3,4 पर सच्चा बात यी हो कि ओइन्हे चह्रैलक उ बलि हरेक साल ओइन्हे पापके दोषी रलक याद करवैथिन। काकरेकी जानबर बर्धा और बोकनके खुन पाप कर्लक मनैनके दोषहे मेटाई नै सेकत।
ख्रीष्टके बलिदानसे पुग्ना
5 तबेकमारे संसारमे आइलमे ख्रीष्ट परमेश्वरहे कलाँ,
"मनैनसे तैँ बलि और भेटी नै चहले।
पर तैँ महिन्हे बलिदानके लग शरीर देले बते।
6 होमबलिनमे और पापबलिनमे तैँ खुशी नै हुइले।"
7 तब् ख्रीष्ट परमेश्वरहे कलाँ, "हे परमेश्वर पवित्र शास्त्रमे मोरिक बारेमे लिखल हस
तोरिके इच्छा पूरा करे मै आइल बतुँ।"
8 मोशक नियम कानुन सिखाइत कि पापके कारण बलि और भेटी चह्रैना जरुरी बा। पर ख्रीष्ट काकरे यी बातके उल्लेख करलाँ, और कलाँ कि परमेश्वर उ चिज नै चहथाँ? 9,10 और ओकर पाछे येशू असिके कलाँ, "हे परमेश्वर तोरिके इच्छा पूरा करक लग मै आइल बतुँ।" और परमेश्वरके इच्छा अनुसार, ख्रीष्ट अपन शरीरहे एक्केचो बलिक रुपमे चह्रैलाँ। यिहिसे परमेश्वर हम्रिहिन्हे पवित्र बनैलाँ। असिके ख्रीष्ट सुरुक करारके बलिहे खारेज करथाँ, ताकि ऊ दोसुर करारहे सुरु करे सेकिँत।