1 येशू कलाँ, "जात्तिके, मै तुहुरिन्हे कहतुँ, जे भेँरीनके खोरके दवार सोज भित्तर नै पेलत। पर दोसुर ओहोँरसे भिता टुरके जाइत कलेसे उ चोरवा और डाँका हो। 2 पर भेँरीनके भेँरहुवा दवार सोज भित्तर पैँठत। 3 द्वारपाल ओकर लग दवार खोलदेहत, और भेँरी उहिहे चिहिन्थाँ। और ऊ अपन भेँरीनहे ओइन्के नाउँ कहार-कहार बलाइत और ओइन्हे बाहेर लैजाइत। 4 जब ऊ अपन सक्कु भेँरीनहे निकारके सेकत, तब ऊ ओइन्के आघे-आघे नेगत और भेँरीन ओकर पाछेपाछे जैथाँ। काकरेकी ओइने ओकर बोली चिहिन्थाँ। 5 पर नै चिन्हल मनैयक पाछे ओइने नै लग्थाँ, पर उहिसे दुर भग्थाँ। काकरेकी आनक बोली ओइने नै चिहिन्थाँ।" 6 येशू ओइन्हे यी दृष्टान्त कलाँ। पर ओइन्हे हुँकार कलक बातके मतलब का हो कहिके ओइने नै बुझ्लाँ। 7 तबेकमारे येशू ओइन्हे फेनदोस्रे कलाँ, "जात्तिके, मै तुहुरिन्हे कहतुँ, मै वहे दवार हुइतुँ, जोन सोज भेँरी खोरमे जैथाँ। 8 महिन्से आघे अउइया सक्कु चोर और डाँकन हुइँत। पर मोरिक भेँरी ओइन्के बात नै सुन्लाँ। 9 दवार महिँए हुइतुँ, यदि कौनो मनैया मोर सोज भित्तर जाई कलेसे परमेश्वर उहिहे बँचैहीँ, और ऊ भित्तर-बाहेर अइना-जैना करी और खाइक लग खाना भेटाई। 10 चोरवा ते भेँरीनहे चोराई, मारे और नाश पारे किल आइत। मै ते ओइने जित्ती रहिँत और कबु नै मुइँत कहिके अइनु। 11 मै मजा भेँरहुवा हुइतुँ। मजा भेँरहुवा अपन भेँरीनके लग अपन ज्यान दैदेहत। 12 भेँरी चह्राइक लग भारामे धारगिलक मनैया जब बवाँसाहे आइत देखी ते ऊ भेँरीनहे छोरके भागजाई। काकरेकी ऊ ओइन्के भेँरहुवा नै हो, और भेँरी ओकर नै हुइतिस। तबेकमारे बवाँसा भेँरीनके बगालहे हमला करत, और बगालहे छिदिरबिदिर पारदेहत। 13 ऊ भागत, काकरेकी ऊ भारक मनैया हो, ऊ भेँरीनके कुछु वास्ता नै करत। 14 मै मजा भेँरहुवा हुइतुँ, मै अपन भेँरीनहे चिहिन्थुँ, और मोरिक भेँरी महिन्हे चिहिन्थाँ। 15 जसिके बाबा महिन्हे चिन्हत, ओस्तेके मै बाबाहे चिहिन्थुँ और मै भेँरीनके लग अपन ज्यान देथुँ। 16 मोरिक आकुर भेँरी बताँ, जेने यी खोरके नै हुइँत। ओइन्हे फेन मै नाने परना बा, और ओइने मोरिक बोली सुन्हीँ, और ओइने एक्के बगालके हुइहीँ, और एक्केथो भेँरहुवा रही। 17 बाबा महिन्हे यहे कारण प्रेम करत, काकरेकी मै अपन ज्यान फेनदोस्रे फिर्ता लेना हेतुसे अर्पण करथुँ। 18 केऊ महिन्से मोरिक ज्यान लेहे नै सेकी, पर मै अपन इच्छासे अपन ज्यान देथुँ। अपन ज्यान देना अधिकार मोरिक थेन बा और फेनदोस्रे लेना अधिकार फेन मोरिक थेन बा। काकरेकी यी वहे आज्ञा हो जोन मै मोरिक बाबक थेनसे भेटाइल बतुँ।" 19 यी वचनके कारण यहूदी दलके नेतनमे फेनदोस्रे मतभेद होगिलिन। 20 ओइन्मेसे बहुत जाने कहिँत, "यिहिहे भूत्वा लागल बतिस, और यी बौरागिल बा। तुहुरे यकर बात ना सुनो।" 21 दोसुर जाने कहिँत, "भूत्वा लागल मनैयक बात असिन नै रहत। का भूत्वा आँधर मनैयक आँखी खोले सेकत?"

22 यरुशलेम शहरमे मन्दिर समर्पणके तिहुवार रहे। 23 यी जारछेँकके समय रहे। येशू मन्दिरके भित्तर सुलेमानके मन्दिरके बरन्दामे नेङघुम करतिहिँत। 24 यहूदी दलके नेतन हुँकार चारु ओहोँर जमा होके पुँछ्लाँ, "अप्नि हम्रिहिन्हे महा नम्मा समयसे दोधारमे धर्ले बती। आब हम्रिहिन्हे फरछ्वारसे बतादी। का अप्नि ख्रीष्ट हुइती?" 25 येशू ओइन्हे जवाफ देलाँ, "मै तुहुरिन्हे कहिसेकल बतुँ, पर तुहुरे विश्वास नै करथो। मोरिक बाबक अधिकारसे अचम्मक काम मै करथुँ, ओइनेहेँ मोरिक गवाही देथाँ। 26 पर तुहुरे विश्वास नै करथो, काकरेकी तुहुरे मोरिक भेँरीन मनिक नै हुइतो। 27 जसिके भेँरी अपन अस्ली भेँरहुवक बोली चिहिन्थाँ, ओस्तेके मोरिक मनै मोरिक बातमे ध्यान देथाँ। मै ओइन्हे चिहिन्थुँ, और ओइने मोरिक चेला बनगिल बताँ। 28 ओइन्हे मै सदाकालके जीवन देथुँ, और ओइने कबु नाश नै हुइहीँ, और केऊ फेन ओइन्हे महिन्से छिनके नै लैजाई। 29 मोरिक बाबा मोरिक भेँरी महिन्हे देले बा; ऊ सक्कुहुनसे महान बा। ओइन्हे बाबासे केऊ फेन छिनके नै लैजाई। 30 बाबा और मै एक्के हुइती।" 31 यहूदी दलके नेतन येशूहे मारक लग फेनदोस्रे पठरा उठैलाँ। 32 येशू ओइन्हे कलाँ, "मै तुहुरिन्हे मोरिक बाबक संग एकतामे रहिके बहुत मजा काम देखैनु, ओइन्मेसे कोन कामके लग तुहुरे महिन्हे पठरालेके मारे चहथो?" 33 यहूदी दलके नेतन येशूहे जवाफ देलाँ, "मजा कामके लग हम्रे तुहिन्हे पठरालेके नै मारथुइति, पर परमेश्वरके निन्दा कर्लक कारणसे। काकरेकी तुँ मनैया होके फेन अपनहे परमेश्वर हुइतुँ कहिके दाबी कर्थो।" 34 येशू ओइन्हे जवाफ देलाँ, "का तुहुरिन्के मोशक नियम कानुनमे असिके नै लिखल हो, ‘मै कनु, तुहुरे देउँता हुइतो?’ 35,36 और तुहुरे जन्थो कि पवित्र शास्त्रहे बद्ले नै सेकजाइत। तबेकमारे यदि परमेश्वरके अगुवनहे देउँता कहिगिल कलेसे जब मै असिक कनु, ‘मै परमेश्वरके छावा हुइतुँ।’ तब तुहुरे महिन्हे काकरे कहतो, कि ‘तुँ परमेश्वरके निन्दा करतो।’ मै वहे हुइतुँ, जिहिहे बाबा अल्गाइल, और संसारमे पठाइल बा। 37 यदि मै मोरिक बाबक काम करल नै हुइतुँ कलेसे मोरिकमे विश्वास ना करो। 38 पर यदि मै बाबक काम करथुँ, तभुन फेन तुहुरे मोरिक उप्पर विश्वास नै करथो कलेसे यी कामके उप्पर विश्वास करो। और तुहुरे जन्बो और बुझ्बो, कि बाबा मोरिक संग एकतामे बा, और मै बाबक संग एकतामे बतुँ।" 39 ओइने फेनदोस्रे येशूहे पक्रे खोज्लाँ, पर ऊ ओइन्से दूर चलगिलाँ। 40 तब् येशू फेनदोस्रे यर्दन लदियक उपार उ ठाउँमे गैलाँ, जहाँ यूहन्ना आघे डुब्कि देहे, ऊ वहैँ रलाँ। 41 बहुत्ते मनै येशूक थेन आई लग्लाँ, और ओइने कलाँ, "यूहन्ना कौनो चमत्कार नै करल, पर यूहन्ना हिँकार बारेमे ज्या-जतरा कहल रहे, उ सँच रहे।" 42 तब् वहाँ बहुत जाने येशूक उप्पर विश्वास करलाँ।