१ यूहन्ना 4:1-4

आत्मनके जाँच

1 हे मोरिक प्रिय संघरियन, हरेक मनैनहे विश्वास ना करो, जे पवित्र आत्मक ओहोँरसे बोल्लक दाबी करत। पर आत्मनहे जाँचो कि ओइने परमेश्वरके ओहोँरसे हुइताँ कि नै कहिके। काकरेकी बहुत्ते झूँटा अगमवक्तन संसारमे बताँ। 2 परमेश्वरके आत्माहे तुहुरे असिके चिन्हे सेक्थो कि जोन आत्मा मानजाइत कि येशू ख्रीष्ट एकथो मनैयक रुपमे अइलाँ, और ऊ परमेश्वरके ओहोँरसे हुइताँ। 3 जे येशूहे अस्वीकार करत, ऊ परमेश्वरके ओहोँरसे नै हो; और उ मनैयक भित्तर ख्रीष्टके विरोधिक आत्मा बतिस; जेकर बारेमे तुहुरे सुनसेकल बतो कि ऊ आइक लग बा। और आब ऊ यी संसारमे आसेकल बा। 4 हे मोरिक प्रिय लरको, तुहुरे परमेश्वरके मनै हुइतो, और तुहुरे उ झूटा अगमवक्तनकेमे विजय होसेकल बतो। काकरेकी पवित्र आत्मक शक्ति जोन तुहुरिन्केमे बा, उ शैतानके शक्तिसे भारी बा, जे यी संसारके मनैनकेमे राज करत।