लावा करारके प्रधान पुजारी
1 आब हमार कहे खोज्लक बात भर यहे हो: हमार फेन असिन प्रधान पुजारी बताँ, जे स्वर्गमे महान परमेश्वरके सिंहासनके दाहिन ओहोँर उच्च आदरके ठाउँमे बैठल बताँ। 2 हमार प्रधान पुजारी स्वर्गमे रहल महापवित्र तम्बूमे सेवा करथाँ। उ तम्बू मनै नै होके परमेश्वर बनैलाँ।
3 हरेक प्रधान पुजारी पाप क्षमक भेटी और बलिदान चह्राइक लग नियुक्त हुइल रथाँ। तबेकमारे, हमार प्रधान पुजारी ख्रीष्टहे फेन पाप क्षमक लग कुछु चिज चह्रैना जरुरी बतिन। 4 यदि येशू यी संसारमे पलिरताँ कलेसे ऊ पुजारी नै रना रहिँत। काकरेकी मोशक नियम कानुन अनुसार भेटी चह्रुइया पुजारीनके ते पलिबताँ। 5 ओइन्के पुजारीनके रुपमे करना यी काम स्वर्गमे रहल सच्चा कामके नक्कल और छाहीँ किल हुइतिन। पर स्वर्गमे रहले हस नै हो। काकरेकी जब मोशा पवित्र तम्बू बनाइतेहे। तब परमेश्वर मोशाहे चेतावनी देहल रहिँत, "पहाड़मे तुहिहे देखादेलक ढाँचा अनुसार तैँ सक्कु चिज ठिक्केपर बनाइक लग पक्का हुइस।" 6 पर ख्रीष्ट येशू, जे हमार प्रधान पुजारी हुइँत। हुँकिन्हे दोसुर पुजारीनहे देहल कामसे धेउर भारी काम देगिल रहिन। काकरेकी येशू जोन करारके मध्यस्थता कर्ले बताँ। उ करार पुरान करारसे फेन धेउर मजा बा। और उ मजा बातके वाचामे आधारित बा।
7 काकरेकी यदि सुरुक करारमे कुछु गलत नै रहत कलेसे दोस्रा करारके जरुरी नै परना रहे। 8 पर उ मनैनके दोष देखैती परमेश्वर कहतताँ,
"परमप्रभु कहतताँ, उ दिन आई,
जब इजरायल8:8 जब इजरायल दाऊद रज्वक समयक पाछे, इजरायल देशके मनै दुईथो राज्यमे विभाजन होगिलाँ, जेम्नेमेसे एकथो इजरायल और दोसुर यहूदिया कहिजाए। परमेश्वर यहाँ असिके कथाँ कि यी लावा करार मै एक्केथो समूहसे किल नै होके सक्कु मनैनसे बाँधम। यिहिसे यी जनाइत कि यहूदा कुलमेसे अइलक येशू यहूदिया प्रदेशके मनैनके किल नै होके सक्कु मनैनके मुक्तिदाता हुइँत। देशके मनैनके संग और यहूदिया प्रदेशके मनैनके संग
मै एकथो लावा करार बाँधम।
9 यी करार भर ओइन्के पुर्खनके संग मोरिक बाँधल करार हस नै रही।
उ बेला ते मै हाँथ पकरके
ओइन्हे मिश्र देशमेसे निकारल रहुँ।
परमप्रभु कथाँ कि, मै ओइन्के संग बहन्लक करार ओइने पालन नै करलाँ।
तबेकमारे मै ओइन्के वास्ता नै कर्नु।
10 फेनदोस्रे परमप्रभु कहतताँ, कि अइना दिनमे
मै इजरायल देशके मनैनके संग यी करार बाँधम।
मै ओइन्हे मोरिक नियम कानुनके बारेमे सोच्नाहाँ बनैबुँ।
और ओइने उहिहे अपन मनमे धरहीँ।
और मै ओइन्के परमेश्वर होजिम।
और ओइने मोरिक जनता होजिहीँ।
11 ‘परमप्रभुहे चिन्हो’ कहिके आब ओसिके कौनो मनैया
अपन देशके मनैनहे या अपन नाँतपाँतनहे सिखाई परना जरुरी नै पर्हिन।
काकरेकी छुटिसे लेके भारीसम सक्कु जाने मै ओइन्के परमेश्वर हुइतुँ कहिके चिहिन्हीँ।
12 मै ओइन्के पापहे माफ करदेहम,
और ओइन्के पाप कबु याद नै रही।"
13 परमेश्वर यिहिहे लावा करार कले बताँ। तबेकमारे ऊ सुरुक करारहे पुरान बनैलाँ। और जोन करार पुरान होके थोँथ्रे हुइती जाइत, उ झत्तेहेँ गायब होजाई।