1 आब तुहुरिन्के चिट्ठीमे लिख्के पुँछ्लक प्रश्नक बारेमे मै बताइतुँ: का हमार लग यी मजा नै हुई कि हम्रे भोज ना करी? 2 पर व्यभिचार सम्बन्धी कैयो परीक्षा हुइलक कारणसे मै तुहुरिन्हे सल्लाहा देहतुँ कि प्रत्येक पुरुष मनै भोज करलिँत। और ऊ अपन जन्नीक संग बफादार रहे। अस्तेहेँके प्रत्येक महिलन फेन भोज करलिँत। और ओइने फेन अपन थरवक संग बफादार रहिँत।

3 थरवा अपन जन्नीहे ओकर पूरा भोजाहा सुख देहे, और अस्तेहेँके जन्नी फेन अपन थरवाहे पूरा भोजाहा सुख देहे। 4 जन्नीहे ओकर अपन शरीरमे अधिकार नै हुइतिस, पर ओकर शरीरमे ओकर थरवक हक बतिस; ओस्तेहेँके थरवाहे फेन ओकर अपन शरीरमे अधिकार नै हुइतिस, पर ओकर शरीरमे ओकर जन्नीक हक बतिस।

5 तुहुरे अपन थरवा जन्नीमे एकदोसर जहनहे शारीरिक सम्बन्ध बनैनासे अस्वीकार ना करो। थोरचे समयक लग सल्लाहा करके प्राथना करक लग अल्गे बैठ्लेसे फेन आकुर समयमे भर संगे रहो। नै ते यदि तुहुरे अपन मनहे थाम्हे नै सेक्बो कलेसे शैतान तुहुरिन्हे फँसैना मौका भेटाजाई। 6 पर मै ज्या कहतुँ यी मोरिक सुझाव किल हो, आज्ञा नै हो। 7 मै चहथुँ कि जसिके मै भोज नै कर्ले हुइतुँ; ओस्तेहेँके सक्कु मनै रहिँत। पर सक्कु जहनहे परमेश्वरके ओहोँरसे फरक-फरक मेरके वरदान मिलल बतिन; परमेश्वर कौनो मनैनहे भोज करना वरदान देले बतिन, और कौनो-कौनो मनैनहे भर भोज नै करना वरदान देले बतिन।

8 पर भोज नै करल और थरवा अथवा जन्नी मुगिलक मनैनहे मोरिक सल्लाहा का बा कलेसे तुहुरे बिना भोज कर्ले मोरिक हस रना तुहुरिन्के लग मजा हुई। 9 पर यदि तुहुरे अपन मनहे थाम्हे नै सेक्थो कलेसे तुहुरे भोज करलेऊ; काकरेकी यी शरीरके इच्छनहे नियन्त्रण करना समस्या हुइलसे भोज करना मजा हो।

10 जोन मनैनके भोज होगिल बतिन, ओइन्हे मै नै होके प्रभु येशू आज्ञा देहतताँ, ताकि ओइने थरवा जन्नी एकदोसर जहनहे छुट्पत्तर ना दिँत। 11 और यदि ओइने छुट्पत्तर देके अल्गे होजिलेसे फेन ओइने दोसुर भोज ना करिँत; या ते जन्नी मनैया अपन थरवासे फेनदोस्रे मिलजाए और थरवा फेन अपन जन्नीहे ना छोरे।

12 पर आब मै बँचल विश्वासीनसे बात करतुँ, यी प्रभुक आज्ञा नै हो, पर यी मोरिक आज्ञा हो कि जोन मनैयक अविश्वासी जन्नी बतिस, और ओकर जन्नी ओकर संग हरदम जिअक लग तयार बतिस कलेसे उ थारु मनैया अपन जन्नीहे ना छोरे। 13 और ओस्तेहेँके जोन जन्नी मनैयक थरवा अविश्वासी बतिस, और ओकर थरवा उ जन्नी मनैयक संग हरदम जिअक लग तयार बतिस कलेसे उ जन्नी मनैया फेन अपन थरवाहे ना छोरे। 14 काकरेकी जोन थारु मनैया ख्रीष्टमे विश्वास नै करत, उ थारु मनैया अपन जन्नीक कारण पवित्र ठहरत। और अस्तेहेँके जोन जन्नी मनैया ख्रीष्टमे विश्वास नै करत, उ जन्नी मनैया अपन थरवक कारण पवित्र ठहरत। यदि तुहुरिन्के थरवा या जन्नी परमेश्वरहे विश्वास नै करथाँ कना बात सच्चा रहत कलेसे तुहुरिन्के लरका फेन अपवित्र रताँ। पर आब तुहुरिन्के लरका फेन परमेश्वरके हुइँत।

15 पर जोन थारु मनैया ख्रीष्टमे विश्वास नै करत। और यदि उ थारु मनैया ख्रीष्टमे विश्वास करुइया अपन जन्नीहे छोरे चाहत कलेसे उहिहे छोरेदेऊ। असिन अवस्थामे यदि उ विश्वासी जन्नी उहिहे छोरदेहल कलेसे फेन ओम्ने पाप नै हो। काकरेकी परमेश्वर हम्रिहिन्हे शान्तिसे रहक लग बलैले बताँ। 16 हे विश्वासी जन्नी मनै, तुहुरिन्हे पता हुई परना हो, कि तुहुरिन्के कारण शायद तुहुरिन्के थरवन फेन बँचे सेक्थाँ। और हे विश्वासी थारु मनै तुहुरिन्के कारण शायद तुहुरिन्के जन्नीन फेन बँचे सेक्थाँ कना बात तुहुरिन्हे याद हुई परना हो।

17 मोरिक कहे खोज्लक यहे हो, कि तुहुरिन्मेसे प्रत्येक जहनहे परमेश्वर जसिन-जसिन वरदान देले बताँ, वहे अनुसार तुहुरिन्हे जीवन जिती रहे परत। और ओस्तेहेँके पलिरहो, जसिके तुहुरे तब रहो, जब परमेश्वर तुहुरिन्हे बलैले रहिँत। 18 उदाहरणके लग जब कौनो एकथो यहूदी मनैया प्रभु येशूहे विश्वास करत कलेसे उ मनैयाहे अपन यहूदिपनहे छोरे परना कौनो जरुरी नै हो। और अस्तेहेँके कौनो गैर-यहूदी मनैया प्रभु येशूकमे विश्वास करत कलेसे उहिहे यहूदी बनक लग खतना करवाई परना कौनो जरुरी नै हो। 19 केक्रो खतना हुइल रहे चाहे ना हुइल रहे, यिहिसे कुछु फरक नै परत। पर सक्कुहुनसे जरुरी बात परमेश्वरके आज्ञा पालन करना हो।

20 प्रत्येक जाने ओस्तेहेँके रहो जसिके तुहुरे तब रहो, जब परमेश्वर तुहुरिन्हे बलैले रहिँत। 21 यदि तुहिन्हे गुलाम रहल अवस्थामे परमेश्वर बलैले बताँ कलेसे तुँ निराश ना होऊ; पर यदि तोहाँर मलिक्वा अपन इच्छासे तुहिन्हे तुँ स्वतन्त्र होके जाई सेक्थो कहिके कहि कलेसे तुँ स्वतन्त्र होके जाई सेक्थो। 22 काकरेकी जिहिहे परमेश्वर गुलाम रहल अवस्थामे बलैले बताँ, उहिहे प्रभु पापके शक्तिमेसे मुक्त कर्ले बताँ, और ओस्तेहेँके जिहिहे परमेश्वर स्वतन्त्र रहल अवस्थामे बलैले बताँ, ओइने ख्रीष्टके गुलाम हुइँत। 23 परमेश्वर तुहुरिन्के लग येशू ख्रीष्टहे संसारमे पठाके क्रूसमे बलिदान करवाके बरवार मोल चुकैले बताँ। तबेकमारे तुहुरे मनैनके नै होके परमेश्वरके गुलाम बनो। 24 तबेकमारे हे मोरिक विश्वासी भैयो, परमेश्वरके संग ओस्तेहेँके रहो जसिके तुहुरे तब रहो, जब परमेश्वर तुहुरिन्हे बलैले रहिँत।

25 भोज नै करल कुवाँरीनके बारेमे प्रभुक थेनसे महिन्हे कौनो आज्ञा ते नै मिलल हो। पर परमेश्वरके दयक कारण परमेश्वरके विश्वासयोग्य मनैनमेसे मै एकथो हुइतुँ। और मोरिक सुझाव यहे बा। 26 कि अस्कल प्रत्येक ठाउँमे विश्वासीनके लग महा कर्रा बा। अस्कलिक दुःखके कारण भोज नै करल मनैनहे मोरिक सल्लाहा यहे बा कि ओइने भोज ना करिँत।

27 यदि तुँ भोज कर्ले बतो कलेसे छुट्पत्तर ना माँगो। और यदि तुँ भोज नै कर्ले हुइतो कलेसे भोज करना कोशिस ना करहो। 28 पर यदि तुँ भोज कर फेन लेलो कलेसे उ पाप नै हो। और यदि कुँवारी लौँदी भोज करलेहल कलेसे फेन उहिहे पाप नै लग्हिस। पर भोज करल मनैनहे यी संसारमे अपन जीवनमे बहुत दुःखके सामना करे पर्हिन। और मै तुहुरिन्हे असिन दुःखसे बँचाई चहथुँ।

29 हे मोरिक विश्वासी भैयो, मै तुहुरिन्हे कहतुँ, कि ख्रीष्टके फिर्ता अइना समय धेउर नै रहिगिल हो। तबेकमारे तुहुरिन्के जन्नी बा या नै हो कना विषयमे धेउर चिन्ता ना करो। पर प्रभुक सेवा करना बारेमे सोँच्ती रहो। 30 जोन मनै रुइथाँ, या जोन मनै खुशी बताँ, या जोन मनै अपन लग कुछु चिज किन्थाँ, ओइने यी सक्कु चिजके बारेमे धेउर चिन्ता ना करिँत। काकरेकी यी सक्कु बातके कारण तुहुरे प्रभुक सेवा करना बिस्राजिबो। 31 और यी संसारमे ज्या चिज फेन हमार थेन बा, हम्रे उ चिजहे बहुत महत्त्वपूर्ण नै माने परना हो। काकरेकी यी संसारमे रहल सक्कु चिज नाश होजिहीँ।

32 तुहुरे सक्कु जाने संसारिक अभिलाषासे मुक्त रहो कना मै चहथुँ। भोज नै हुइल मनैया जबफेन प्रभुक सेवा करना और प्रभुहे खुशी बनैना बारेमे सोँच्ती रहत। 33 पर भोज हुइल मनैया अपन जन्नीहे कसिके खुशी धारुँ कहिके संसारके बातमे चिन्ता करत। 34 भोज करल मनैनके मन दुनु ओहोँर लागल रथिन। भोज नै हुइल जन्नी मनै शरीर और आत्मा दुनुमे कसिके पवित्र रहुँ कहिके प्रभुक कामके बारेमे चिन्ता करथाँ। पर भोज करल जन्नी मनै भर अपन थरवाहे कसिके खुशी धारुँ कहिके संसारके बातमे चिन्ता करथाँ। 35 यी बात तुहुरिन्के उप्पर प्रतिबन्ध लगाइक लग नै हो। पर तुहुरिन्के भलाइएके लग कहतुँ, ताकि तुहुरे एक मन होके प्रभुक ओहोँर भक्तिसे ठिक तरिकासे जीवनयापन करे सेको। 36 यदि कौनो असिन मनैया बा, जेकर ठकौनी कौनो लौँदीसे होगिल बतिस। और भोज हुइना बतिस। यदि उ लौँदा सोँचत कि भोजक लग बेर करके ऊ उ लौँदीहे मजा नै करथो। और उ लौँदीक उमेर बह्रतिस। और यदि उ लौँदा अपन ईच्छाहे नियन्त्रण करे नै सेक्थो कलेसे ऊ उ लौँदीसे भोज करलेहे। और ऊ यहे चाहत कलेसे यी कौनो पाप नै हो। 37 पर जोन मनैया अपन मन पक्का कर सेकल बा, और जे कौनो करकापमे परल नै हो, पर अपन इच्छाहे वशमे धारे सेकत, और जे कन्याहे भोज नै करना निर्णय कर सेकल बा, कलेसे असिन मनैया फेन ठिके करी। 38 असिके जे कन्याहे भोज करी, ऊ ठिके करी, पर जे भोज नै करी, ऊ झन मजा करत। 39 थरवा जिअत घरिमे जन्नी अपन थरवक बन्धनमे रहत। पर जब ओकर थरवक मृत्यु होजिहिस, तब उ जन्नी अपन इच्छा करल मनैयासे भोज करना स्वतन्त्र होजाइत, पर उ मनैया विश्वासी हुई परत। 40 पर यदि ऊ बिना भोज कर्ले बैठी कलेसे ऊ आकुर धेउर सुखी रही। और महिन्हे लागत कि परमेश्वरके आत्मा महिन्हे अगुवाई करतिन।