1 हे मोरिक प्रिय संघरियन, मै यी दुनु चिट्ठी तुहुरिन्के लग लिखल बतुँ ताकि मै तुहुरिन्हे पैलेहेँ सिख्लक बातहे याद कराई सेकुँ, और तुहुरिन्के मनमे सफा विचार जगाई सेकुँ। 2 मोरिक उद्देश्य यहे हो कि तुहुरे पहिलेक पवित्र परमेश्वरके अगमवक्तनके बोल्लक वचन याद करो। और हमार प्रभु येशू और मुक्तिदातक देहल आज्ञा फेन याद करो। तुहुरे हुँकार आज्ञा हम्रिहिन्से सुन्लो, हुँकार निउतरह्यन जेने तुहुरिन्के थेन यी सन्देश नन्लाँ।

3 सक्कुहुनसे खास बात यी हो कि तुहुरिन्हे यी बुझे परना बा कि अन्तिम दिनसे ठिक आघेक दिन ओइन्केमे कुछ मनै देखा परहीँ, जेनके जीवन अपने खराब इच्छासे नियन्त्रित रथिन। ओइने तुहुरिन्के मजाक उरैहीँ, काकरेकी तुहुरे ख्रीष्टके फेनदोस्रे फिर्ता अइना बातमे विश्वास करथो। 4 और ओइने कहिहीँ, "ऊ फिर्ता अइना वाचा ते कर्ले बताँ, पर ऊ नै आइल हुइँत। काकरेकी हमार पहिलेक अगुवन सक्कु जाने मुगिलाँ, पर अभिन फेन कुछु नै बद्लल हो। जबसे परमेश्वर संसारके सृष्टि कर्ले बताँ, तबसे सक्कु चिज जसके तस चल्तीबताँ।" 5 ओइने जानबुझके यी सच्चाईहे बेवास्ता करथाँ कि सृष्टिक सुरुमे परमेश्वर बोल्लाँ, और आकाशके सृष्टि हुइल। ऊ अपन वचनसे धर्तीहे पानीमेसे अलग करलाँ, और पानीहे एक ठाउँमे करके सुखल जमिनहे बाहेर निकरलाँ। 6 वहे पानीसे परमेश्वर संसारहे नाश करलाँ, जोन संसार उ समय अस्तित्त्वमे रहे। ऊ बरवार पानी पठैलाँ और यिहिसे धर्तीमे सैलाब आइल, और सक्कु जित्ती प्राणी नाश होगिलाँ।

7 पर परमेश्वर वहे वचनसे स्वर्ग और पृथ्वीहे अभिन फेन अस्तित्त्वमे धर्ले बताँ, ताकि ओइन्हे ऊ आगीलेके नाश करे सेकिँत। हुँकार आज्ञा नै मनुइया मनैनहे ऊ न्यायक लग और नाश करना दिनके लग धर्ले बताँ।

8 पर प्रिय हो, जात्तिकमे यी बात ना बिसराऊ, परमेश्वरके लग एक दिन हजार साल हस और हजार साल एक दिन हस रथिन। हुँकिन्हे एक दिन और एक हजार दिन सक्कु एक्के हस रथिन। 9 कौनो मनै सोँच्थाँ कि प्रभु अपन फिर्ता अइना वाचा पूरा करनामे बेर करतताँ। पर प्रभु उ मेरसे बेर नै करथुइँत। बेन ऊ तुहुरिन्हे धैर्यता देखाइतताँ। काकरेकी ऊ केऊ फेन नाश ना होए कहिके चहथाँ। पर सक्कु जाने अपन मन बदलके पाप करे छोरदिँत कना ऊ चहथाँ।

10 पर ख्रीष्ट पक्कै फेन घुमके अइहीँ। ऊ चोरनके हस नै सोँचल समयमे फिर्ता अइहीँ। उ समयमे आकाशमे बरवार आवाज आई, और आकाश हेराजाई। आकाशमे रहल सूर्य, जोन्ह्याँ और तोरैयाँ आगीलेके पूरा रुपमे नाश होजिहीँ। उ दिन, मनैनके पृथ्वीमे कर्लक सक्कु काम ओइन्के न्याय करक लग परमेश्वर देखैहीँ।

11 यी बात पक्का बा कि परमेश्वर असिके सक्कु चिजहे नाश करदिहीँ। तुहुरिन्हे पता बा कि तुहुरिन्हे कसिके जीवन जिए परत। तुहुरिन्के व्यवहार और तुहुरिन्के करना सक्कु काम पवित्र और परमेश्वरहे खुशी बनैना हुई परत। 12 तुहुरे उ दिनके प्रतिक्षा करेबेर, जब परमेश्वर संसारके न्याय करे अइहीँ, उ दिन झत्तेहेँ आए कहिके अपन सेक्ना कोशिस करो। उ दिन आगी बरी और आकाशहे नाश करदी, और आगीक आँचलेके आकाशमे रहल सक्कु चिज गलादी। 13 पर हम्रे विश्वासीन परमेश्वरके वाचा कर्लक लावा स्वर्ग और लावा पृथ्वीक डगर हेर्थी। वहाँ सक्कु ठाउँ मनै परमेश्वरके इच्छा अनुसार जिथाँ।

14 तबेकमारे हे मोरिक प्रिय संघरियन, परमेश्वर संसारके न्याय करना दिनके प्रतिक्षा करेबेर तुहुरे पवित्र और खोट नै रहल हुइक लग और हुँकार संग शान्तिमे बैठ्ना अपन पूरा कोशिस करे परत।

15 यकर बारेमे सोँचो, हमार प्रभु धैर्यवान बताँ, ऊ तुहुरिन्हे मुक्ति भेटैना और अइना न्यायसे बँच्ना मौका देहतताँ। हमार प्रिय विश्वासी भैया पावल फेन परमेश्वर उहिहे देना बुद्धिक प्रयोग करके यी बात तुहुरिन्हे एकथो चिट्ठीमे लिखल रहे। 16 ऊ विश्वासीनहे लिख्लक ओकर सक्कु चिट्ठीमे, ऊ वहे बात लिखल, जोन बात ऊ तुहुरिन्हे लिखल रहे। पर ओकर चिट्ठीमे लिख्लक कौनो-कौनो बात बुझ्ना कर्रा बा। जोन मनै पह्रललिखल नै हुइँत, और जेने विश्वासमे पक्का नै हुइँत। ओइने यी बातहे फेन ओस्तेहेँके गलत तरिकासे व्याख्या करथाँ, जसिके ओइने पवित्र शास्त्रमे रलक दोसुर खण्डहे व्याख्या करथाँ। असिके ओइने अप्निहीँ परमेश्वरसे नाश हुइना कारण बन्थाँ।

17 तबेकमारे हे मोरिक प्रिय संघरियन, तुहुरिन्हे पैलेहेँ पता बा कि यी बात का हुइँत। तबेकमारे हौश्यार रहो, ताकि नियम कानुन पालन नै करुइया मनै झूँट बोलके तुहुरिन्हे दोधारमे ना पारिँत। यदि तुहुरे ओइन्के अनुशरण कर्बो कलेसे तुहुरे सच्चा बातमे विश्वास करना बन्द करदेबो। 18 पर लगातार तुहुरे हमार प्रभु और मुक्तिदाता येशू ख्रीष्टके अनुग्रह धेउरसे धेउर अनुभव कर्ती रहे परत, और हुँकार बारेमे ज्ञानमे बह्रे परत। हुँकिन्हे अब्बे और सदादिन महिमा होए। आमेन! (यकर मतलब हुइत, अस्तेहेँ होए।)