1 पहिले जब तुहुरे ख्रीष्टहे विश्वास नै करल रहो, तब तुहुरे मुअल मनैनके हस रहो। तुहुरिन्के थेन उ जीवन नै रहे, जोन जीवन परमेश्वरके ओहोँरसे मिलत। काकरेकी तुहुरे पाप कर्लो और परमेश्वरके आज्ञाहे पालन नै कर्लो। 2 उ समयमे तुहुरे यी संसारके मनैनके तरिका अनुसार जिअतोहो। और तुहुरे वायुमण्डलमे भूत्वनकेमे राज करुइया शैतानके आज्ञा पालन करतोहो। जे अब्बे उ मनैनहे अपन अधिनमे करना कोशिस करता, जेने परमेश्वरके आज्ञा पालन नै करथाँ। 3 हम्रे फेन ओइनेहेन्के हस जिअतिही, और अपन पापी स्वभावके इच्छा पूरा करतिही। और हमार जोन काम फेन खराब इच्छा और विचार हम्रिहिन्हे करवाई चाहिँत, हम्रे उ काम करतिही। और औरे जहनके हस हम्रे फेन स्वभाविक रुपमे खराब रही, और परमेश्वरके दण्ड हमारमे परना रहे।

4 पर परमेश्वर बहुत दयालु बताँ; वहे हुँकार महान प्रेमके कारण ऊ हम्रिहिन्हे प्रेम करलाँ। 5 पाप कर्लक कारण हम्रे मुअल मनैनके हस रही। पर हमार सम्बन्ध ख्रीष्टके संग हुइलक कारण परमेश्वर जसिके ख्रीष्टहे मुअलमेसे जिवैलाँ, ओस्तेहेँके हम्रिहिन्हे फेन ऊ जीवन देलाँ। और परमेश्वर अपन अनुग्रहक कारण हम्रिहिन्हे बँचालेलाँ। 6 और काकरेकी परमेश्वर हम्रिहिन्हे ख्रीष्ट येशूक संग मुअलमेसे जिवैलाँ। और हम्रिहिन्हे ख्रीष्टके संग स्वर्गमे राज करना लायकके बनैलाँ। 7 परमेश्वर असिके यहे कारणसे करलाँ ताकि अइना दिनमे ऊ यी संसारके मनैनहे देखाई सेकिँत कि हुँकार अनुग्रह कतरा महान बतिन। ज्या जतरा ऊ हमार लग कर्ले बताँ, और येशूक संग एकतामे रहुइया हम्रिहिन्हे यी अनुग्रह देखैले बताँ।

8 काकरेकी जब तुहुरे विश्वास कर्लो ते परमेश्वर तुहुरिन्हे अपन अनुग्रहसे बँचालेलाँ। और तुहुरे अपनहे अप्निहीँ नै बँचैलो, बेन यी ते परमेश्वरके दान हो; 9 और यी तुहुरिन्के कर्लक मजा कामके कारण नै हो। तबेकमारे तुहुरिन्के थेन घमण्ड करना कौनो कारण नै हो। 10 काकरेकी येशू ख्रीष्टके संग एकतामे होके हम्रे लावा मनै होके मजा-मजा काम करी कहिके परमेश्वर हम्रिहिन्हे बनैलाँ। और हमार लग करना उ मजा काम परमेश्वर पैलेहेँसे तयार कर्ले बताँ।

11 तबेकमारे याद करो, कि तुहुरे जलमेसे गैर-यहूदी हुइतो। यहूदिनके तुहुरिन्हे असिके कहिके तुहुरिन्के मजाक उरैलाँ कि तुहुरे खतना नै करवैथो, पर ओइने भर खतना करवैथाँ। पर ओइन्के यी चलन ओइन्के शरीरमे किल लागू हुइथिन। 12 उ समयमे तुहुरे ख्रीष्टहे नै जानल रहो, और तुहुरे परमेश्वरके रोज्लक इजरायलके मनैनके हस नागरिकके रुपमे नै रहो। और तुहुरे परमेश्वरके मनैनके संग हुँकार वाचामे शामिल नै रहो। और आशा नै रहल और तुहुरे यी संसारमे बिना परमेश्वरके रहो।

13 एकथो समय रहे जब तुहुरे परमेश्वरसे दूर रहो। पर आब परमेश्वर तुहुरिन्हे उ खुनके माध्यमसे अपन लग्गे नानल बताँ, जोन खुन येशू ख्रीष्ट तुहुरिन्के लग बहैलाँ।

14 ख्रीष्ट अप्निहीँ हमार बिच्चेम शान्ति नानल बताँ। बितल समयमे यी असिन रहे, जसिके एकथो देवाल यहूदिनहे और गैर-यहूदिनहे अलग करदेले रहे। ओइने एकदोसर जहनहे घृणा करिँत। पर आब ख्रीष्ट उ देवालहे गिरादेले बताँ, और दुईथो समूहहे एक करदेले बताँ। 15 क्रूसमे मुके येशू ख्रीष्ट मोशक नियम कानुनहे और ओकर विधि-विधानहे खारेज करदेले बताँ। ताकि ऊ यहूदिनके और गैर-यहूदिनके बिच्चेम शान्ति बनाई सेकिँत, और एकथो लावा समूह बनाई सेकिँत। 16 असिके यहूदिनके और गैर-यहूदिनके बिच्चेम रहल दुश्मनीहे खतम करदेलाँ। क्रूसमे मुके येशू दुईथो समूहहे एक करदेलाँ, और अप्निहीँ ओइन्के मिलाप परमेश्वरसे कर्वादेलाँ। 17 और ख्रीष्ट आके परमेश्वरसे दूर रहल गैर-यहूदिनहे और परमेश्वरके लग्गे रलक यहूदिनहे, दुनु जहनहे मेल-मिलापके खुशीक खबर सुनैलाँ। 18 ख्रीष्टके कारण हम्रे सक्कु जाने एक्केथो पवित्र आत्मक माध्यमसे परमेश्वर बाबक थेन जाई सेक्थी।

19 तुहुरे गैर-यहूदिनके परदेशी और प्रवासी नै रहिगिलो। पर तुहुरे परमेश्वरके पवित्र मनैनके संगसंगे नागरिक फेन हुइतो। और तुहुरे परमेश्वरके परिवारके सदस्य हुइतो। 20 तुहुरे निउतरह्यनके और परमेश्वरके अगमवक्तनके जगके उप्पर बैठागिलक घर हस हुइतो। जेकर सक्कुहुनसे खास पठरा वहे ख्रीष्ट येशू हुइँत, 21 जोन ख्रीष्ट घरहे एक्के संग जोरके धर्ले रथाँ। परमेश्वरके लग ऊ एकथो मन्दिर बनक लग अपन सक्कु मनैनहे पठरा जोरे हस एक्के संग जोरतताँ। 22 हे गैर-यहूदी विश्वासीन, तुहुरे ख्रीष्टके संग एकजुट बतो। तबेकमारे तुहुरिन्हे फेन परमेश्वरके औरे मनैनके संग जोरजाइता। ताकि तुहुरे एकथो असिन घर बनजाऊ, जहाँ परमेश्वरके आत्मा रथिन।