1 निष्कर्षमे, हे मोरिक विश्वासी भैयो, हम्रे तुहुरिन्हे बिन्ती करती और तुहुरिन्हे येशू ख्रीष्टमे सम्झाइती कि तुहुरे असिके जीवन जिओ, जिहिसे परमेश्वर खुशी हुइथाँ, जसिके हम्रे तुहुरिन्हे सिखाइल बती। तुहुरे पैलेहेँसे असिके जिअतो और हम्रे तुहुरिन्हे अस्तेहेँके करक लग आकुर फेन उत्साहा देहती। 2 तुहुरे जन्थो कि जोन आदेश हम्रे तुहुरिन्हे देली, उ आदेश प्रभु येशूक थेनसे आइल।

3 परमेश्वरके इच्छा यहे बतिन कि तुहुरे पवित्र बनो और व्यभिचार ना करो। 4 तुहुरिन्मेसे हरेक जाने अपन शरीरहे नियन्त्रण करे सिखे परत, असिन चिजके हस जोन चिजहे पवित्र और आदरसे देखजाइत। 5 और परमेश्वरहे नै चिहिन्ना अविश्वासी मनैनके हस तुहुरे अपन कामुक्तक इच्छक गुलाम ना बनो। 6 असिके करके तुहुरिन्हे अपन विश्वासी भैयक विरोधमे पाप करे नै परत, और ना ते ओकर फाइदा उठैना चाही। काकरेकी प्रभु येशू ओइन्हे दण्ड दिहीँ जेने असिन सक्कु काम करथाँ, जोन काम ना करहो कहिके हम्रे तुहुरिन्हे पहिले फेन चेतावनी देले रही। 7 काकरेकी परमेश्वर हम्रिहिन्हे अशुद्ध जीवन जिअक लग नै, पर पवित्र जीवन जिअक लग बलैले बताँ। 8 तबेकमारे जे यी आदेशहे अस्वीकार करत कलेसे ऊ मनैयाहे नै होके परमेश्वरहे अस्वीकार करत, जे अपन पवित्र आत्मा तुहुरिन्हे देहत। 9 पर विश्वासी भैयनकेमे कर्लक प्रेमके बारेमे तुहुरिन्के लग लिखे परना मोरिक कौनो जरुरी नै हो। काकरेकी एकदोसर जहनहे प्रेम करना तुहुरे अप्निहीँ परमेश्वरसे सिख्लो। 10 तुहुरे पैलेहेँसे विश्वासी भैयनकेमे अपन प्रेम देखैले बतो, जेने माकेडोनिया प्रदेशमे रथाँ। पर हे मोरिक विश्वासी भैयो, मै तुहुरिन्हे बिन्ती करतुँ कि तुहुरे आकुर बहरती जाऊ। 11 और जसिके हम्रे तुहुरिन्हे आज्ञा देले बती, ओस्तेहेँके तुहुरे शान्तिसे अपन जीवन जिओ। और दोसुर जहनके मामलामे हस्तक्षेप ना करो, और अपने हाँथेलेके मेहनत करो। 12 ताकि तुहुरे हरेक दिन कसिन व्यवहार देखैथो कहिके उ मनै देखिँत, जेने विश्वास नै करथाँ, ओइने तुहुरिन्के आदर करिँत। तब तुहुरिन्हे अपन जरुरी पूरा करक लग केक्रोमे निर्भर हुई नै परी।

13 हे मोरिक विश्वासी भैयो, हम्रे चहथी कि तुहुरे यी जानलेऊ कि उ विश्वासीनके संग का हुइहिन, जेने पैलेहेँ मुसेकल बताँ। ताकि असिन ना होए, कि तुहुरे फेन दोसुर अविश्वासी मनैनके हस शोक मनाऊ। जेनहे आशा नै हुइतिन, कि मुके सेकके ओइने फेनदोस्रे जित्ती होजिहीँ।

14 काकरेकी यदि हम्रे विश्वास कर्थी कि येशू मुलाँ और फेनदोस्रे जिगिलाँ कलेसे ओस्तेहेँके उ विश्वासीनहे फेन परमेश्वर येशूक संग फिर्ता नन्हीँ, जेने पैलेहेँ मुसेकल बताँ।

15 काकरेकी हम्रे प्रभु येशूक वचन अनुसार तुहुरिन्हे यी कथी कि जब प्रभु येशू फेनदोस्रे फिर्ता अइहीँ। तब जोन विश्वासीन पैलेहेँ मुसेकल बताँ, ओइने हम्रिहिन्से आघे येशूसे भेँटा हुइहीँ।

16 काकरेकी प्रभु येशू ख्रीष्ट अप्निहीँ स्वर्गमेसे उत्रिहीँ। उ समयमे येशू बरवार आवाजमे आदेश दिहीँ, और प्रधान स्वर्गदूत जोरसे बोली, और परमेश्वरके तुरही फुँकजाजाई। और पहिले ओइने जित्ती होके उठ्हीँ, जोन विश्वासीन मुसेकल बताँ।

17 तब् हम्रे जेने जित्ती और बँचल रबी, हम्रे फेन ओइन्के संग बद्रीमे उठाजिबी। और हमार भेँटा आकाशमे प्रभु येशूसे हुई, और उ समयसे सदादिन हम्रे प्रभुक संग रबी।

18 तबेकमारे यी बातसे तुहुरे एकदोसर जहनहे उत्साहा देती रहो।