1 मै यूहन्ना, मण्डलीक अगुवा, यी चिट्ठी मोरिक प्रिय संघरिया गायसहे लिखतुँ, जिहिहे मै सच्चा प्रेम करथुँ। 2 हे मोरिक प्रिय संघरिया, मै यी प्राथना करतुँ, कि जसिके तोहाँर आत्मिक जीवन मजै चलता, ओस्तेके तुँ हरेक बातमे मजा रहो, और तोहाँर शरीर फेन बल्गरे पलिरहे। 3 काकरेकी जब कौनो-कौनो विश्वासी संघरियन आके हम्रिहिन्हे बतैलाँ कि कसिके तुँ विश्वासयोग्यतामे, सच्चाइसे जिअतो, तब मै गजब खुशी होगिनु। 4 जबफेन मै यी सुन्थुँ कि ओइने जेने मोरिक लरका हस बताँ, ओइने सच्चाइमे जिअतताँ, ते यी बात महिन्हे आकुर खुशी बनादेहत।

5 हे संघरिया, तुँ विश्वासयोग्यसे हमार विश्वासी संघरियन (जेने खुशीक खबर प्रचार करक लग प्रत्येक ठाउँमे यात्रा करतताँ) के सहायता करक लग बहुत्ते काम कर्ले बतो। यहाँसम कि तुँ उ मनैनहे फेन सहायता करथो, जिहिहे तुँ नै चिहिन्थो। 6 ओइन्मेसे कौनो-कौनो मनै (जेनहे तुँ सहायता कर्ले बतो) ओइने यहाँक मण्डलीक विश्वासीनहे बतैले बताँ, कि तुँ अपन विश्वासी संघरियनहे कतरा माया करथो। आब मै तुहिन्हे कहे चहथुँ कि जब ओइने तोहाँर थेनसे जैहीँ, और दोसुर ठाउँक यात्रा करहीँ, तब तुँ यी मनैनहे अस्तेहेँके सहायता कर्ती रहहो, जोन चिजके ओइन्हे जरुरी बतिन। काकरेकी यिहिसे परमेश्वर खुशी हुइथाँ। 7 काकरेकी यने प्रत्येक ठाउँमे यात्रा यहे कारणसे करतताँ, ताकि ओइने ख्रीष्टके नाउँहे मनैनके थेन चिन्हाई सेकिँत। और अविश्वासीनसे यने कौनो सहयोग नै लेथाँ। 8 तबेकमारे असिन मनैनहे अपन घरेम रहक लग स्वागत करे परत। और ओइन्हे ज्या चिजके जरुरी बतिन, उ चिज ओइन्हे देहे परत, ताकि हम्रे सच्चाइक लग ओइन्के काममे हिस्सा लेहे सेकी।

9 मै पहिले फेन तोहाँर मण्डलीक विश्वासीनहे एकथो चिट्ठी लिखल रहुँ। पर डियोत्रिफस मोरिक सल्लाहाहे माने नै चाहत। काकरेकी ऊ जबफेन अप्निहीँ मण्डलीक अगुवा बने चाहत। 10 तबेकमारे जब मै अइबुँ, तब मै मण्डलीक मनैनहे खुलके बात बत्वैम कि ऊ का-का करता। अर्थात ऊ हमारमे झूँटा काम कर्लक आरोप लगाइत। यकर संगसंगे ऊ यात्रा करुइया विश्वासीनके स्वागत करना नै मानत। और जे ओइन्हे स्वीकार करे चाहत, ओइन्हे ऊ रोकत। और यहाँसम कि ऊ ओइन्हे मण्डलीक सभामेसे बाहेर निकारदेहत। 11 हे मोरिक संघरिया, ओइन्के हस ना बनो जेने खराब काम करथाँ। पर ओइन्के अनुशरण करो, जेने मजा काम करथाँ। यदि जब केऊ मजा काम करत कलेसे ऊ यी जनाइत कि ऊ परमेश्वरके सन्तान हो। यदि केऊ खराब काम करत कलेसे ऊ यी जनाइत कि ऊ परमेश्वरहे नै चिन्हत। 12 मण्डलीमे जे फेन कहत कि डेमेत्रियस एकथो मजा मनैया हो। काकरेकी ऊ सच्चाइसे जिअत। और हम्रे फेन यी कथी कि ऊ एकथो मजा मनैया हो। और तुँ जन्थो कि हम्रे ज्या कहती उ सच्चा बा।

13 बहुत्ते बात बा, जोन मै तुहिन्हे बताई चहथुँ। पर उ बात मै असिके एकथो चिट्ठीमे लिखे नै चहथुँ। 14 पर महिन्हे आशा बा, कि मै तुहुरिन्के थेन आऊँ, और एक्के थेन होके बात बत्वाऊँ: 15 मै प्राथना करतुँ कि तुहिन्हे शान्ति मिल्ती रहे। यहाँक सक्कु विश्वासी संघरियन तुहिन्हे नमस्कार पठाइतताँ। वहाँक सक्कु संघरियनहे नमस्कार सुनादेहो।