1 हे गलातिया प्रदेशके विश्वासीन, तुहुरिन्के अक्किल ओरागिल बा। केऊ तुहुरिन्हे धोखा देले बा। येशू ख्रीष्ट क्रूसमे काकरे मुलाँ कहिके मै तुहुरिन्हे सक्कुहुनके थेन महा फरछ्वारसे सम्झादेले रहुँ। 2 तुहुरे महिन्हे एकथो बात बताऊ: कि तुहुरिन्हे पवित्र आत्मा कसिके मिलल? का मोशक नियम कानुन पालन करके तुहुरिन्हे पवित्र आत्मा मिलल? पक्कै फेन नै, तुहुरे खुशीक खबर सुन्लो, और उ खुशीक खबरमे विश्वास कर्लो। तबेकमारे तुहुरिन्हे पवित्र आत्मा मिलल। 3 का तुहुरिन्के अतरा जोरसे अक्किल ओरागिल बा। कि परमेश्वर अपन आत्मक माध्यमसे तुहुरिन्हे एकथो लावा तरिकासे जीवन जिअक लग सुरुवात करनामे सहायता करलाँ। पक्कै फेन तुहुरे अपन बलसे अपन जीवनहे पूरा करे नै चहथो।

4 विश्वासी बनके सेकके तुहुरे बहुत दुःख उठैलो। मै जात्तिकमे आशा करतुँ कि तुहुरिन्के भोग्लक यी दुःख बिनाकामक नै रहे! 5 परमेश्वर आब तुहुरिन्हे स्वतन्त्र रुपसे पवित्र आत्मा देथाँ, और ऊ तुहुरिन्के बिच्चेम चमत्कारके काम करथाँ। का तुहुरे मोशक नियम कानुन पालन कर्लो, यहे कारणसे परमेश्वर असिके करलाँ? या यी कारणसे हो कि तुहुरे ख्रीष्टके खुशीक खबर सुन्लो, और उ खुशीक खबरमे विश्वास करलो?

6 आब अब्राहामके बारेमे सोँचो, कि ऊ परमेश्वरकेमे विश्वास करल और ओकर विश्वासके कारण परमेश्वर उहिहे एकथो धर्मी मनैयक रुपमे स्वीकार कर्लिस। 7 तबेकमारे तुहुरिन्हे जाने परना हो कि जोन मनै अब्राहामके हस परमेश्वरकेमे भरोसा करथाँ, ओइने अब्राहामके सच्चा सन्तान हुइताँ। 8 पवित्र शास्त्रमे बहुत समय पैलेहेँ असिके लिखल रहे कि परमेश्वर गैर-यहूदिनहे ओइन्के विश्वाससे ओइन्हे धर्मी ठहरैहीँ। यहे कारणसे परमेश्वर अब्राहामहे पैलेहेँ एकथो असिन खुशीक खबर बतादेले रहिँत कि "तोरिक माध्यमसे मै यी संसारके सक्कु मनैनहे आशिष देहम।" 9 तबेकमारे जे-जे अब्राहामके हस परमेश्वरकेमे विश्वास करथाँ, उ सक्कुहुन्हे परमेश्वर ओस्तेहेँके आशिष दिहीँ, जसिके अब्राहामहे आशिष देले रहिँत।

10 पर पवित्र शास्त्रमे लिखल बा, कि "जोन मनै परमेश्वरके संग धर्मी ठहरक लग मोशक नियम कानुनहे भरोसा करथाँ, ओइने परमेश्वरके देहल सरापके अधिनमे बताँ।" तबेकमारे उ सक्कु मनैनकेमे एकथो सराप आगिल बतिन, जेने मोशक नियम कानुन पालन करके परमेश्वरके आघे धर्मी ठहरना कोशिस करथाँ। काकरेकी केऊ फेन हरेक समय उ मोशक नियम कानुन पूरा रुपमे पालन करे नै सेकत। 11 पर यी बात फरछ्वार बा कि मोशक नियम कानुन पालन करके केऊ फेन परमेश्वरके आघे धर्मी ठहरे नै सेकत। काकरेकी पवित्र शास्त्रमे असिके लिखल बा, कि "जे परमेश्वरकेमे भरोसा करी उहिहे परमेश्वर धर्मी ठहरैहीँ। और ऊ सदाकालके लग जीवन भेटाई।" 12 पर मोशक नियम कानुनके पालन करके जिना और परमेश्वरकेमे भरोसा करके जिना एक्के हस नै हो; जसिके पवित्र शास्त्रमे लिखल बा, कि "जोन मनैया यी मोशक नियम कानुन पालन करत, उहिहे आज्ञा पालने करके जीवन मिल्थिस।"

13 पर ख्रीष्ट हम्रिहिन्हे उ श्रापसे बँचैले बताँ, जोन श्राप मोशक नियम कानुनमेसे आइत। जब क्रूसमे येशू मुलाँ, तब ऊ हमार पापके कारण श्रापहे अपन उप्पर लैलेलाँ। काकरेकी पवित्र शास्त्रमे असिके लिखल बा, "जे क्रूसमे मुअत, ऊ श्रापित हो।" 14 ख्रीष्ट असिके यहे कारणसे करलाँ, ताकि गैर-यहूदिनहे वहे आशिष मिले सेकिन, जोन आशिष परमेश्वर अब्राहामहे येशू ख्रीष्टमे विश्वास करके देना वाचा करलाँ। हम्रे विश्वास कर्लक कारण परमेश्वरके देना वाचा कर्लक पवित्र आत्मा हम्रे भेटाई सेकी कहिके ऊ असिक करलाँ।

15 हे मोरिक विश्वासी भैयो, मै सामान्य जीवनके उदाहरण देहतुँ। जब दुईथो मनै एकथो सम्झौता करथाँ। और ओइने उ सम्झौतामे हस्ताक्षर करथाँ, ते असिन केऊ फेन नै हो, जे उ सम्झौतक कुछु चिज टुरे सेके। परमेश्वरके वाचा फेन अस्तेहेँ हो। 16 अस्तेहेँके परमेश्वर अब्राहामहे वाचा करलाँ, कि "संसारके हरेक मनै तोरिक एकथो सन्तानके माध्यमसे आशिष भेटैहीँ।" हेरो, पवित्र शास्त्र असिके नै कहत, "और ओकर लर्कनसे" यदि असिक रहत कलेसे बहुत जहनहे जनाइत। पर पवित्र शास्त्रमे एक वचनके प्रयोग हुइल बा। पवित्र शास्त्र कहत, "और तोरिक सन्तानसे" जे ख्रीष्ट हुइँत।

17 मै तुहुरिन्हे कहे खोज्लक यहे हो: परमेश्वर अब्राहामहे वाचा कर्लक साल पाछे मोशाहे उ नियम कानुन देलाँ, जोन नियम कानुन हुँकार देलक वाचाहे साबित करत। पर आब हम्रे असिके कहे नै सेकब कि आब मोशक नियम कानुन बा, तबेकमारे परमेश्वरके वाचा टुटगिल बा। परमेश्वरके उ वाचा अभिन फेन बल्गरे बा, और उ वाचाहे पूरा कर्हिके परना बतिन। 18 काकरेकी यदि परमेश्वर मनैनहे मोशक नियम कानुन पालन कर्लक कारण आशिष देहल रताँ कलेसे परमेश्वर अपन कर्लक वाचाहे हटादेहल रताँ। मोशक नियम कानुन पालन कर्लक कारण परमेश्वर अब्राहामहे आशिष नै देलाँ। पर परमेश्वर अब्राहामहे वाचा कर्ले रहिँत। तबेकमारे परमेश्वर अब्राहामहे स्वतन्त्र रुपसे आशिष देलाँ।

19 परमेश्वर यी देखाइक लग इजरायलके मनैनहे मोशक नियम कानुन देले रहिँत कि जात्तिकमे पाप का हो। और मोशक नियम कानुनहे तबसम पलिरहे परना रहिस, जबसम अब्राहामके एकथो सन्तान ना आजाइस, जेकर बारेमे परमेश्वर वाचा कर्ले रहिँत। स्वर्गदूतनके सहायतासे मोशाहे परमेश्वर अपन नियम कानुन देलाँ। और मोशा परमेश्वर और मनैनके बिच्चेम रहिके मध्यस्थकर्तक रुपमे काम कर्लस। 20 एकथो मध्यस्थकर्तक जरुरी तब परत, जब कौनो दुईथो पक्षक मनै कौनो सम्झौता करे भिरल रथाँ। पर परमेश्वर एक्केली वाचा करथाँ। जब परमेश्वर अब्राहामसे वाचा करलाँ, तब उ समयमे ऊ कौनो फेन मध्यस्थकर्तक प्रयोग नै करलाँ।

21 ते का मोशक नियम कानुन परमेश्वरके वाचक विरोधमे बा? नै हो! बिरकुल फेन नै हो! काकरेकी यदि मोशक नियम कानुन हम्रिहिन्हे सदाकालके जीवन देहत कलेसे हम्रे यिहिहे पालन करके परमेश्वरके संग धर्मी बनाजिती। 22 पर पवित्र शास्त्र कहत कि हम्रे सक्कु जाने पापी बती, यकर मतलब यी हो कि परमेश्वरके कर्लक वाचा हम्रे किल भेटाई सेकी, जब हम्रे येशू ख्रीष्टकेमे विश्वास करब।

23 पर ख्रीष्टके अइनासे पैलेहेँ, हम्रे यहूदिनके कैदमे धारल हस रही। और मोशक नियम कानुन हमार अख्वारी करतेहे। और परमेश्वर हम्रिहिन्हे ख्रीष्ट देखैनासे आघे और हम्रे हुँकारमे विश्वास करनासे आघेसम मोशक नियम कानुन हम्रिहिन्हे कैदिनके हस धारल। 24 तबेकमारे ख्रीष्टके नै आइतसम मोशक नियम कानुन हम्रिहिन्हे हमार नेगे परना डगर देखाइक लग और हमार अख्वारी करक लग* देगिल रहे। ताकि हम्रे येशू ख्रीष्टहे विश्वास करके परमेश्वरके आघे धर्मी ठहरे सेकी। 25 पर आब ख्रीष्ट आसेकल बताँ, और हम्रे हुँकारमे विश्वास कर्थी कलेसे आब हम्रिहिन्हे हमार नेगे परना डगर देखाइक लग और हमार अख्वारी करक लग मोशक नियम कानुनके कौनो जरुरी नै हो।

26,27 तुहुरे सक्कु जाने येशू ख्रीष्टकेमे विश्वास करलो, और जब तुहुरिन्हे ख्रीष्टके नाउँमे डुब्कि देगिलस ते तुहुरे येशू ख्रीष्टके संग एकतामे बतो, जसिके एकथो मनैया लावा लुग्गा घाललेहत। तबेकमारे तुहुरे सक्कु जाने परमेश्वरके लरका बनगिलो, जब तुहुरे येशू ख्रीष्टकेमे विश्वास करलो। 28 ख्रीष्ट येशूमे एकथो यहूदी या गैर-यहूदी, या नोकर या स्वतन्त्र मनैयकमे कौनो फरक नै हो। यम्ने फेन कौनो फरक नै हो, चाहे तुहुरे थारु मनै हुइतो या जन्नी मनै। हम्रे सक्कु जाने येशू ख्रीष्टमे बराबर बती। 29 और काकरेकी तुहुरे ख्रीष्टके संग एकजुट होगिल बतो, कलेसे आब तुहुरे अब्राहामके परिवारके एकथो सदस्य हुइतो। और तुहुरे परमेश्वरके कर्लक वाचक आशिषमे हकदार बनगिल बतो।