1 मै पावल यी चिट्ठीहे लिखतुँ। परमेश्वर महिन्हे यी कारणसे चुन्लाँ कि मै ख्रीष्ट येशूक निउतरह्या बनुँ, ताकि मै यी सन्देशहे प्रचार करे सेकुँ कि परमेश्वर सदाकालके जीवन देहक लग वाचा कर्ले बताँ। उ जीवन येशू ख्रीष्टके संग हम्रे एकतामे रलेसे आइत। 2 हे तिमोथी, मै तुहिन्हे यी चिट्ठी लिखतुँ, और तुँ मोरिक लग एकथो दुलार छावा हस हुइतो। मै प्राथना करतुँ कि परमेश्वर बाबा और हमार प्रभु येशू ख्रीष्ट तोहाँरमे अनुग्रह करिँत, और दया और शान्ति तुहिन्हे मिल्ती रहे।
विश्वासयोग्य पलिरना प्रोत्साहन
3 जबफेन मै परमेश्वरसे प्राथना करथुँ, तब हरदम मै तोहाँर नाउँ लेके तोहाँरिक लग प्राथना करथुँ, और तोहाँर लग परमेश्वरहे धन्यवाद देथुँ। यी वहे परमेश्वर हुइँत, जेकर आराधना शुद्ध विवेकसे मै और मोरिक पुर्खन कर्ली। 4 जब मै तुहिन्हे छोरके दूर जाइतुहुँ, तब तुँ कतरा रुइल रहो कहिके महिन्हे याद पलि बा। मै तुहिन्हे भेँटा करे चहथुँ। काकरेकी जब हम्रे भेँटा हुइबी, तब महिन्हे बहुत खुशी लागी। 5 तोहाँरिक दाई युनिसके येशू ख्रीष्टमे रहल सच्चा विश्वासके बारेम महिन्हे याद बा। तोहाँर नानी लोइसकेमे फेन ओस्तेहेँ विश्वास रहिन, और महिन्हे विश्वास बा कि तोहाँर थेन फेन ओस्तेहेँ विश्वास बा। 6 तबेकमारे मै तुहुरिन्हे याद कराइतुँ, कि उ वरदानहे फेनदोस्रे निखारो, जोन वरदानहे परमेश्वर तुहिन्हे तब्बेहेँ दैदेले रहिँत, जब मै तोहाँर मुन्टामे अपन हाँथ धारल रहुँ। 7 काकरेकी परमेश्वर हम्रिहिन्हे डरपोँक नै बनैलाँ, बेन हुँकार आत्मा हमार मनहे बल्गर बनैथिन। हम्रिहिन्हे दोसुर जहनहे प्रेम करक लग सहायता करथाँ, और हम्रिहिन्हे अपनहे अप्निहीँ नियन्त्रण करे सेक्ना शक्ति देथाँ। 8 तबेकमारे दोसुर मनैनहे प्रभु येशू ख्रीष्टके बारेमे बताइक लग ना लजाऊ। और ना ते तुँ यी बातमे लजैहो कि मै हुँकार सेवा कर्लक कारण झेलमे बतुँ। बेन तुँ उ शक्तिक प्रयोग करहो। जोन शक्ति परमेश्वर तुहिन्हे देथाँ। और खुशीक खबरके लग जोन दुःख मै सहतुँ ओम्ने तुँ महिन्हे साथ देऊ। 9 परमेश्वर हम्रिहिन्हे मुक्ति देलाँ। और हम्रिहिन्हे पवित्र जीवन जिअक लग बलैलाँ। हम्रे मजा काम कर्ली कहिके ऊ हम्रिहिन्हे नै बलैलाँ। पर अपन योजना और उ अनुग्रहक अनुसार बलैलाँ। परमेश्वर यी संसारहे बनैनासे आघे येशू ख्रीष्टहे यी संसारमे पठाके अपन कृपा देखैना योजना पैलेहेँसे बनालेले रहिँत। 10 पर आब हमार मुक्तिदाता येशू ख्रीष्ट आगिल बताँ और हम्रिहिन्हे अपन अनुग्रह देखैले बताँ। मृत्युक शक्तिहे ऊ नाश करदेले बताँ, और हम्रिहिन्हे देखैले बताँ कि खुशीक खबरके माध्यमसे सदाकालके जीवनके लग एकथो डगर बा। और हम्रे उ शरीरमे सदाकालके लग जित्ती रबी जोन शरीर कबु नै सरी। 11 यहे खुशीक खबरके लग प्रचारकके रुपमे परमेश्वर महिन्हे चुन्ले बताँ, और निउतरह्या और गुरुक रुपमे फेन महिन्हे चुन्ले बताँ। 12 मै प्रभु येशू ख्रीष्टके बारेमे मनैनहे प्रचार करथुँ, तबेकमारे मै फेन झेलमे दुःख सहतुँ। पर यी बातसे महिन्हे लाज नै हो। काकरेकी मै ख्रीष्टहे चिहिन्थुँ, जेकरमे मै भरोसा कर्ले बतुँ। और महिन्हे पक्का विश्वास बा कि जबसम ख्रीष्ट फिर्ता नै अइहीँ, तबसम परमेश्वर उ चिजहे रक्षा करहीँ, जोन चिज ऊ महिन्हे देले बताँ। 13 पक्का करो कि तुँ उ सच्चा शिक्षाहे नमूना हस सम्हारके धर्ले रबो, जोन शिक्षा तुँ महिन्से सुन्ले बतो। और असिके तुँ विश्वास और प्रेमसे करहो, काकरेकी तुँ ख्रीष्ट येशूक संग एकतामे बतो। 14 और हमारमे रना पवित्र आत्मक माध्यमसे तुहिन्हे देगिलक सच्चाइक रक्षा करो। 15 तुँ जन्थो कि एशिया प्रदेशमे रहुइयन बहुत्ते विश्वासीन महिन्हे छोरदेले बताँ, ओम्नेमेसे फुगेलस और हर्मोगेनस हुइँत। 16 ओनेसिफरसके घरानाहे प्रभु दया करिँत, काकरेकी ऊ महिन्हे भेँटा करे आइल, और बहुत्तेचो महिन्हे सहायता करल। और झेलमे महिन्हे भेँटा करे अइनामे ऊ नै लजाइल। 17 पर जब ऊ रोम शहरमे आइल, तब महिन्हे ऊ सक्कु ठाउँमे खोजल और महिन्हे भेँटा करल। 18 न्यायक दिन ओनेसिफरसहे प्रभु अपन महान दया देखाँइत। तुँ मजासे जन्थो कि ऊ एफिसस शहरमे महिन्हे कतरा सहायता करल।