1 हे मोरिक प्रिय संघरियन, हरेक मनैनहे विश्वास ना करो, जे पवित्र आत्मक ओहोँरसे बोल्लक दाबी करत। पर आत्मनहे जाँचो कि ओइने परमेश्वरके ओहोँरसे हुइताँ कि नै कहिके। काकरेकी बहुत्ते झूँटा अगमवक्तन संसारमे बताँ। 2 परमेश्वरके आत्माहे तुहुरे असिके चिन्हे सेक्थो कि जोन आत्मा मानजाइत कि येशू ख्रीष्ट एकथो मनैयक रुपमे अइलाँ, और ऊ परमेश्वरके ओहोँरसे हुइताँ। 3 जे येशूहे अस्वीकार करत, ऊ परमेश्वरके ओहोँरसे नै हो; और उ मनैयक भित्तर ख्रीष्टके विरोधिक आत्मा बतिस; जेकर बारेमे तुहुरे सुनसेकल बतो कि ऊ आइक लग बा। और आब ऊ यी संसारमे आसेकल बा। 4 हे मोरिक प्रिय लरको, तुहुरे परमेश्वरके मनै हुइतो, और तुहुरे उ झूटा अगमवक्तनकेमे विजय होसेकल बतो। काकरेकी पवित्र आत्मक शक्ति जोन तुहुरिन्केमे बा, उ शैतानके शक्तिसे भारी बा, जे यी संसारके मनैनकेमे राज करत। 5 उ झूँटा अगमवक्ता संसारके हुइँत, तबेकमारे ओइने संसारेके बात बत्वैथाँ, और संसारके मनै ओइन्के बात सुन्थाँ। 6 हम्रे परमेश्वरके हुइती। जे परमेश्वरहे चिन्हत, ऊ हमार बात सुनत। पर जे परमेश्वरहे नै चिन्हत, ऊ हमार बात नै सुनत। अस्तेके हम्रे सच्चाई बोलुइया आत्मा और झूट बोलुइया आत्माहे हम्रे चिहिन्लेथी।

7 हे मोरिक प्रिय संघरियन, हम्रे एकदोसुर जहनसे प्रेम करी, काकरेकी प्रेम परमेश्वरके थेनसे आइत। जे दोसुर जहनहे प्रेम करत, उ परमेश्वरके लरका हो और उ परमेश्वरहे चिन्हत। 8 जे दोसुर जहनहे प्रेम नै करत, ऊ परमेश्वरहे नै चिन्हत। काकरेकी परमेश्वर प्रेम हुइताँ। 9 जोन प्रेम परमेश्वर हम्रिहिन्हे करथाँ, उ यिहिसे प्रकट हुइल कि परमेश्वर अपन एक्केथो छावाहे संसारमे पठैलाँ, ताकि हम्रे हुँकारमे विश्वास करके सदाकालके जीवन भेटाई। 10 सच्चा प्रेम यी हो: कि हम्रे परमेश्वरहे प्रेम नै कर्ली। पर परमेश्वर हम्रिहिन्हे प्रेम करलाँ कि परमेश्वर हमार पापहे हम्रिहिन्से दूर कराइक लग अपन छावाहे बलिदान हुइक लग पठैलाँ, जिहिसे हमार पाप माफ करगिल बा। 11 हे मोरिक प्रिय संघरियन, परमेश्वर हम्रिहिन्हे असिके गजब प्रेम करलाँ। तबेकमारे हम्रे फेन एकदोसर जहनहे प्रेम करे परत। 12 परमेश्वरहे कबु फेन केऊ देख्ले नै हो। यदि हम्रे एकदोसर जहनहे प्रेम कर्बी कलेसे परमेश्वर हमारमे पलिरथाँ, और हुँकार प्रेम हमारमे सिद्ध होजाइत। 13 यिहिएसे हम्रे जन्थी कि हम्रे परमेश्वरके संग एकतामे रथी, और ऊ हमार संग एकतामे रथाँ। काकरेकी ऊ अपन पवित्र आत्मा हम्रिहिन्हे देले बताँ। 14 हम्रे छावाहे देखल बती और गवाही देथी, कि परमेश्वर बाबा अपन छावाहे संसारके मुक्तिदाता हुइक लग पठाइल बा।

15 जे यी स्वीकार करत कि येशू परमेश्वरके छावा हुइँत, कलेसे परमेश्वर ओकर संग एकतामे रथाँ, और ऊ परमेश्वरके संग एकतामे रहत। 16 हम्रे बरे मजासे जन्थी और हम्रे विश्वास फेन कर्थी कि परमेश्वर हम्रिहिन्हे प्रेम करथाँ। परमेश्वर प्रेम हुइताँ और जेने प्रेममे पलिरथाँ, ओइने परमेश्वरके संग एकतामे पलिरथाँ, और परमेश्वर ओइन्के संग एकतामे पलिरथिन। 17 यिहिएसे प्रेम हमारमे सिद्ध हुइल कि हम्रिहिन्हे न्यायक दिनमे साहस होए; काकरेकी हम्रे जात्तिके दोसुर जहनहे प्रेम कर्थी, और ओस्तेहेँके हम्रे जिथि जसिके ख्रीष्ट संसारमे जिलाँ। 18 प्रेममे डर नै रहत, पर सिद्ध प्रेम डरहे हटादेहत। काकरेकी डरके सम्बन्ध ते दण्डसे रहत और जे डराइत प्रेममे ऊ सिद्ध नै हुइल रहत। 19 हम्रे परमेश्वरहे और एकदोसुर जहनहे प्रेम कर्थी, काकरेकी आघे परमेश्वर हम्रिहिन्हे प्रेम करलाँ। 20 यदि केऊ कहत, "मै परमेश्वरहे प्रेम करथुँ।" पर अपन विश्वासी भैयाहे घृणा करत कलेसे ऊ झूँटा हो। काकरेकी जे अपन विश्वासी भैयाहे जिहिहे ऊ देख्ले बा उहिहे प्रेम करे नै सेकत कलेसे, ऊ परमेश्वरहे फेन प्रेम करे नै सेकी, जिहिहे ऊ देख्ले नै हो। 21 और परमेश्वरसे हम्रिहिन्हे यी आज्ञा मिलल बा कि जे परमेश्वरहे प्रेम करत, ऊ अपन विश्वासी भैयाहे फेन प्रेम करे।