1 हे मोरिक विश्वासी भैयो, मै तुहुरिन्हे वहे खुशीक खबर याद करवाई चहथुँ, जोन खुशीक खबर मै पैलेहेँ सुनासेकल बतुँ, जिहिहे तुहुरे विश्वास कर्ले रहो और जेम्ने तुहुरिन्के विश्वास फेन पक्का बा। 2 परमेश्वर तुहुरिन्के वहे खुशीक खबरसे उद्धार करलाँ, और यदि तुहुरे मोरिक प्रचार कर्लक खुशीक खबरमे विश्वास कर्तिरबो कलेसे परमेश्वर तुहुरिन्हे बँचैहीँ, नै ते तुहुरे बिनाकामक विश्वास करलो।

3 तबेकमारे मै तुहुरिन्हे सक्कुहुनसे खास सन्देश बतैनु, जोन सन्देश महिन्हे प्रभु येशूक थेनसे मिलल रहे। उ सन्देश यी हो: कि पवित्र शास्त्रक वचन अनुसार येशू ख्रीष्ट हमार पापके लग मुलाँ। 4 हुँकार शरीर गारगिलिन; और पवित्र शास्त्रक अनुसार तेसर दिनमे ऊ फेनदोस्रे जिगिलाँ।

5 और येशू पत्रुस (केफास) के थेन और बाह्रथो चेलनके थेन देखा परलाँ। 6 ओकरपाछे येशू एक्के समयमे पाँच सौसे फेन धेउर चेलनके थेन देखा परलाँ। ओम्नेमेसे बहुत्ते जाने अभिन फेन पलिबताँ। पर केऊ-केऊ भर मुसेकल बताँ। 7 ओकरपाछे ऊ याकूबके थेन देखा परलाँ। ओकरपाछे ऊ सक्कु निउतरह्यनके थेन देखा परलाँ।

8 अन्तिममे, ऊ मोरिक थेन फेन देखा परलाँ, और मै आशा नै करल समयमे एकफाले प्रभु येशूक निउतरह्या बनगिनु। 9 निउतरह्यनमेसे मै सक्कुहुनसे कम महत्त्वपूर्ण बतुँ। मै निउतरह्या कना लायकके नै हुइतुँ। काकरेकी मै परमेश्वरके मण्डलीक विश्वासीनहे सतैनु।

10 पर मै परमेश्वरके अनुग्रहसे निउतरह्या बनल बतुँ। और हुँकार अनुग्रह मोरिक जीवनमे प्रभावशाली रहिन। पर मै सक्कु निउतरह्यनसे धेउर मेहनत कर्नु। तभुन फेन यी मै नै कर्नु, पर परमेश्वरके अनुग्रह मोरिक माध्यमसे काम करतिहीन। 11 तबेकमारे चाहे मै रहुँ, चाहे दोसुर निउतरह्यन रहिँत, हम्रे सक्कु जाने ख्रीष्टके बारेमे एक्केथो सन्देश प्रचार कर्थी, और यम्नेहेँ तुहुरे विश्वास फेन करलो।

12 तबेकमारे मै तुहुरिन्हे यी बताई चहथुँ। काकरेकी हम्रे सक्कु जाने तुहुरिन्के थेन यहे प्रचार कर्ली, कि जब ख्रीष्ट मुलाँ, ते हुँकिन्हे परमेश्वर फेनदोस्रे जिवादेलाँ। कलेसे तुहुरिन्मेसे असिके केऊ नै कहे सेकी कि विश्वासीन मुके सेक्हीँ ते परमेश्वर ओइन्हे फेनदोस्रे नै जिवैहीँ! 13 पर यदि मुअल मनै फेनदोस्रे नै जिथाँ कलेसे ख्रीष्ट फेन मुअलमेसे फेनदोस्रे नै जिलाँ। 14 और यदि ख्रीष्ट मुअलमेसे नै जिवागिलाँ कलेसे जोन सन्देश हम्रे प्रचार कर्थी, उ सन्देश और ख्रीष्टमे कर्लक तुहुरिन्के विश्वासके कौनो मतलब नै हो।

15 यकर बाहेक, फरछ्वारे बा, कि हम्रे वहे साँखीन हुइती, जेने परमेश्वरके बारेमे झूँट बोल्ली। काकरेकी हम्रे गवाही देली कि परमेश्वर ख्रीष्टहे मुअलमेसे जिवादेलाँ। पर यदि यी बात जात्तिक हो कलेसे कि मुअलमेसे केऊ नै जित्ती हुइत कलेसे परमेश्वर फेन ख्रीष्टहे मुअलमेसे नै जिवैलाँ। 16 यदि मुअल मनै फेनदोस्रे नै जिथाँ कलेसे ख्रीष्ट फेन मुअलमेसे फेनदोस्रे नै जिलाँ। 17 और यदि ख्रीष्ट मुअलमेसे नै जिवागिलाँ कलेसे ख्रीष्टमे कर्लक तुहुरिन्के विश्वासके कौनो मतलब नै हो; और तुहुरिन्के पाप अभिन फेन माफ नै हुइल हो।

18 नै ते जोन विश्वासीन ख्रीष्टमे मुगिल बताँ, ओइने फेन सदादिनके लग परमेश्वरसे दूर होगिल बताँ। 19 यदि यहे जीवनके लग किल हम्रे ख्रीष्टमे आशा धर्ले बती कलेसे हम्रे संसारके सक्कु जहनसे धेउर दुखि मनै हुइती।

20 पर सच्चाई यहे हो कि परमेश्वर जात्तिकमे येशू ख्रीष्टहे मुअलमेसे जिवैलाँ, और हुँकार कारण हम्रे जन्थी कि मुअल मनै सक्कु जाने जित्ती होजिहीँ। 21,22 ते तुहुरिन्हे पतै बा, कि जसिके एकथो मनैया आदमके कारण यी संसारमे पाप आइल। और आब मुअलमेसे फेनदोस्रे जित्ती हुइना फेन एकथो दोसुर मनैया ख्रीष्टसे सुरु होगिल बा, जेकर कारण मुअल मनै फेनदोस्रे जित्ती हुइहीँ। 23 पर प्रत्येक मनै एकथो सही क्रममे पालिकपाला जिवाजिहीँ; ख्रीष्ट सक्कुहुनसे सुरुक मनैया हुइँत, जिहिहे परमेश्वर मुअलमेसे जित्ती करैलाँ। और जब ख्रीष्ट फिर्ता अइहीँ, तब हुँकार सँग लग्गेक सम्बन्ध हुइल मनैनहे ऊ मुअलमेसे जित्ती करैहीँ।

24 और जब ख्रीष्ट परमेश्वरके विरोध करुइया सारा दुष्ट शक्तिनहे नाश करदिहीँ, ओकर पाछे संसारके अन्त्य होजाई। तब ख्रीष्ट अपन राज हुँकार बाबा परमेश्वरहे पूरा रुपसे राज करक लग दैदिहीँ। 25 परमेश्वर जबसम ख्रीष्टके दुश्मननहे हुँकार अधिनमे नै करादिहीँ, तबसम ख्रीष्ट रज्वक रुपमे शासन करहीँ। 26 सक्कुहुनसे पाछे मृत्यु कना चिज जरसे खतम होजाई।

27 जब पवित्र शास्त्र कहत कि परमेश्वर सक्कु चिज ख्रीष्टके अधिनमे करदिहीँ कलेसे परमेश्वर यी अधिनमे शामिल नै हुइँत। काकरेकी परमेश्वरे रहिँत, जे सक्कु चिज ख्रीष्टके शक्तिक अधिनमे कर्ले रहिँत। 28 जब सक्कु चिज परमेश्वरके छावक अधिनमे होजाई। तब छावा अपनहे अप्निहीँ पूरा रुपमे परमेश्वरके अधिकारके अधिनमे करादिहीँ, जे हुँकिन्हे उ अधिकार देलिन, ताकि परमेश्वर किल सक्कुहुनके लग सक्कु चिज होजाइँत।

29 आब, यदि मुअल मनैनहे जित्ती नै कराजाइत कलेसे ओइन्के लग डुब्कि लेलक कौनो मतलब नै हो। यदि मुअल मनैनहे परमेश्वर फेनदोस्रे नै जिवैथाँ कलेसे मनै ओइन्के लग काकरे डुब्कि लेथाँ? 30 जहाँसम हमार बात आइत, यदि मुअल मनैनहे फेनदोस्रे नै जिवाजाइत कलेसे हम्रे अपनहे जोखिममे डरना कलक मूर्खता हो।

31 हे मोरिक विश्वासी भैयो, मै रोट्दिन मृत्युक सामना करथुँ। मोरिक कलक बात जात्तिकमे सही बा, और यी फेन सही हो कि मै जात्तिकमे खुशी बतुँ, काकरेकी तुहुरे हमार प्रभु येशू ख्रीष्टकेमे भरोसा करथो। 32 मै एफिसस शहरमे बहुत कठिनाईक अनुभव कर्नु, ओइन्के कारण जेनके व्यवहार जङ्गली जानबरीनके हस बतिन। यदि यी मनैनके कहाईमे किल आधारित बा कलेसे मै उ समस्या सहके का भेटैनु? कुछु फेन नै। तबेकमारे मुअल मनै फेनदोस्रे जित्ती नै हुइथाँ कना बात सच्चा रहत कलेसे मनैनके कहाई अनुसार करना हमार लग मजा हुइना रहे। जेने असिके कथाँ, "आऊ, हम्रे खाई और पिई, काकरेकी यदि काल हम्रे मुगिली कलेसे ते हमार अंत होजाई।"

33 जोन मनै असिन मेरिक बात करथाँ, ओइन्के कारण तुहुरे मूर्ख ना बनो। जसिके मनै कथाँ, "खराब संगतसे मजा चरित्रहे बिगारत। 34 सुधर जाऊ! और पाप करना छोरदेऊ; काकरेकी तुहुरिन्मेसे गोड्गात मनै परमेश्वरहे मजासे नै जन्थो।" तुहुरिन्हे लाज कराइक लग मै असिके कनु।

35 और यदि उदाहरणके लग केऊ पुँछी कि परमेश्वर मुअल मनैनहे कसिके जिवैहीँ? और ओइन्के शरीर कसिन रहिहीन? 36 तब मोरिक जवाफ रही कि ए मूर्ख! जब एकथो बिया बोजाइत, तब बोँट जम्नासे पैलेहेँ बिया वहाँसे जपत होजाइत। 37 ज्या चिज तुहुरे बुइथो, चाहे गोहूँ रहे या औरे कौनो अनाज, यी एकथो बिया किल हो। यकर रुप बोँट हस नै रथिस। 38 परमेश्वर बोँटहे उ रुप देथाँ, जोन रुप ओकर लग जरुरी रहत। हरेक मेरिक बिया अपने रुपमे भारी हुइत। 39 और संसारमे सक्कु अलग-अलग जित्ती प्राणीनके शरीर एक्के हस नै हुइतिन। मनैनके शरीर जानबरीनके शरीर हस नै रहत। चिरैँनके शरीर मच्छीनके शरीरसे फरक रथिन।

40 तबेकमारे आकाशके चिज हस कि सूर्य, जोन्ह्याँ और तोरैयँन फेन यी धर्तीमे रलक चिजसे फरक बताँ: आकाशके चिजमे एक मेरिक सुन्दरता रहत, और धर्तीक चिजमे एकथो दोसुर मेरिक सुन्दरता रहत। 41 सूर्यक तेज एक मेरिक बा, जोन्ह्यँक तेज औरे मेर बा, और तोरैयँनके तेज औरे मेरके बतिन। एकथो तोरैयँक तेज औरे तोरैयँक तेजसे फरक बतिन। 42 मुअल मनै फेनदोस्रे जिहीँ ते फेन अस्तेहेँके हुई। शरीर नाशवान रुपमे गारजाइत, और अविनाशी रुपमे फेनदोस्रे जिउठत। 43 जब हमार शरीर गारजाइत, तब उ शरीर नै मजा और कमजोर हुइत। पर जब उ शरीर मुअलमेसे जित्ती हुइत, तब उ शरीर सुन्दर और शक्तिशाली रहत। 44 हमार मास और खुनक शरीर रहल हस, असिन शरीर फेन रथाँ, जिहिहे परमेश्वरके आत्मासे जीवन देगिल रहत। और हमार मास और खुनके शरीर असिन शरीरमे बदलजाई, जिहिहे परमेश्वरके आत्मासे जीवन देगिल रहत। 45 पवित्र शास्त्रमे असिके लिखल बा, "सुरुक मनैया अथवा आदम जित्ती प्राणी बनल।" अन्तिम आदम जे ख्रीष्ट हुइँत, ऊ सदाकालके जीवन देथाँ। 46 आघे खुन और मास रहल शरीर अस्तित्त्वमे आइल, तब उ शरीर आइल, जेनहे परमेश्वरके आत्मक माध्यमसे जीवन देगिलिन।

47 सुरुक मनैया माटीलेके बनल रहे; दोसर मनैया ख्रीष्ट हुइँत, जे स्वर्गमेसे अइलाँ। 48 जोन मनै यी धर्तीक हुइँत, ओइने धर्तीक सुरुक मनैया आदमके हस हुइँत। पर उ मनै जेनके सम्बन्ध स्वर्गसे बतिन, ओइने स्वर्गक मनैया, ख्रीष्टके हस बताँ। 49 और जसिके परमेश्वर हम्रिहिन्हे ओस्तेहेँ शरीर देले बताँ, जसिन शरीर धर्तीक सुरुक मनैया आदमके रहिस। ओस्तेहेँके हमार विश्वासीनके शरीर फेन वहे ख्रीष्टके शरीर हस रही, जे अब्बे स्वर्गमे बताँ।

50 आब हे मोरिक विश्वासी भैयो, यी धर्तीमे हमार शरीर मास और खुनसे बनल बा; हम्रे परमेश्वरके राज स्वर्गमे अपन यी शरीरके संग नै रहे भेटैबी। हम्रे स्वर्गमे अपन असिन शरीरके संग नै रहे सेकब, जोन शरीर मुजाइत। काकरेकी स्वर्गमे कौनो मृत्यु नै हो। 51 हेरो, मै तुहुरिन्हे एकथो रहस्य बताइतुँ: कि हमारमेसे सक्कु जाने नै मुबी, पर हम्रे सक्कु जाने बदलजिबी।

52 यी एकफाले हुई, अतरा झत्ते हुई कि जसिके केऊ अपन आँखी झप्काइत। जब अन्तिम तुरही बजाजाई, ते जोन-जोन मनै मुसेकल रहिहीँ, ओइने सदाकालके जीवन जिअक लग फेनदोस्रे जिवाजिहीँ। और हम्रे जे-जे जित्ती रबी, हमार शरीर बदलजाई। 53 काकरेकी हमार यी शरीर जोन महा सहजिलसे मुजाइत और सरजाइत। यी एकथो असिन शरीरमे बदलजाई, जोन ना कबु मुअत, और ना कबु सरत।

54 जब असिन हुई ते पवित्र शास्त्रमे परमेश्वरके कहल यी बात पूरा होजाई,

"मृत्युहे पूरा रुपमे हराजाजाई, और यकर अस्तित्त्व ओराजिहिस।

55 ए मृत्यु तोरिक विजय कहाँ रहिगिल?

ए मृत्यु, तोरिक खील कहाँ रहिगिल?"

56 पापके शक्तिक कारण मृत्यु आइत, और मनै पाप करथाँ कलेसे दण्ड फेन पाईपरत। काकरेकी मनै मोशक नियम कानुनहे तुरल बताँ। 57 पर परमेश्वरहे धन्यवाद होए, हमार प्रभु येशू ख्रीष्ट हमार लग ज्या करलाँ, ओकर कारण परमेश्वर हम्रिहिन्हे पाप और मृत्युसे जितैले बताँ। 58 तबेकमारे हे मोरिक प्रिय विश्वासी भैयो, अपन विश्वासमे पक्का रहो, और गलत शिक्षासे ना भट्कोहो। प्रभुक लग तुहुरे ज्या काम करथो, उ काम आकुर मजासे करो। काकरेकी तुहुरे यी जन्थो, कि प्रभुक लग तुहुरिन्के कर्लक मेहनत बेकारमे नै जाई।