1-3 यहे मल्किसेदेक शालेम शहरके रज्वा और सर्वोच्चक परमेश्वरके प्रधान पुजारी रहे। ओकर नाउँक मतलब "न्यायसे राज करुइया रज्वा" हुइत, और शालेम रज्वक मतलब "शान्तिक रज्वा" हुइत। पवित्र शास्त्रमे ओकर बाबा, और ओकर पुर्खनके बारेमे अथवा ओकर जलम, अथवा ओकर मुलक बारेमे कौनो बात नै लिखल हो। ऊ सदक लग पुजारी हो। तबेकमारे ऊ परमेश्वरके छावा हस बा। जब अब्राहाम चारथो रज्वनहे मारके घुमके आइतेहे। तब मल्किसेदेक उहिसे भेँटा हुइलस, और उहिहे आशीर्वाद देहल। और अब्राहाम उहिहे युद्धमेसे जितके भेटैलक सक्कु चिजके दशांश देहल।

4 आब विचार करो ते, मल्किसेदेक कतरा महान मनैया रहे, जिहिहे हमार पुर्खा अब्राहाम युद्धमेसे जितके भेटैलक सक्कु चिजके दशांश देहल। 5 लेवी वंशक पुजारीनके कथाँ, मोशक नियम कानुन यी बात सिखाइत कि जेने पुजारी बन्थाँ। ओइने इजरायल देशके अपन मनैनसे दशांश लेहे परत। पर उ पुजारीनके और दोसुर मनै दादू-भैया हस हुइँत। काकरेकी ओइने सक्कु जाने अब्राहामके लरका हुइँत। 6 पर यी मनैया मल्किसेदेक, जे लेवी वंशक फेन नै रहे। ऊ अब्राहामसे दशांश लेहल। और परमेश्वरके वाचा भेटुइया अब्राहाम रलेसे फेन मल्किसेदेक अब्राहामहे आशीर्वाद देहल। 7 हम्रे यी ते पक्कै जन्थी कि आशिष देहुइया आशिष भेटुइयासे भारी रहत। 8 और लेवी वंशक पुजारीनके जेने दशांश लेहतिहिँत, ओइने एक दिन मुजिना रहिँत। पर अब्राहामके बारेमे दशांश लेहुइया पुजारी मल्किसेदेक अभिनसम जित्ती पलि बा कहिके पवित्र शास्त्रमे साबित हुइल बा। 9,10 मनैनसे दशांश लेहुइया लेवी अब्राहामके वंश रहे। तबेकमारे जब अब्राहाम मल्किसेदेकहे भेँटा करल, और उहिहे दशांश देहल। तब हम्रे असिके कहे सेक्थी कि लेवी फेन मल्किसेदेकहे अब्राहामके माध्यमसे दशांश देहल रहे।

11 जेने हारुनके वंशमेसे लेवी कुलके रहिँत, उ मनैनहे पुजारीक चलन अनुसार मोशक नियम कानुन देजाए। पर ओइने उ चलनके माध्यमसे सिद्ध हुई नै सेक्लाँ। तबेकमारे दोसुर पुजारी अइना जरुरी रहे। उ पुजारी हारुन हस नै होके मल्किसेदेक हस हुई परना रहे। 12 काकरेकी जब पुजारी पद बद्लत, तब मोशक नियम कानुन फेन बद्लिही परत। 13 हम्रे यी बात ख्रीष्टके बारेमे कहती, जे दोसुर कुलके रहिँत। उ कुलमेसे केऊ फेन अभिनसम वेदीमे पुजारीक रुपमे सेवा नै करल रहिँत। 14 काकरेकी सक्कुहुन्हे पतै बा कि हमार प्रभु येशू यहूदक वंश हुइँत। और मोशा यहूदक कौनो फेन वंश पुजारी बन्ना बातके बारेमे कुछु नै कहल हो। और यहूदक कौनो फेन वंश कबु पुजारी नै बनल हुइँत।

15 मै का बात बत्वाइतुँ कहिके आब फरछ्वार होजाइत कि मोशक नियम कानुन पैलेहेँ बदलसेकल बा। काकरेकी दोसुर पुजारी आसेकल बताँ, और ऊ मल्किसेदेक हस बताँ। 16 येशू लेवी कुलके हुइलक कारण पुजारी नै बन्लाँ। ऊ मनैनके चलन और कानुनके पालन नै करके, पर अमर जीवनके शक्तिक माध्यमसे पुजारी बन्लाँ। 17 काकरेकी पवित्र शास्त्रमे परमेश्वर हुँकार बारेमे गवाही देले बताँ,

"मल्किसेदेक पुजारी रहल हस

तैँ सदादिनके लग पुजारी हुइते।"

18 काकरेकी पुरान मोशक नियम कानुन कुछु करे नै सेक्ना और काम नै लग्ना हुइलक कारण खारेज करगिल बा। 19 काकरेकी मोशक नियम कानुन कुछु सिद्ध करे नै सेकल। और हमार थेन येशू ख्रीष्टके मजा आशा बा, जिहिसे हम्रे परमेश्वरके लग्गे जाई सेक्थी।

20 और परमेश्वर येशूहे कसम खाके पुजारी बनैलाँ। 21 लेवीक वंशनहे परमेश्वर बिना कसम खाके पुजारी बनैले रहिँत। पर येशूहे कसम खाके पुजारी बनैलाँ। और जब येशू परमेश्वरके पुजारी हुइलाँ। तब परमेश्वर कलाँ,

"मै, परमेश्वर कसम खाइतुँ।

और मै अपन मन कबु नै बद्लम।

तैँ सदादिनके लग पुजारी हुइते।"

22 तबेकमारे येशू हम्रिहिन्हे बरह्या करार पूरा करना भरोसा देले बताँ।

23 दोसुर फरक का हो कलेसे पहिलेक पुजारीनके अपन काम पूरा करे नै सेक्लाँ। पर ओइने मुगिलक कारण ओइन्के ठाउँमे दोसुर पुजारी नियुक्त हुइलाँ। तबेकमारे आघेक पुजारीनके संख्या बहुत्ते रहिन। 24 पर येशू अनन्त हुइलक ओहोँरसे हुँकार पुजारीक पद केऊ नै ली। 25 तबेकमारे येशूक माध्यमसे परमेश्वरके लग्गे अउइयनहे ऊ सदाकालके लग मुक्ति देहे सेक्थाँ। काकरेकी ओइन्के लग मध्यस्थतक प्राथना चह्राइक लग ऊ सदादिन जित्ती बताँ।

26 येशू हम्रिहिन्हे चहलक प्रधान पुजारीक रज्वा हुइँत। ऊ पवित्र, निर्दोष और शुद्ध बताँ। परमेश्वर हुँकिन्हे पापी मनैनसे अलग कराके सक्कुहुनसे धेउर आदरसे स्वर्गमे बैठैलिन। 27 और हारुनके वंशक प्रधान पुजारीनके हस येशूहे फेन रोट्दिन बलि चह्रैना जरुरी नै हो। उ प्रधान पुजारीनके आघे अपन पापके लग और ओकर पाछे दोसुर मनैनके पापके लग बलिदान चह्रैलाँ। येशू अपन बलिदान देके यी कामहे सदादिनके लग पूरा करदेलाँ। 28 काकरेकी मोशक नियम कानुन कमजोर मनैनहे प्रधान पुजारी नियुक्त करत। पर मोशक नियम कानुनसे पाछे अइना कसम परमेश्वरके छावाहे प्रधान पुजारी नियुक्त करल रहे। और ऊ सदादिनके लग सिद्ध प्रधान पुजारी हुइल बताँ।