परमेश्वरके प्रेम और हमार प्रेम
7 हे मोरिक प्रिय संघरियन, हम्रे एकदोसुर जहनसे प्रेम करी, काकरेकी प्रेम परमेश्वरके थेनसे आइत। जे दोसुर जहनहे प्रेम करत, उ परमेश्वरके लरका हो और उ परमेश्वरहे चिन्हत। 8 जे दोसुर जहनहे प्रेम नै करत, ऊ परमेश्वरहे नै चिन्हत। काकरेकी परमेश्वर प्रेम हुइताँ। 9 जोन प्रेम परमेश्वर हम्रिहिन्हे करथाँ, उ यिहिसे प्रकट हुइल कि परमेश्वर अपन एक्केथो छावाहे संसारमे पठैलाँ, ताकि हम्रे हुँकारमे विश्वास करके सदाकालके जीवन भेटाई। 10 सच्चा प्रेम यी हो: कि हम्रे परमेश्वरहे प्रेम नै कर्ली। पर परमेश्वर हम्रिहिन्हे प्रेम करलाँ कि परमेश्वर हमार पापहे हम्रिहिन्से दूर कराइक लग अपन छावाहे बलिदान हुइक लग पठैलाँ, जिहिसे हमार पाप माफ करगिल बा। 11 हे मोरिक प्रिय संघरियन, परमेश्वर हम्रिहिन्हे असिके गजब प्रेम करलाँ। तबेकमारे हम्रे फेन एकदोसर जहनहे प्रेम करे परत।
16 हम्रे बरे मजासे जन्थी और हम्रे विश्वास फेन कर्थी कि परमेश्वर हम्रिहिन्हे प्रेम करथाँ। परमेश्वर प्रेम हुइताँ और जेने प्रेममे पलिरथाँ, ओइने परमेश्वरके संग एकतामे पलिरथाँ, और परमेश्वर ओइन्के संग एकतामे पलिरथिन। 19 हम्रे परमेश्वरहे और एकदोसुर जहनहे प्रेम कर्थी, काकरेकी आघे परमेश्वर हम्रिहिन्हे प्रेम करलाँ।