1 मै पत्रुस यी चिट्ठी लिखतुँ, जे येशू ख्रीष्टके निउतरह्या हुइतुँ। मै यी चिट्ठी परमेश्वरके चुनल उ मनैनहे लिखतुँ, जेने पोन्टस, गलातिया, कापाडोकिया, एशिया और बिथिनिया प्रदेशके अलग-अलग बहुत्ते शहरमे परदेशीनके हस रथाँ।

2 परमेश्वर बाबा पैलेहेँ तुहुरिन्हे अपन मनै बनाइक लग और पवित्र आत्मक कामके माध्यमसे तुहुरिन्हे पवित्र बनाइक लग चुन्ना निर्णय करल रहिँत। परमेश्वर असिके काकरे करलाँ कलेसे ताकि तुहुरे येशू ख्रीष्टके आज्ञा पालन करो, और हुँकार खुनसे शुद्ध हुई सेको। मै प्राथना करतुँ कि परमेश्वर तुहुरिन्हे प्रशस्त मात्रामे अनुग्रह और शान्ति दिँत।

3 हमार प्रभु येशू ख्रीष्टके बाबा और परमेश्वरहे प्रशंसा होए। परमेश्वर अपन महान कृपासे हम्रिहिन्हे लावा जीवन देले बताँ। काकरेकी परमेश्वर येशू ख्रीष्टहे मुअलमेसे फेनदोस्रे जिवैलाँ। ऊ हम्रिहिन्हे निर्धक्कसे जिअक लग सक्षम बनैले बताँ; उ कलक ऊ हम्रिहिन्हे वाचा कर्लक बात भेटैना पूरा आशा करना हो। 4 परमेश्वर हमार लग तयार पर्लक सक्कु मजा चिज भेटाइक लग हम्रे आसरा हेरती। उ चिजनहे केऊ फेन नाश करे नै सेकी। ओइन्हे कुछु चिज फेन बिगारे नै सेकी। उ चिज कबु फेन पुरान या नै सुग्घुर नै हुइहीँ। परमेश्वर उ चिजनहे तुहुरिन्के लग स्वर्गमे धर्ले बताँ। 5 परमेश्वर अपन बरवार शक्तिसे तुहुरिन्हे सुरक्षित धरहीँ। काकरेकी तुहुरे येशूकमे विश्वास करथो। ऊ तुहुरिन्हे अन्तिम दिनसम सुरक्षित धरहीँ। जब ख्रीष्ट फिर्ता अइहीँ, तब तुहुरे जन्बो कि परमेश्वर तुहुरिन्हे पूरा रुपमे पाप और मृत्युमेसे बँचैले बताँ। 6 तुहुरे यहे सक्कु बातमे खुशी हुई परत, तभुन फेन अब्बे कुछ समयक लग तुहुरिन्हे बहुत मेरके दुःख सहे परी। 7 यी समस्यनके उद्देश्य यी देखाइक लग हो कि तुहुरे जात्तिकमे परमेश्वरकेमे भरोसा करथो। येशू ख्रीष्टकेमे तुहुरिन्के विश्वास सोनसे फेन धेउर मोलके बा। जसिके नाश होजिना सोनहे आगीलेके जाँचजाइत और निखारजाइत। ओस्तेहेँके जब तुहुरिन्के विश्वास समस्यामे फेन बल्गर पलिरहत कलेसे, येशू ख्रीष्ट फिर्ता अइना दिनमे यी तुहुरिन्हे बहुत्ते प्रशंसा, महिमा और सम्मान लेके आई। 8 तुहुरे येशूहे नै देख्ले हुइतो, तभुन फेन तुहुरे हुँकिन्हे प्रेम करथो। तुहुरे हुँकिन्हे अब्बे नै देख्थो। पर तुहुरे हुँकारमे विश्वास करथो। तबेकमारे तुहुरे बहुत खुशी बतो। तुहुरे कतरा खुशी बतो कहिके वर्णन करना शब्दै नै हो। 9 काकरेकी परमेश्वर तुहुरिन्के प्राणहे पूरा रुपमे पापके सजायमेसे मुक्ति देहतताँ। यी तुहुरिन्के येशू ख्रीष्टमे कर्लक विश्वासके ईनाम हो।

10 यी मुक्तिक बारेमे परमेश्वरके अगमवक्तनके आकुर धेउर जाने चाहिँत। ओइने असिके अगमवाणी करलाँ कि परमेश्वर तुहुरिन्हे बँचाइक लग तुहुरिन्के पक्षमे कसिके दयासे भरल व्यवहार करहीँ, जेकर तुहुरे लायकके फेन नै रहो। ओइने जवाफ भेटाइक लग महा ध्यानसे अध्ययन करलाँ। 11 ख्रीष्टके आत्मा ओइन्केमे रहिन, और ओइन्हे कलिन कि ख्रीष्ट कसिके दुःख भोग्हीँ, और पाछेजाके ओइन्हे बरवार सम्मान मिल्हिन। तबेकमारे ओइने ख्रीष्ट के हुइहीँ कहिके पता लगैना कोशिस करलाँ। और असिन कब हुई कहिके पत्ता लगाई खोज्लाँ। 12 पर परमेश्वर उ अगमवक्तनहे कलाँ कि तुहुरिन्के यी सन्देश तुहुरिन्के अपन लग नै हो, पर दोसुर जहनके लग हो। उ सन्देश येशू ख्रीष्टके बारेमे खुशीक खबर हो, जोन खुशीक खबर तुहुरे अब्बे सुनल बतो। परमेश्वर स्वर्गमेसे अपन पवित्र आत्माहे तुहुरे मनैनहे खुशीक खबर प्रचार करे सेको कहिके सहयोग करक लग पठैलाँ। यी सक्कु अतरा अचम्मक बा कि स्वर्गदूतनके फेन उत्सुकतासे यी बात हुइलक हेरतताँ।

13 तबेकमारे तुहुरे का करतो कहिके मजासे सोँचो, और अपनहे नियन्त्रण करो। मुक्ति भेटैना आशा करो, जोन मुक्ति अनुग्रहसे आइत, जोन मुक्ति तुहुरिन्हे येशू ख्रीष्ट यी संसारमे फिर्ता अइलक दिनमे देजाई। 14 अपन दाईबाबक आज्ञा पालन करुइया मजा लर्कनके हस तुहुरे फेन परमेश्वरके आज्ञा पालन करो। तुहुरे परमेश्वरके सच्चाई नै जानल समयमे अपन इच्छा अनुसार कर्ती रहल खराब काम आब तुहुरे ना करो। 15 पर आब तुहुरे अपन करना हरेक बातमे पवित्र हुई परत, जसिके परमेश्वर पवित्र बताँ, जे तुहुरिन्हे अपन लरका बनाइक लग चुन्लाँ।

16 काकरेकी पवित्र शास्त्रमे असिके लिखल बा, "तुहुरे पवित्र हुई परत, काकरेकी मै पवित्र बतुँ।"

17 परमेश्वर हरेक मनैनके कर्लक कामके बारेमे जन्थाँ। और ऊ हरेक जहनके बिना पक्षपात कर्ले न्याय करथाँ। जब तुहुरे परमेश्वरसे प्राथना करथो, तब तुहुरे हुँकिन्हे बाबा कथो। ओसिक हो कलेसे सदादिन हुँकिन्हे आदर करो। जबसम तुहुरे यी धर्तीमे परदेशीनके हस अपरिचित होके रबो। 18 तुहुरिन्हे पता बा कि बितल समयमे तुहुरे वहे बेकार तरिकासे जीवन बिताइतोहो, जोन तरिकासे तुहुरिन्से आघेक जिअल मनै जीवन बिताइँत। पर तुहुरे उ बेकारके जीवनसे बँचागिल बतो। तुहुरे सोन अथवा चाँदी जसिन नाश होजिना चिजसे नै किनगिल हुइतो। 19 पर परमेश्वर तुहुरिन्हे ख्रीष्टके बहुमूल्य खुनेलेके किन्लाँ। जे हमार पापके लग बलिक रुपमे मुलाँ। हुँकार मृत्यु हमार लग सिद्ध बलि रहे। जसिके यहूदी पुजारीनके बलि चह्रैना पथरु बिना दागके अथवा बिना दोषके सिद्ध रहिन। 20 यी संसारके सृष्टि हुइनासे पैलेहेँ, येशू ख्रीष्ट मुक्तिदाता हुइहीँ कहिके परमेश्वर समयसे पैलेहेँ वाचा कर्ले रहिँत। पर येशू अन्तिम समयमे यी संसारमे तुहुरिन्हे सहायता करक लग अइलाँ।

21 काकरेकी ख्रीष्टके कर्लक कामके कारण तुहुरे अब्बे परमेश्वरहे विश्वास करथो। और तुहुरे अपन विश्वास और आशा परमेश्वरकेमे धर्ले बतो। काकरेकी परमेश्वर ख्रीष्टहे मुअलमेसे फेनदोस्रे जिवादेलाँ, और हुँकिन्हे बरवार महिमा देलाँ।

22 काकरेकी सच्चाइक पालना करके तुहुरे शुद्ध हुइल बतो। आब तुहुरे निष्कपट रुपसे अपन विश्वासी संघरियनहे प्रेम करे परी। एकदोसर जहनहे निष्कपटतासे अपन जिउ-ज्यानसे प्रेम कर्ती रहो। 23 काकरेकी तुहुरे परमेश्वरसे लावा जीवन भेटैले बतो। तुहुरे यी जीवन नाश होजिना चिजसे नै भेटैले हुइतो, पर हरदम पलिरना चिजसे भेटैले बतो। हम्रे यी लावा जीवन जित्ती और सदाकालके परमेश्वरके वचनसे भेटाइल बती। 24 काकरेकी पवित्र शास्त्रमे असिके लिखल बा,

"सक्कु मनै घाँस जसिन हुइँत,

और ओइन्के सक्कु गौरव घाँसक फूला हस हुइतिन।

घाँस सुख जाई,

और फूला भुइयाँमे झरजाई,

25 पर प्रभुक वचन सदासर्वदा पलिरहत।"

और तुहुरिन्हे प्रचार करगिलक खुशीक खबरके वचन यहे हो।