1 मोशक नियम कानुनमे रहल पुरान नियम अइना मजा चिजके छाहीँ किल हो। ख्रीष्ट हमार लग कर्लक मजा बातके वास्तविकता नै हो। पुरान नियममे बलि घनीघनी और सालोसाल चह्राई परिन। पर ओइने परमेश्वरके आराधना करे अउइया मनैनहे पूरा रुपमे शुद्ध पारे नै सेकिँत। 2 यदि मोशक नियम कानुन ओइन्हे सिद्ध बनाई सेकत कलेसे बलि चह्रैना काम पैलेहेँ रोकजैना रहे। परमेश्वरके आराधना करुइया मनै अपन पापमेसे जात्तिके शुद्ध होजिताँ। और ओइने पापके दोषी रलक महसुस नै करताँ। 3,4 पर सच्चा बात यी हो कि ओइन्हे चह्रैलक उ बलि हरेक साल ओइन्हे पापके दोषी रलक याद करवैथिन। काकरेकी जानबर बर्धा और बोकनके खुन पाप कर्लक मनैनके दोषहे मेटाई नै सेकत।

5 तबेकमारे संसारमे आइलमे ख्रीष्ट परमेश्वरहे कलाँ,

"मनैनसे तैँ बलि और भेटी नै चहले।

पर तैँ महिन्हे बलिदानके लग शरीर देले बते।

6 होमबलिनमे और पापबलिनमे तैँ खुशी नै हुइले।"

7 तब् ख्रीष्ट परमेश्वरहे कलाँ, "हे परमेश्वर पवित्र शास्त्रमे मोरिक बारेमे लिखल हस

तोरिके इच्छा पूरा करे मै आइल बतुँ।"

8 मोशक नियम कानुन सिखाइत कि पापके कारण बलि और भेटी चह्रैना जरुरी बा। पर ख्रीष्ट काकरे यी बातके उल्लेख करलाँ, और कलाँ कि परमेश्वर उ चिज नै चहथाँ? 9,10 और ओकर पाछे येशू असिके कलाँ, "हे परमेश्वर तोरिके इच्छा पूरा करक लग मै आइल बतुँ।" और परमेश्वरके इच्छा अनुसार, ख्रीष्ट अपन शरीरहे एक्केचो बलिक रुपमे चह्रैलाँ। यिहिसे परमेश्वर हम्रिहिन्हे पवित्र बनैलाँ। असिके ख्रीष्ट सुरुक करारके बलिहे खारेज करथाँ, ताकि ऊ दोसुर करारहे सुरु करे सेकिँत।

11 पुरान करार अनुसार पुजारीनके रोट्दिन बेदीक आघे ठरह्याके घनिघनी बलिदान चह्रैना सेवा करिँत, जे पापहे कब्बु हटाई नै सेकत। 12 पर ख्रीष्ट अपनहे सदादिनके लग पुग्ना मेरिक पाप माफिक लग एक्केथो किल बलि चह्रैलाँ। ओकर पाछे ऊ परमेश्वरके दाहिन हाँथेओहोँर उच्च आदरके ठाउँ सिंहासनमे बैठ्लाँ। 13,14 ख्रीष्ट अपन शरीरहे बलिक रुपमे एक्केचोमे परमेश्वरहे देलाँ। तबेकमारे हुँकार मनै पवित्र हुइल बताँ। और ओइने सदादिनके लग सच्चा धर्मी हुइल बताँ। और परमेश्वर हुँकार दुश्मननहे हुँकार अधिनमे और पौलीक तरे नै कराइतसम ख्रीष्ट आज फेन वहैँ अस्याइतताँ।

15 पवित्र आत्मा फेन यी सच्चा हो कहिके हम्रिहिन्हे गवाही देथाँ। सुरुमे ऊ कथाँ,

16 "उ दिनिक पाछे ओइन्के संग बहन्ना मोरिक करार

यहे हो, परमप्रभु कथाँ, कि

मै ओइन्हे मोरिक नियम कानुनके बारेमे सोँचे सेक्ना बनैम।

और ओइने उहिहे अपन मनमे धरहीँ।"

17 परमेश्वर फेनदोस्रे कथाँ,

"ओइन्के पाप और ओइन्के खराब काम

मै फेनदोस्रे नै सम्झम।"

18 और परमेश्वर हमार पाप और खराब कामहे माफ करथाँ। और आब कौनो फेन बलि चह्रैना जरुरी नै हो।

19 तबेकमारे हे मोरिक विश्वासी भैयो, येशू बलिक रुपमे अपन खुन देलाँ। यिहिसे हम्रे बिना डरैले स्वर्गक महापवित्र ठाउँमे हिम्मतसे पैँठे सेक्थी। 20 जब ख्रीष्ट मुलाँ, तब ऊ हम्रिहिन्हे सदाकालके जीवन देहक लग लावा डगर खोलदेलाँ। येशू पर्दामेसे छिरके डगर खोल्लाँ, ओकर मतलब यी हो कि ऊ अपनहे बलिक रुपमे चह्राके असिके करलाँ। 21 और परमेश्वरके मनैनमे राज करुइया हमार संग एकथो महान पुजारी हुइलक कारण, 22 ख्रीष्टके खुन छिट्कलक कारण हमार मनके दोष हटके चलगिल बताँ, और हमार शरीर शुद्ध पानीलेके धोगिल बा। और हम्रे तयार करगिल बती। तबेकमारे आब आई, सच्चा मन और बल्गर विश्वाससे हम्रे परमेश्वरके थेन जाई। 23 आई, हमार धर्लक आशा हम्रे बल्गरसे पकर्ले रही। काकरेकी परमेश्वर अपन वाचा कर्लक सक्कु चिज विश्वासयोग्यतासे पूरा करहीँ। 24 आई, हम्रे एकदोसुर जहनहे प्रेम करना और भलाई करना बातमे एकदोसुर जहनहे उत्साहा देती रही। 25 तमान जहनके प्रभुक महिमा करना सङ्गतिमे नै जैना बानी रथिन। पर हम्रे एक्के थेन जुटे नै छोरी। पर एकदोसुर जहनहे आकुर हौसला देती रही। काकरेकी हम्रिहिन्हे पता बा कि प्रभु झत्तेहेँ फिर्ता आइतताँ।

26 हम्रे अस्तेहेँ काम करे परत। काकरेकी यदि ख्रीष्टके बारेमे सच्चा सन्देश पता पाके फेन हम्रे जान-जानके पाप कर्बी कलेसे हमार पाप मेटाइक लग आकुर कौनो बलि नै हो। 27 बेन ओइने डरैती परमेश्वरके न्यायक लग अँस्याई परत। और ओइने हुँकार दुश्मन हुइलक कारण दम्कती रहल आगीमे भसम होजिहीँ। 28 मोशक नियम कानुनहे नै मनुइया मनैयाहे दुई या तीनथो साँखीन बताँ कलेसे उ मनैया बिना दयक मुए परत। 29 यदि मोशक नियम कानुन अनुसार सजाय ओस्तेहेँ रहे कलेसे, जे परमेश्वरके छावाहे बेकारके हो कहिके सोँचत उहिहे आकुर भारी सजाय हुइहिस। ऊ परमेश्वरके छावाहे अपने गोरालेके किच्लैले बा। और ऊ हुँकार आदर नै करत। ऊ ख्रीष्टके खुनहे पवित्र नै मानत, जोन परमेश्वर उहिहे पवित्र बनाइक लग लावा करार सुरु करलाँ। ऊ पवित्र आत्मक अपमान कर्लस, जिहिसे ऊ अनुग्रह भेटाइल रहे। 30 काकरेकी हम्रे जन्थी कि परमेश्वर कलाँ, "बदला लेना काम मोरिक हो, दण्ड मै देहम।" असिके फेन कहिगिल बा, "परमप्रभु अपन मनैनके न्याय करहीँ।" 31 जित्ती परमेश्वरके हाँथसे सजाय भेटैना एकदम डरलग्तिक बात हो।

32 सुरु-सुरु ओहोँरकिक दिनहे सम्झो, जब तुहुरे ख्रीष्टके बारेमे सुरुकचो सिखल रहो। याद करो उ समयमे डरलग्तिक दुःख रलेसे फेन तुहुरे स्थिर पलि रलो। 33 कैयोचो तुहुरे निन्दा और दुःख सहती मनैनके आघे हेल्हा हुइलो। और कैयोचो अस्तेहेँ निन्दा और दुःख भेटुइयनके संग शामिल हुइक लग तयार हुइलो। 34 कैदिनकेमे तुहुरे दया देखैलो। अपन सम्पति लुट्गिलमे फेन खुशीसे सहलो। काकरेकी तुहुरे जन्ले रहो, कि तुहुरिन्के थेन अभिन फेन परमेश्वरके वाचा कर्लक चिज बताँ। जोन आकुर धेउर मजा बा, और सदादिनके लग पलिरहिहीँ।

35 तबेकमारे तुहुरे अपन विश्वासहे ना छोरो, ताकि तुहुरे परमेश्वरसे बरवार ईनाम भेटाई सेको। 36 अब्बे तुहुरिन्हे स्थिर रहे परी, ताकि तुहुरे लगातार परमेश्वरके इच्छा अनुसार काम करे सेको। तब तुहुरे परमेश्वरके वाचा कर्लक सक्कु चिज भेटाई सेक्बो। 37 काकरेकी पवित्र शास्त्रमे लिखल बा,

"आब एकघची पाछे अउइया पक्कै अइहीँ,

और बेर नै करहीँ।

38 जे परमेश्वरकेमे भरोसा करी, उहिहे परमेश्वर धर्मी ठहरैहीँ,

और ऊ सदाकालके जीवन भेटाई।

और यदि ऊ महिन्हे अस्वीकार करी कलेसे ते

मै उहिसे खुशी नै हुइम।"

39 पर हम्रे परमेश्वरहे अस्वीकार करुइया और नाश पारजउइयनमेसे नै हुइती। पर हम्रे परमेश्वरहे विश्वास करके जीवन भेटुइयनमेसे हुइती।