1 आब मोरिक कहल बातमे ध्यान देऊ, कि यी संसारके अन्तिम दिनमे महा कर्रा-कर्रा समय आई। 2 काकरेकी मनै अपनहे किल माया करहीँ। रुपिया-पैँसक लाल्ची रहिहीँ। अपनहे अप्निहीँ सक्कुहुनसे भारी मन्हीँ। घमण्ड करहीँ। परमेश्वरके निन्दा करहीँ। दाई-बाबनके कलक नै मन्हीँ। दोसुर जहनके गुन कर्लक बिस्राजिहीँ। परमेश्वरके आदर नै करहीँ। 3 दोसुर जहनहे नै सोगैहीँ। दोसुर जहनहे माफ नै करहीँ। दोसुर जहनहे दोष लगैहीँ। ओइन्के विवेकमे खराब-खराब विचार रहिहीन। खत्थाहा रहिहीँ। मजा कामहे घृणा करहीँ। 4 दोसुर जहनसे विश्वासघात करहीँ। लापरवाही करहीँ। और घमण्डी रहिहीँ। और परमेश्वरहे प्रेम नै करहीँ, पर सुख-विलासहे रोजिहीँ। 5 ओइने परमेश्वरहे देखावती सम्मान करहीँ। पर परमेश्वरके शक्ति ओइन्के खराबसे ओइन्के जीवनहे बदलना बातहे ओइने अस्वीकार करहीँ। असिन मनैनसे कौनो मेरिक सम्बन्ध ना धरहो। 6 असिन काम करुइया मनैनमेसे कौनो-कौनो मनै दोसुर जहनके घर जैथाँ, और मूर्ख जन्नी मनैनहे पूरा रुपमे कब्जा करलेथाँ। जोन जन्नी मनैनके मन ओइन्के पापके कारण बोझसे डबल रथिन, और जेने सक्कु मेरिक इच्छक अधिनमे रथाँ। 7 उ जन्नी मनै हरदम लावा-लावा बात सिख्ती रथाँ। पर ओइने ख्रीष्टके बारेमे सच्चा शिक्षाहे कबु नै बुझे सेक्थाँ। 8 यी झूटा शिक्षा देहुइयन सच्चाइक विरोध करथाँ, जसिके यान्नेस और याम्ब्रेस मोशक विरोध कर्ले रहिँत। ओइन्के दिमाग भ्रष्ट बतिन। और ओइने जात्तिकमे ख्रीष्टकेमे भरोसा नै करथाँ। 9 पर ओइन्के सफलता थोरचुन समयक लग किल रहिहीन। काकरेकी जसिके यान्नेस और याम्ब्रेस मूर्ख रहिँत कहिके मनै जानलेले रहिँत। ओस्तेहेँके हरेक जाने यने मूर्ख बताँ कहिके जानलिहीँ।

10 पर हे तिमोथी, तुँ पक्कै फेन जन्थो कि मै का सिखैथुँ। और कसिके जिथुँ, मोरिक जीवनके लक्ष्य का हो, और मै केम्ने विश्वास करथुँ। तुँ जन्थो कि मै सहथुँ। और सक्कुहुनहे प्रेम करथुँ। मै कर्रा समयहे सहल बतुँ। 11 महिन्हे मनै सतैलाँ, ओकर कारण मै खोब दुःख सहनु। और तुँ उ डरलग्तिक बातके बारेमे जन्थो, जोन बात मनै महिन्हे एन्टिओखियामे, आइकोनियनमे और लुस्त्रा शहरमे करलाँ। और कसिके मै वहाँ सतावटहे सहनु। तभुन फेन उ सक्कुहुनसे प्रभु महिन्हे छुटैलाँ। 12 तुँ मजासे जन्थो कि मनै उ सक्कु मनैनहे सतैहीँ, जेने ख्रीष्ट येशूक अनुयायीनके रुपमे जीवन जिए चहथाँ। 13 और खराब और धोखा देहुइया मनै आकुर धेउर दुष्ट काम करहीँ। ओइने दोसुर मनैनहे धोखा दिहीँ, और अप्ने फेन दोसुर मनैनसे धोखा खैहीँ। 14 हे तिमोथी, जोन बात मनै तुहिन्हे सिखैलाँ जेनकेमे तुँ विश्वास करथो, उ बातहे विश्वासयोग्यसे पकरले रहहो। तुहिन्हे पता बा कि यी सच्चा बात तुहिन के सिखाइल। 15 जब तुँ छुटिमुती लौँदा रहो, तब्बेहेँसे तुँ पवित्र शास्त्रहे पहरलो, जिहिसे तुहिन्हे यी बुझक लग सहायता हुइत कि जब तुँ ख्रीष्ट येशूमे विश्वास करथो, तब परमेश्वर तुहिन्हे बँचैथाँ। 16 सारा पवित्र शास्त्र परमेश्वरके ओहोँरसे हो। मनैनहे सच्चा सिद्धान्त सिखाइक लग, गलत काम करुइया मनैनहे चेतावनी देहक लग, मनैनके नेंग्ना गलत डगरहे सुधारक लग, एकथो मजा जीवन कसिके जिए परत कहिके मनैनहे देखाइक लग हम्रे यी पवित्र शास्त्रमे लिखल बातके प्रयोग करे सेक्थी। 17 ताकि परमेश्वरके सेवा करुइया मनैया सक्कु मेरके मजा काम करक लग तयार और सिपार हुई सेके।