1 तबेकमारे हमार सिख्लक बात पालन करक लग बहुत ध्यान देहे परत। तब हम्रे सच्चाइसे दूर नै जैबी। 2 परमेश्वर स्वर्गदूतनके माध्यमसे बोल्लक नियम-कानुन सच्चा साबित हुइल बा, और जे-जे यकर उलंघन करलाँ और पालन नै करलाँ, ओइने परमेश्वरसे दण्ड भेटैलाँ। 3 तबेकमारे यदि यी बरवार मुक्तिहे हम्रे वास्ता नै कर्ली कलेसे पक्कै फेन हम्रे फेन सजाय भेटैबी। आघे प्रभु येशू अप्निहीँ यी मुक्तिक बारेमे कलाँ, और प्रभुक कलक मुक्तिक सन्देश सुनुइया चेलनके हम्रिहिन्हे यी सच्चा हो कहिके सबुत देलाँ। 4 परमेश्वर यिहिहे ठिक अपन इच्छा अनुसार अचम्मक काम करके, बरवार-बरवार चिन्हा देखाके, बहुत मेरिक शक्तिशाली काम करके और मनैनहे पवित्र आत्मक माध्यमसे वरदान देके सच्चा साबित करलाँ।

5 हमार बत्वैती अइलक उ लावा संसारहे परमेश्वर स्वर्गदूतनके अधिनमे नै धरलाँ, पर प्रभु येशूक अधिनमे धरलाँ। 6 पवित्र शास्त्रक कौनो एकथो ठाउँमे परमेश्वरहे केऊ असिक कहिके गवाही देहल बा,

"मनैया का हो, और अप्नि, परमेश्वर ओकर वास्ता कर्थी?

अथवा मै, मनैयक छावा* के हुइतुँ, और अप्नि मोरिक चिन्ता कर्थी?

7 अप्नि थोरिक समयक लग मनैयाहे स्वर्गदूतसे कम शक्तिशाली बनैली।

अप्नि उहिहे रज्वक हस महिमा और आदर देली।

8 अप्नि सक्कु चिज ओकर अधिनमे धारदेली, ताकि ऊ सक्कु चिजनके उप्पर राज करे सेके।"

यहाँ कहिगिल बा कि परमेश्वर सक्कु चिज मनैनके अधिनमे धारदेलाँ। यकर मतलब हुइत कि असिन कौनो फेन चिज नै हो, जोन ओइन्के अधिनमे नै हो। पर वर्तमान समयमे हम्रे देखती कि सक्कु चिज मनैनके अधिनमे नै हो। 9 पर सच्चाई यहे हो कि कुछ समयक लग येशू स्वर्गदूतनसे थोरचे तरे करागिलाँ। परमेश्वरके अनुग्रहसे येशू संसारके सक्कु मनैनके लग दुःख भोग्लाँ और मुलाँ। तबेकमारे परमेश्वर येशूहे महिमा और आदर देलाँ।

10 परमेश्वर सक्कु चिज बनैलाँ और सक्कु चिज हुँकारे हुइतिन। तबेकमारे बहुत्ते मनैनहे हुँकार महिमामे शामिल हुइक लग लैजाइक लग परमेश्वर निर्णय करलाँ कि मुक्तिक संस्थापक प्रभु येशूहे दुःख-भोगके माध्यमसे सिद्ध बनैना सही बा। 11 काकरेकी जोन मनैया मनैनहे पापसे चोखा करत, और जोन मनै अपन पापसे चोखा करगिल बताँ, ओइन्के एक्केथो बाबा, अथवा परमेश्वर हुइँत। तबेकमारे येशू ओइन्हे भैया बाबु कनामे नै लजैथाँ। 12 और ख्रीष्ट परमेश्वरहे कहतताँ,

"मै अपन मनैनहे मोरिक लग कर्लक अप्निक मजा कामके बारेमे कहम,

ओइने अप्निक आराधना करक लग जमा हुइल समयमे मै अप्निक प्रशंसा करम।"

13 और फेनदोस्रे येशू कथाँ, "मै अपन भरोसा हुँकार उप्पर धारम।"

और फेनदोस्रे ऊ कहतताँ,

"मै परमेश्वरके देलक मनैनके संग यहाँ बतुँ, यने मोरिक छाईछावा हस हुइँत।"

14 काकरेकी परमेश्वर जेनहे छाईछावा कहिके कलाँ, ओइने मनै हुइँत। येशू हरेक मेरसे हमार हस हुइलाँ, और मनैया होके अइलाँ ताकि हुँकार मृत्युक माध्यमसे, मृत्युक उप्पर अधिकार रहल शैतानहे नाश करे सेकिँत। 15 तबेकमारे मुए परी कना डरकमारे जीवनभर गुलाम हस होके जिअल मनैनहे येशू मुक्ति देलाँ। 16 काकरेकी जात्तिके प्रभु येशू स्वर्गदूतनके नै होके, पर अब्राहामके सन्ताननके मद्दत करथाँ। 17 तबेकमारे हरेक बातमे येशूहे दोसुर मनैनके हस बने पर्लिन। अस्तेहेँके ऊ परमेश्वरके दयालु और विश्वासयोग्य प्रधान पुजारी बन्लाँ। ताकि हुँकार बलिदानसे मनै अपन पापमेसे माफी भेटाई सेकिँत। 18 काकरेकी येशू दुःख और परीक्षा भोग्लाँ, और ऊ परीक्षामे परुइया सक्कु मनैनहे सहायता करे जन्थाँ।