15 जब तुँ छुटिमुती लौँदा रहो, तब्बेहेँसे तुँ पवित्र शास्त्रहे पहरलो, जिहिसे तुहिन्हे यी बुझक लग सहायता हुइत कि जब तुँ ख्रीष्ट येशूमे विश्वास करथो, तब परमेश्वर तुहिन्हे बँचैथाँ। 16 सारा पवित्र शास्त्र परमेश्वरके ओहोँरसे हो। मनैनहे सच्चा सिद्धान्त सिखाइक लग, गलत काम करुइया मनैनहे चेतावनी देहक लग, मनैनके नेंग्ना गलत डगरहे सुधारक लग, एकथो मजा जीवन कसिके जिए परत कहिके मनैनहे देखाइक लग हम्रे यी पवित्र शास्त्रमे लिखल बातके प्रयोग करे सेक्थी। 17 ताकि परमेश्वरके सेवा करुइया मनैया सक्कु मेरके मजा काम करक लग तयार और सिपार हुई सेके।