1 तबेकमारे ख्रीष्ट अपन शरीरमे रहलमे दुःख भोग्लाँ, और तुहुरे फेन हुँकार हस विचार धारके दुःख भोग्ना तयार हुई परत। काकरेकी यदि तुहुरे ख्रीष्टके लग दुःख भोग्ना इच्छा करथो कलेसे तुहुरे पाप करे छोरना निर्णय कर्ले बतो। 2 परिणामके रुपमे उ मनैया यी धर्तीमे अपन बाँकी जीवन अपने पापसे भरल इच्छाहे पूरा करके नै जिई। पर ऊ परमेश्वरके चाहल काम करी। 3 गैल समयमे तुहुरे अविश्वासीनहे मन परना काम करके बहुत्ते समय बर्बाद कर सेक्लो। तुहुरिन्के जीवन अनैतिकता, अभिलाषा, खाना, जाँर-दारु पिके, मौजमज्जामे और मूर्तिहे पुज्ती बितल, जिहिहे परमेश्वर घृणा करथाँ। 4 तबेकमारे तुहुरिन्के पुरान संघरियन अचम्म मन्थाँ, कि जब तुहुरे ओइन्के खराब काममे शामिल नै हुइथो। तबेकमारे ओइने तुहुरिन्के बारेमे नै मजा बात बत्वैथाँ। 5 पर एक दिन पक्कै ओइन्हे फेन परमेश्वरके आघे न्यायक लग ठरह्याई पर्हिन। और परमेश्वर उ सक्कुहुनहे धर्तीमे कर्लक कामके बारेमे पुँछ्हीँ। परमेश्वर मुअल और जित्ती दुनु मनैनके न्याय करहीँ। 6 तबेकमारे मुअल मनै फेन खुशीक खबर सुन्लाँ। ओइन्के शरीर दोसुर मनैनके हस मुए पर्लिन। पर आब ओइने सदामान परमेश्वरके संग आत्मामे जिअतताँ। 7 सक्कु बातके अन्त्य लग्गेहेँ आगिल बा। तबेकमारे तुहुरे एकदम फरछ्वार रुपमे सोँचो, और अपनहे नियन्त्रण करो, ताकि तुहुरे प्राथना करे सेको। 8 सक्कुहुनसे खास बात यहे हो कि तुहुरे एकदोसर जहनहे प्रेम करो। काकरेकी यदि तुहुरे मनैनहे प्रेम कर्बो कलेसे तुहुरे हरदम ओइन्के कर्लक कौनो फेन पापी कामहे माफ करक लग तयार रबो। 9 मनैनहे तुहुरे अपन घरेमे कौनो गुनासो बिना कर्ले स्वागत करो। 10 हरेक मनैनहे परमेश्वर वरदान देले बताँ। और ओइने उ वरदान दोसुर जहनहे सहयोग करना काममे प्रयोग करे परत। परमेश्वरके मजा सेबक बनो, और परमेश्वरके देहल बरदानहे मजासे प्रयोग करो। 11 उदाहरणके लग, यदि तुहुरिन्के थेन प्रचार करना वरदान बा कलेसे परमेश्वरके वचन प्रचार करे परत। यदि तुहुरिन्के थेन दोसुर मनैनहे सहयोग करना वरदान बा कलेसे परमेश्वर तुहुरिन्हे देलक क्षमता अनुसार तुहुरे सहयोग करो। तब तुहुरे ज्या चिज फेन करबो, उहिसे येशू ख्रीष्टके माध्यमसे परमेश्वरहे महिमा मिल्हिन। सक्कु महिमा और शक्ति हरदम हुँकारे हो! आमेन! (यकर मतलब हुइत, अस्तेहेँ होए।)

12 हे मोरिक प्रिय संघरियन, तुहुरिन्के भोग्ती रहल दुःख लग्ना बातके बारेमे अचम्म ना मानो। काकरेकी तुहुरे ख्रीष्टके हुइतो। पर यी बात यी देखाइक लग हुइता कि तुहुरे जात्तिकमे परमेश्वरहे विश्वास करथो कि नै करथो। तबेकमारे असिके ना सोँच्हो कि तुहुरिन्के संग कुछु अचम्म हुइता। 13 यकर बारेमे तुहुरे खुशी होऊ, काकरेकी तुहुरे ख्रीष्टके भोग्लक दुःखमे शामिल हुइल बतो। तबेकमारे जब ख्रीष्ट सक्कु मनैनहे अपन महिमा देखाइक लग फेनदोस्रे अइहीँ, तब तुहुरिन्के आनन्द जात्तिकमे बरवार हुई। 14 यदि ख्रीष्टके नाउँमे तुहुरिन्के बेज्जत हुई कलेसे तुहुरे धन्यके हुइतो। काकरेकी महिमित परमेश्वरके आत्मा तुहुरिन्केमे बास कर्थिन। 15 पर तुहुरिन्मेसे केऊ फेन हत्यारा, या चोर, या खराबी करुइया, या दोसुर जहनके मामलामे हाँथ दरुइयनके हस दुःख ना भोगो। 16 पर केऊ ख्रीष्टियन हुइलक कारण दुःख भोगत कलेसे ऊ लाज ना माने। पर विश्वासी हुइलक कारण ऊ परमेश्वरहे धन्यवाद देहे। 17 काकरेकी न्याय परमेश्वरके परिवारमेसे सुरु हुइना समय आगिल बा। काकरेकी ऊ सुरुमे हम्रे विश्वासीनके न्याय करहीँ। और तुहुरे उ डरलग्तिक चिजके बारेमे सोँचो जोन उ मनैनहे हुइहिन, जेने परमेश्वरके ओहोँरसे अइना खुशीक खबरहे नै मन्थाँ।

18 जसिके पवित्र शास्त्रमे लिखल बा,

"मजा मनैनहे फेन आघे दुःख भोगे पर्थिन, और ओकर पाछे किल उहिहे मुक्ति मिल्थिस। कलेसे,

तबेकमारे अधर्मी और पापी मनैनहे पक्कै फेन परमेश्वरसे बहुत कर्रा दण्ड भोगे पर्हिन!"

19 तबेकमारे परमेश्वरके इच्छा अनुसार जब केऊ दुःख भोगत, और जीवन देहुइया परमेश्वरहे भरोसा कर्ले पलिरहत। तब ओकर लग परमेश्वर हरदम अपन वाचा कर्लक बात पूरा करथाँ। तबेकमारे तुहुरे मजा काम कर्ती रहो।