1 ख्रीष्ट हम्रिहिन्हे बँचालेले बताँ ताकि मोशक नियम कानुन पालन करक लग हम्रिहिन्हे गुलामके हस जिए ना परे। तबेकमारे तुहुरे जानलेऊ कि तुहुरे स्वतन्त्र बतो, और मोशक नियम कानुन पालन करवाइक लग केऊ फेन तुहुरिन्हे गुलाम ना बनाए। 2 मै पावल जोन बात तुहुरिन्हे कहतुँ उ बातहे तुहुरे ध्यान देके सुनो, कि तुहुरे गैर-यहूदी विश्वासी हुइलक नातासे परमेश्वरके आघे धर्मी ठहरक लग यदि तुहुरे खतना करवैबो कलेसे ख्रीष्टके कर्लक कामसे तुहुरिन्हे कुछु फाइदा नै हुई। 3 मै तुहुरिन्हे एकचो फेनदोस्रे कहतुँ, कि जे अपन खतना करवाइत, उहिहे मोशक सक्कु नियम कानुन पालन करे परहिस।

4 यदि तुहुरे मोशक नियम कानुन पालन करके परमेश्वरके आघे धर्मी ठहरे चहथो कलेसे तुहुरे ख्रीष्टसे अपन सम्बन्ध टुरदेले बतो। और तुहुरे अपनहे अप्निहीँ परमेश्वरके उ अनुग्रहसे अल्गे करालेले बतो, जोन अनुग्रहसे परमेश्वर तुहुरिन्हे बँचाई सेक्थाँ। 5 मै असिके यी कारणसे कहतुँ, काकरेकी हम्रिहिन्हे पवित्र आत्मक थेनसे पूरा आश्वासन मिलल बा कि परमेश्वर हम्रिहिन्हे धर्मीक रुपमे स्वीकार करहीँ, काकरेकी हम्रे ख्रीष्टहे विश्वास कर्थी। 6 काकरेकी जब हम्रे येशू ख्रीष्टकेमे विश्वास कर्थी कलेसे खतना करवैना अथवा खतना नै करवैनासे कुछु फाइदा नै हो। पर खास बात यहे हो कि हम्रे ख्रीष्टहे हमार मुक्तिदातक रुपमे विश्वास कर्थी, और हम्रे परमेश्वर और दोसुर मनैनहे प्रेम कर्थी।

7 तुहुरे ख्रीष्टके संग अपन सम्बन्ध अतरा मजासे बनाइतोहो। उ सच्चाईहे मन्नासे तुहुरिन्हे रोकक लग तुहुरे किहुहे फेन अनुमति नै देहे परना रहे। 8 असिन शिक्षा उ परमेश्वरके ओहोँरसे नै आइत, जे तुहुरिन्हे हुँकार सन्तान हुइक लग बलैलाँ। 9 असिन शिक्षा जोन सच्चा नै हो उ असिके फैलता, जसिके कि एकथो कहकुट बा: थोरचे खमीर सन्लक पूरा पिठाहे फुल्नाहाँ बनादेहत। 10 महिन्हे परमेश्वरकेमे विश्वास बा कि तुहुरे झूँटा शिक्षाहे स्वीकार नै करबो, पर मोरिक कलक बात मन्बो। पर जेने तुहुरिन्हे परेशान करथाँ, ओइने जे रलेसे फेन परमेश्वर ओइन्हे जरुर दण्ड दिहिन। 11 हे मोरिक विश्वासी भैयो, खतना करना जरुरी नै हो कहिके मै प्रचार करथुँ। तबेकमारे यहूदी मनै महिन्हे सताइतताँ; यदि मै क्रूसमे ख्रीष्टके मुलक विषयमे प्रचार करना छोरके मोशक नियम कानुन अनुसार खतना करे परत कहिके मनैनहे प्रचार कर्तुँ कलेसे यहूदिनके बेज्जत नै हुइतिन। 12 जेने तुहुरिन्हे परेशान करथाँ मै चहथुँ कि ओइने अपनहे नपुंसक बनालिँत।

13 हे मोरिक विश्वासी भैयो, परमेश्वर तुहुरिन्हे स्वतन्त्र करक लग बलैले बताँ, तबेकमारे तुहुरिन्हे आब मोशक नियम कानुन पालन करे परना कौनो जरुरी नै हो। पर तुहुरे उ स्वतन्त्रताहे अपन शरीरके खराब इच्छा पूरा करक लग पापी स्वभावहे मौका ना देऊ। बेन एकदोसर जहनहे प्रेम करो और एकदोसर जहनके सेवा करो। 14 काकरेकी सक्कु मोशक नियम कानुनके निचोड़ एक्केथो आज्ञामे पूरा हुइल बा, "तुँ अपन परोसीहे अपने हस प्रेम करो।" 15 पर यदि तुहुरे हरदम एकदोसर जहनसे झगरा कर्ती रबो, और एकदोसर जहनहे परेशान कर्ती रबो कलेसे तुहुरे हौश्यार रहो। तुहुरे असिके कर्ती रबो कलेसे तुहुरे अपनहे अप्निहीँ बर्बाद करदेबो।

16 पर मै कहतुँ, कि तुहुरे पवित्र आत्मक अगुवाइक अनुसार जिओ ताकि तुहुरे पापी शरीरके इच्छा पूरा ना करो। तबजाके तुहुरे उ खराब काम नै करबो। 17 काकरेकी हमार पापी इच्छा पवित्र आत्मक विरोधमे बा, और पवित्र आत्मा हमार पापी इच्छक विरोधमे बा। काकरेकी यी दुनु जाने एकदोसर जहनके दुश्मन हुइँत; तबेकमारे हम्रे हरदम उ मजा काम करे नै सेक्थी जोन काम हम्रे करे चहथी। 18 और यदि तुहुरे पवित्र आत्मक अगुवाइक अनुसार जिथो कलेसे आब तुहुरे मोशक नियम कानुनके अधिनमे नै हुइतो।

19 तुहुरे सक्कु जाने जन्थो कि जोन मनै अपन पापी स्वभावके पाछे नेंग्थाँ, ओइने का-का करथाँ। अथवा ओइने व्यभिचार करथाँ, ओइन्के अशुद्ध सोँच-विचार रथिन, और ओइने कामुकतामे रथाँ। 20 और ओइने मूर्तिहे पुज्थाँ, मन्तुर पहरथाँ। और ओइने अपन संघरियनहे घृणा करथाँ। ओइने एकदोसर जहनसे झगरा खेल्थाँ। और ओइने उ सक्कु चिजके लालच करथाँ जोन चिज दोसुर जहनके थेन रथिन। ओइने महा झत्ति झोँक्काजिथाँ। और ओइने अपन काम बनाइक लग दोसुर मनैनके गोरा तन्थाँ। ओइने उ मनैनहे अस्वीकार करदेथाँ, जेनसे ओइने असहमत रथाँ। और ओइने ओइन्हे किल साथ देथाँ, जेनसे ओइने सहमत रथाँ। 21 ओइने एकदोसर जहनसे हिस्का मुथाँ। ओइने मत्वार पलिरथाँ। और ओइने दलिद्दर हस खाना खैथाँ। और ओइने असिके सक्कु मेरिक खराब काम करथाँ। यनके बारेमे मै तुहुरिन्हे चेतावनी देहतुँ जसिके मै तुहुरिन्हे पहिले फेन चेतावनी देले रहुँ कि जे-जे असिन काम करहीँ, ओइने परमेश्वरके राजके हकदार नै बन्हीँ।

22 जब पवित्र आत्मा हम्रिहिन्हे अगुवाई करत कलेसे हम्रे एकदोसर जहनसे प्रेम कर्थी। खुशी रथी। शान्ति रहत। सँस्सा करे सेक्थी। दोसुर जहनहे दया देखैथी। दोसुर जहनके भलाई कर्थी। एकदोसर जहनकेमे भरोसा रहत। 23 और हमारमे नम्रता रहत। और हम्रे अप्निहीँ अपनहे नियन्त्रण करे सेक्थी। असिन बातके विरोधमे कौनो मोशक नियम कानुन नै हो। 24 पर जेनके सम्बन्ध मुक्तिदाता येशू ख्रीष्टके संग बतिन, ओइने अपन जीवनके पापी स्वभावके खराब इच्छा और चाहनाहे पाछे छोरदेले बताँ।

25 काकरेकी पवित्र आत्मा हम्रिहिन्हे एकथो लावा जीवन देले बताँ। तबेकमारे आऊ, हम्रे अपन जीवनके हरेक क्षेत्रमे पवित्र आत्मक अगुवाइसे अपन जीवन जिई। 26 हम्रे घमण्ड नै करे परत। हम्रे एकदोसर जहनसे रिसाई नै परत। अथवा हम्रे एकदोसर जहनके हिस्का नै मुए परत।