1 मै पावल, यी चिट्ठीहे लिखतुँ, मै झेलमे परल बतुँ, काकरेकी मै येशू ख्रीष्टके बारेमे प्रचार करथुँ। हे फिलेमोन, हमार विश्वासी भैया तिमोथी और मोरिक ओहोँरसे तुहिन्हे नमस्कार। तुँ हमार दुलार संघरिया हुइतो, और तुँ ख्रीष्टके लग ओस्तेहेँ काम करथो जसिन हम्रे कर्थी। 2 और हमार विश्वासी बाबु अप्फिया, और हमार विश्वासी संघरिया अर्खिप्पस जे एकथो सिपाहीक हस परमेश्वरके सेवा करत, और उ मण्डलीक मनैनके लग फेन मै यी चिट्ठी लिखतुँ, जेने तोहाँर घरेम जमा हुइथाँ। 3 मै प्राथना करतुँ कि हमार बाबा परमेश्वर और हमार प्रभु येशू ख्रीष्ट तुहुरिन्केमे अनुग्रह करिँत, और तुहुरिन्हे शान्ति दिँत।

4 मै हरदम तोहाँर लग प्राथना करथुँ, और मै तोहाँर लग परमेश्वरहे धन्यवाद देती रथुँ। 5 मनै महिन्हे बतैथाँ कि तोहाँर विश्वास प्रभु येशूकमे पलि बा और यी फेन बतैथाँ कि तुँ परमेश्वरके सक्कु मनैनहे प्रेम करथो। 6 मै प्राथना करतुँ कि तुँ अपन विश्वासहे बँट्नामे सक्रिय बतो, ताकि तुँ उ सक्कु मजा चिजहे बुझे सेको, जोन चिज परमेश्वर हम्रिहिन्हे देले बताँ। और यकर नतिजा यी होए कि मनै ख्रीष्टके महिमा करिँत। 7 हे मोरिक संघरिया, दोसुर जहनहे तोहाँर कर्लक प्रेमहे देख्के मै गजब खुशी और हौसल बतुँ। काकरेकी तुहिन्से पवित्र मनैनके मन हौसाइल बतिन।

8,9 मै तुहिन्हे कुछु असिन करे कहतुँ, ज्या तुहिन्हे करे परना हो। मै उ अधिकारके प्रयोग करे सेक्थुँ। जोन अधिकार ख्रीष्ट महिन्हे देले बताँ ताकि मै तुहिन्से यी करवाई सेकुँ। पर मै असिन नै करम। मै तुहिन्हे किल कहतुँ, काकरेकी मै जन्थुँ कि तुँ महिन्हे और तोहाँर विश्वासीनहे प्रेम करथो। मै पावल, तुहिन्हे एकथो बुह्राइल मनैयक रुपमे कहतुँ, और एकथो असिन मनैयक रुपमे जिहिहे मनै झेलमे दारदेले बताँ। काकरेकी मै येशू ख्रीष्टके सेवा करथुँ। 10 मै ओनेसिमसके लग बिन्ती करतुँ, जे मोरिक छावक हस बा। जब मै झेलमे परल रहुँ ते ऊ ख्रीष्टमे मोरिक छावा बनगिल। 11 पहिले ते ऊ तोहाँर लग बिनाकामक रहे, पर आब ऊ तोहाँर और मोरिक दुनु जहनके लग महा काम लग्नाहाँ होगिल बा। 12 मै ओनेसिमसहे तोहाँर थेन फिर्ता पठाइतुँ, जिहिहे मै पूरा मनसे माया करथुँ। 13 मै उहिहे अपन सहायता करवाइक लग यहैँ रखाई चाहतुहुँ, जब कि मै खुशीक खबर प्रचार कर्लक कारण झेलमे परल बतुँ। ऊ यहाँ मोरिक सहायता करक लग तोहाँर ठाउँ लेहे सेक्ना रहे। काकरेकी मै जन्थुँ कि तुँ मोरिक सहायता करे चहथो। 14 पर जबसम तोहाँर मर्जी नै हुई तबसम मै असिन करे नै चहथुँ। पर मै चहथुँ कि तुँ यी सहायता मोरिक दबाबसे नै होके अपन खुशीसे करो। 15 सायद यहे कारण रहे कि परमेश्वर ओनेसिमसहे थोरचुन समयक लग तुहिन्से दूर भागजिना अनुमति देलाँ। ताकि ख्रीष्टमे ऊ विश्वास करे सेके, और जिहिसे कि सदादिनके लग तुँ उहिहे अपन संग धारे सेको। 16 पर आब ऊ तोहाँर नोकर किल नै रही, बेन ऊ एकथो नोकरसे फेन धेउर बा। आब ऊ तोहाँर प्रिय विश्वासी भैया हो, जिहिहे तुँ प्रेम करे सेक्थो। मै उहिहे बहुत माया करथुँ। पर तुहिन्हे उ ओनेसिमसहे दुनु रुपमे आकुर धेउर प्रेम करे परना हो, अपन नोकरके रुपमे और ख्रीष्टमे एकथो भैयक रुपमे। 17 जब ओनेसिमस तोहाँर थेन फिर्ता आई, तब उहिहे वहे दयासे व्यवहार करहो, जसिके तुँ मोरिक स्वागत करबो। 18 और यदि ऊ कौनो फेन चिजसे तोहाँरिक ऋणी बा कलेसे ओकर लग मै चुक्ता करम। 19 मै पावल, अपने हाँथेलेके यी लिखतुँ कि मै अप्निहीँ चुक्ता करम, और तुँ पैलेहेँसे जन्थो कि यदि मै तोहाँर सहायता नै कर्तुँ कलेसे तुँ अप्निहीँ यी लावा जीवनहे भेटाई नै सेक्तो। तबेकमारे तुँ अपन जीवनके लग मोरिक ऋणी बतो। 20 हे मोरिक दुलार संघरिया, यी खुशी महिन्हे ख्रीष्ट प्रभुमे तोहाँर ओहोँरसे मिले। एकथो विश्वासी संघरियक रुपमे असिन करके महिन्हे हौसादेऊ। 21 मै तुहिन्हे यी चिट्ठी तबे लिख्नु, काकरेकी महिन्हे विश्वास बा कि तुँ वहे करबो, ज्या करक लग मै बिन्ती करतुँ। बेन महिन्हे पता बा कि तुँ उहिसे फेन धेउर करबो, ज्या मै तुहिन्हे करक लग बिन्ती करतुँ। 22 और एकथो आकुर बात: कि मोरिक लग अपन घरेम एकथो कोन्ती तयार करो। काकरेकी महिन्हे आशा बा कि परमेश्वर तोहाँर प्राथनक जवाफ दिहीँ (महिन्हे झेलमेसे छुटैहीँ)। और महिन्हे मौका दिहीँ, कि मै आके फेनदोस्रे तुहिन्से भेँटा करे सेकुँ।

23 इपाफ्रास जे मोरिक संग झेलमे बा, काकरेकी ऊ येशू ख्रीष्टके सेवा करत, ओकर ओहोँरसे तुहिन्हे नमस्कार। 24 ओस्तेके मर्कूस, अरिस्तार्खस, डेमास और लूकक ओहोँरसे फेन तुहिन्हे नमस्कार, जेने मोरिक संग प्रभुक काम करथाँ। 25 मै प्राथना करतुँ कि प्रभु येशू ख्रीष्टके अनुग्रह तुहुरिन्के संग पलिरहे। आमेन! (यकर मतलब हुइत, अस्तेहेँ होए।)