भाषा बोलो। पर धेउर भाग तुहुरे अगमवाणी बोलो कना मै चहथुँ। काकरेकी यदि अन्य भाषा बोलुइया मनैया ओकर व्याख्या नै करत कि ऊ मण्डलीमे विश्वासीनके विश्वासहे पक्का बनाइक लग का कहता, कलेसे जोन मनैया परमेश्वरके सन्देशहे प्रचार करत ऊ धेउर महत्त्वपूर्ण काम करत।

6 तबेकमारे हे मोरिक विश्वासी भैयो, तुहुरिन्के थेन आके दोसुर भाषामे बात करम कलेसे यी तुहुरिन्के सहयोगके लग नै रहत। मै तुहुरिन्के थेन कुछ खुलासा करना अथवा कुछ विशेष ज्ञान अथवा अगमवाणी अथवा शिक्षा लेके अइनु कलेसे, उ तुहुरिन्के फाइदक लग हुइत। 7 अस्तेहेँके जब तुँ बसिया या वीणा जसिन बजैना बाजा बजैथो, तब यदि तुँ धुन ठिकसे नै बजैबो या दुनु बाजक आवाजमे कुछु फरक नै हो कलेसे दोसुर जाने कसिके जन्हीँ कि यी बसिया बोलता कि वीणा? 8 युद्धमे, यदि तुरही फरछ्वारसे आवाज नै दि कलेसे सैनिक युद्ध लरक लग तयार हुई नै सेक्हीँ। 9 ओस्तेहेँके जब तुहुरे असिन भाषा बोल्बो, जोन भाषा मनै बुझे नै सेक्हीँ कलेसे तुहुरिन्के बोल्लक बेकारे बा।

10 यी संसारमे बहुत मेरिक भाषा बा, और हर भाषक मतलब बा।

11 पर हम्रे एकदोसर जहनके बोल्लक भाषा नै बुझ्थी कलेसे हम्रे ओइन्के लग विदेशी हस हुइती, और ओइने हमार लग विदेशी हस हुइँत। 12 काकरेकी तुहुरे पवित्र आत्मक देना विशेष क्षमता भेटाइक लग अतरा हौसल बतो। तबेकमारे तुहुरे उ क्षमता भेटैना इच्छा करो, जिहिसे मण्डलीक विश्वासीनके विश्वास पक्का होजाइन। 13 तबेकमारे अन्य भाषामे बोलुइया मनैया प्राथना करे कि जोन बात ऊ बोलल, ओकर मतलब ऊ अप्निहीँ बुझाई सेके। 14 काकरेकी जब मै अन्य भाषामे प्राथना करथुँ ते मोरिक आत्मा प्राथना करत, पर मोरिक सोँच या मनके लग कुछु फाइदा नै हुइत, काकरेकी मै बुझे नै सेक्थुँ।

15 यहे कारणसे मै पवित्र आत्मक बताइल प्राथना करे चहथुँ; पर मै यी फेन चहथुँ, कि दोसुर जाने मोरिक कहे खोज्लक बात बुझे सेकिँत। और जब मै गैथुँ ते मै चहथुँ कि मोरिक गीत पवित्र आत्मासे हौसला भेटाए। पर यी फेन जरुरी बा कि मै ज्या गाइतुँ, उ गीत दोसुर जाने बुझे सेकिँत। 16 मानलेऊ कि कौनो साधारण मनैया आराधनामे तोहाँर संग बा, और जब तुँ परमेश्वरके स्तुति करतो। तब्बेहेँ यदि ऊ तोहाँर बात नै बुझ्थो कलेसे तुँ जोन फेन विषयक लग परमेश्वरहे धन्यवाद देके सेक्बो ते ऊ कसिके जानी कि "आमेन! (यकर मतलब हुइत, अस्तेहेँ होए।)" कहिके कब कना हो।

17 परमेश्वरहे तोहाँर देलक धन्यवाद बहुत बरह्या हुई सेकत, पर यिहिसे दोसुर विश्वासीनके विश्वास पक्का नै हुइथिन। 18 मै परमेश्वरहे धन्यवाद देथुँ, काकरेकी तुहुरिन्के तुलनामे मै धेउर अन्य भाषामे बोल्थुँ। 19 तभुन फेन यदि मै मण्डलीक विश्वासीनके थेन नै बुझ्ना मेरिक हजारोँ शब्द बोललसे, बेन मै पाँचे शब्द बोलुँ, जोन शब्द बुझे सेकजाइत। और जिहिसे विश्वासीनके विश्वास फेन पक्का हुइत कलेसे यहे मोरिक लग मजा हुई।

20 हे मोरिक विश्वासी भैयो, तुहुरे एकथो लर्कनके हस ना सोँचो। खराब कामके लग निर्दोष बच्चक हस रहो, पर असिन मामलामे सोँचक लग परिपक्क बनो। 21 मोशक नियम कानुनमे लिखल बा,

कि प्रभु कथाँ,

"मै विदेशीनके माध्यमसे यी मनैनसे बात बत्वैम,

जेने अन्य भाषामे बोल्हीँ।

तभुन फेन ओइने मोरिक कलक नै सुन्हीँ।"

22 तबेकमारे अन्य भाषा बोल्लक अविश्वासीन फेन बुझिँत, ताकि ओइने जानिँत कि यी परमेश्वरके ओहोँरसे आइत। पर अन्य भाषक व्याख्या करक लग परमेश्वर विश्वासीनहे सिपार बनैले बताँ ताकि विश्वासीनके विश्वासहे पक्का करे सेकजाए। 23 कलेसे यदि मण्डलीक सक्कु विश्वासी जमा होके सक्कु जाने अन्य भाषामे बोले लग्लाँ। और अन्य भाषा नै बुझुइया मनै या अविश्वासी मनै भित्तर अइहीँ कलेसे ओइने जरुर सोच्हीँ कि तुहुरे बौराइल बतो।

24 पर यदि सक्कु जाने अगमवाणी करे लग्हीँ। और कौनो अविश्वासी मनै या पवित्र आत्मक वरदानके बारेमे नै जानल मनै भित्तर आगिलाँ कलेसे ओइने महसुस करहीँ कि ओइने पापी हुइँत। और तुहुरिन्के कलक बातके कारण ओइने अपन डगर बद्ले चहिहीँ। 25 परमेश्वरके सन्देशके कारण उहिहे अपन खराब काम और ओकर गोप्यमे रहल सोँचके बारेमे महसुस हुइहिस। तब उहिहे महसुस हुइहिस कि ऊ पापी बा, तब ऊ अपन मन परमेश्वरके ओहोँर घुमाई और पाप करना छोरदी। और ऊ परमेश्वरके आराधना कर्ती कहि "परमेश्वर जात्तिकमे यहाँ तुहुरिन्के बिच्चेम बताँ।"

26 हे मोरिक विश्वासी भैयो, कोन काम कसिके करे परत कहिके मोरिक बात सुनो! जब तुहुरे आराधना करक लग एक्के थेन जमा हुइथो। तब तुहुरिन्मेसे केऊ गीत गैथो। केऊ उपदेश देहत। और केऊ परमेश्वरके देखैलक बात सक्कुहुनहे बत्वाइत। केऊ अन्य भाषामे बात करत। और केऊ भर ओकर उल्ठा करत। यी सक्कु बातके एक्के उद्देश्य हुई परत कि यिहिसे मण्डलीक विश्वासीनके विश्वास पक्का हुइनामे सहयोग मिलिन। 27 यदि केऊ अन्य भाषामे बोले जाइता कलेसे तुहुरिन्मेसे धेउरमे धेउर दुई या तीन जाने किल अन्य भाषामे बोले परत, और एक-एक करके किल बोले परत, और तुहुरिन्के अन्य भाषामे बोल्लक मतलब खोलुइया केऊ ना केऊ हुइही परत। 28 पर यदि मण्डलीमे मतलब खोलुइया मनैया नै हो कलेसे अन्य भाषा बोलुइया मनैया मण्डलीमे चिमचाम रहे। और ऊ अपन मनमने परमेश्वरसे बात बत्वाए।

29 अगमवाणी दुई या तीन जाने किल बोलिँत। और बाँकी रहल मनै ओइन्के कहल बात ध्यानसे सुनिँत। और ओइने जाँचित कि ओइन्के कहल बात पवित्र शास्त्र अनुसार बा कि नै हो। 30 पर यदि वहाँ मण्डलीमे बैठल कौनो दोसुर मनैयाहे सन्देश मिल्लिस कलेसे जे बोले भिरल रही उ मनैया रुकजाए, और दोसुर मनैयाहे बोले देहे परत।

31 तुहुरे सक्कु जाने परमेश्वरके सन्देश प्रचार करे सेक्थो। पर पालिकपाला करे परत, ताकि सक्कु जाने सिखिँत, और उत्साहा भेटाइँत। 32 परमेश्वरके सन्देश प्रचार करुइया अगमवक्तनहे अपन क्षमतामे नियन्त्रण करे परत, चाहे उ बोले अथवा चुप लागे। 33 काकरेकी परमेश्वर गरबर करुइया परमेश्वर नै हुइताँ। पर शान्ति देहुइया परमेश्वर हुइताँ; यहे नियम पवित्र मनैनके हरेक मण्डलीमे पालन हुइत।

34 जन्नी मनै मण्डलीक सभामे चिमचाम रहिँत। ओइन्हे बोल्ना अनुमति नै हुइतिन, पर ओइन्हे अधिनमे रना आज्ञा बतिन: जसिके मोशक नियम कानुनमे लिखल बा। 35 यदि ओइने कुछु सिखे चहथाँ या कुछु पुँछे चहथाँ कलेसे ओइने अपन घरे पुगके अपन थरवाहे पुँछिँत। काकरेकी मण्डलीमे जन्नी मनै बोल्ना लाजके बात हो।

36 असिन काकरे हुइता कि तुहुरिन्मेसे केऊ-केऊ पहिले बतैलक मोशक नियम कानुन पालन करे नै चहथो? का तुहुरिन्हे लागत कि परमेश्वरके वचन तुहुरिन्हे किल देगिल बा?

37 यदि कौनो मनैया अपनहे अगमवक्ता या पवित्र आत्मक योग्यता देगिलक मनैया सम्झत कलेसे उ मनैया जानलेहे, कि जोन बात मै तुहुरिन्हे लिख्थुँ, उ परमेश्वरके आज्ञा हो। 38 पर यदि ओइने मोरिक कहल शब्दमे विश्वास नै करथाँ कलेसे तुहुरे फेन ओइन्हे विश्वास ना करहो।

39 तबेकमारे हे मोरिक विश्वासी भैयो, अगमवाणी बोल्ना उत्सुकतासे इच्छा करो। और अन्य भाषामे बोलुइयनहे मनाही ना करो। 40 पर ज्या चिज फेन तुहुरे मण्डलीमे करथो, उ सक्कु काम पूरा ईमानदारीसे और व्यवस्थित ढंगसे हुई परत।