ख्रीष्टमे आत्मिक आशिष
3 हमार प्रभु येशू ख्रीष्टके बाबा और परमेश्वरके प्रशंसा होए, जे हम्रिहिन्हे स्वर्गसे मिल्ना सक्कु मेरिक आत्मिक आशिष देले बताँ। यी ख्रीष्टके संगक हमार एकतक कारण सम्भव हुइल बा। 4 और ख्रीष्टके संगक हमार एकतक कारण परमेश्वर संसारहे बनैनासे पैलेहेँ ऊ हम्रिहिन्हे अपन हुइक लग रोजलेलाँ। ताकि हम्रे हुँकार नजरमे पवित्र और निर्दोष हुई सेकी।
5 काकरेकी परमेश्वर हम्रिहिन्हे प्रेम करलाँ, और ऊ पैलेहेँ असिन निर्णय लैलेले रहिँत कि येशू ख्रीष्टके कर्लक कामके कारण ऊ हम्रिहिन्हे अपन पुत्कारल लरका बनालिहीँ। परमेश्वर अपन खुशीसे और इच्छासे असिके करलाँ। 6 हम्रे महिमामय अनुग्रहक लग परमेश्वरहे धन्यवाद चह्राई। जोन अनुग्रह ऊ हम्रिहिन्हे फोकत्यामे देले बताँ। काकरेकी हम्रे हुँकार छावक संग जुरल बती।