मोशक नियम कानुनके उद्देश्य
19 परमेश्वर यी देखाइक लग इजरायलके मनैनहे मोशक नियम कानुन देले रहिँत कि जात्तिकमे पाप का हो। और मोशक नियम कानुनहे तबसम पलिरहे परना रहिस, जबसम अब्राहामके एकथो सन्तान ना आजाइस, जेकर बारेमे परमेश्वर वाचा कर्ले रहिँत। स्वर्गदूतनके सहायतासे मोशाहे परमेश्वर अपन नियम कानुन देलाँ। और मोशा परमेश्वर और मनैनके बिच्चेम रहिके मध्यस्थकर्तक रुपमे काम कर्लस। 20 एकथो मध्यस्थकर्तक जरुरी तब परत, जब कौनो दुईथो पक्षक मनै कौनो सम्झौता करे भिरल रथाँ। पर परमेश्वर एक्केली वाचा करथाँ। जब परमेश्वर अब्राहामसे वाचा करलाँ, तब उ समयमे ऊ कौनो फेन मध्यस्थकर्तक प्रयोग नै करलाँ।