1 लाजरस नाउँक एकथो मनैया बेमार हुइल रहे। ऊ मरियम और ओकर दिदी मार्थक गाउँ बेथानिया गाउँक रहे। 2 यी वहे मरियम हो, जे पाछे प्रभुक गोरामे बहुमूल्य महँकना तेल लगाइल रहे। यक्रेहे भैया लाजरस बेमार रहे। 3 यी दुईजाने दिदीन मार्था और मरियम येशूक थेन असिक कहिके समाचार पठैलाँ, "प्रभु, जिहिहे अप्नि माया कर्थी, उ बेमार बा।" 4 पर यी सुनके येशू कलाँ, "यी बेमार मृत्युमे नै पुगाई, पर यी परमेश्वरके महिमक लग हो, ताकि यिहिसे मै, परमेश्वरके छावक महिमा होए।" 5 येशू मार्थाहे, ओकर बाबुहे और लाजरसहे माया करिँत्। 6 तभुन फेन लाजरस बेमार बा कना सुनके येशू जहाँ रहिँत, आकुर दुई दिन वहैँ बैठ्लाँ। 7 दुई दिन पाछे येशू अपन चेलनहे कलाँ, "लेऊ, आब हम्रे फेनदोस्रे घुमके यहूदिया प्रदेशमे जाई।" 8 चेलनके येशूहे कलाँ, "गुरुजी, भर्खरे यहूदी दलके नेतन अप्निहे पठरालेके मारे खोजल रहिँत, और का तभुन फेन अप्नि वहाँ जैबी?" 9 येशू जवाफ देलाँ, "का दिनमे बाह्र घण्टा नै रहत? दिनके घुमफिर करुइयाहे ठेस नै लागत, काकरेकी ओइने यी संसारके ओजरार देख्थाँ। 10 पर रातके नेङघुम करुइयाहे ठेस लागत, काकरेकी उ मनैयकमे ओजरार नै रहत।" 11 ओकरपाछे येशू ओइन्हे कलाँ, "हमार संघरिया लाजरस निदाइल बताँ, पर मै हुँकिन्हे निंदेमेसे जगाई वहाँ जैम।" 12 चेलनके येशूहे कलाँ, "प्रभु, ऊ निदाइल बताँ कलेसे चोखाजिहीँ।" 13 येशू ओकर मृत्युक बारेमे कले रहिँत, पर ओइने स्वाभाविक निंदके बारेमे कलाँ कहिके सोच्लाँ। 14 तब येशू ओइन्हे फरछ्वारसे कहिदेलाँ, "लाजरस मुअल बताँ। 15 और मै खुशी बतुँ कि मै वहाँ नै रहुँ। पर मै तुहुरिन्के लग खुशी बतुँ कि तुहुरे मोरिकमे विश्वास करलो। चोलो, आब हम्रे हुँकार थेन जाई।" 16 तब् दिदुमस कना थोमा अपन संघरिया-चेलनहे कहल, "चोलो, हम्रे फेन जाई और हुँकारे संग मुई।"

17 जब येशू बेथानिया गाउँमे पुग्लाँ, तब् येशूहे पता चल्लिन कि लाजरसहे दफ्नैलक चार दिन होगिल बतिस। 18 बेथानिया गाउँ यरुशलेम शहरसे लग्गेहेँ लगभग तीन किलोमिटरके दूरीमे रहे। 19 बहुत्ते यहूदी मनै मार्था और मरियमके थेन ओइन्के भैयक बारेमे ओइन्हे सान्त्वना देहे आइल रहिँत। 20 येशू आइतताँ कना सुनके मार्था गैल, और हुँकिन्से भेँटा करल। पर मरियम घरेम बैठल रहल। 21 तब् मार्था येशूहे कहल, "हे प्रभु, अप्निहे यहाँ रहे परना रहे; तब मोरिक भैया नै मुना रहे। 22 पर अभिन फेन मै जानतुँ, अप्नि परमेश्वरसे ज्या मंग्बी, परमेश्वर अप्निहे दिहीँ।" 23 येशू उहिहे कलाँ, "तोहाँर भैया फेनदोस्रे जिजाई।" 24 मार्था येशूहे कहल, "मै जानतुँ, कि उ न्यायक दिनमे फेनदोस्रे जित्ती होके उठ्जाई।" 25 येशू उहिहे कलाँ, "मै वहे हुइतुँ, जे मुअल मनैनहे फेनदोस्रे सदाकालके जीवन देहत। जे-जे महिन्हे विश्वास करथाँ, उ सक्कु जाने मुगिलेसे फेन ओइने फेनदोस्रे जित्ति होजिहीँ। 26 जेने मोरिकमे जिथाँ, और मोरिकमे विश्वास करथाँ, ओइने कबु नै मुहीँ। का तुँ विश्वास करथो?" 27 मार्था येशूहे कहल, "हाँ प्रभु, मै विश्वास करथुँ, अप्नि संसारमे अउइया ख्रीष्ट, परमेश्वरके छावा हुइती।" 28 अतरा कहिके मार्था चलगिलस, और अपन बाबु मरियमहे बलाके चुप्पेसे कहल, "गुरुजी, आपुग्लाँ और तुहिहे बलाइतताँ।" 29 यी सुनके मरियम झत्ते उठ्के येशूक थेन गैल। 30 तबसम येशू गाउँमे नै पुगल रहिँत, पर येशू वहे ठाउँमे पलि रहिँत जहाँ मार्था हुँकिन्से भेँटा करल रहे। 31 तब उ यहूदी मनै जेने मरियमके संग घरेम रहिँत, और जेने उहिहे सान्त्वना देहतिहिँत, ओइने मरियमहे झत्ते उठ्के घरेमसे बाहेर जाइत देख्लाँ। तबेकमारे ऊ रुइक लग चिहानमे जाइता कना सोँचके ओइने ओकर पाछेपाछे गैलाँ। 32 जब मरियम येशूक रहल ठाउँमे आइल और हुँकिन्हे देखल, तब् असिक कती हुँकार गोरामे परल, "हे प्रभु, अप्नि यहाँ रति कलेसे मोरिक भैया नै मुना रहे।" 33 जब येशू उहिहे रुइत, और ओइन्के थेन अइलक यहूदिनहे फेन रुइत देख्लाँ, ते येशू महा दुखि होगिलाँ। 34 और येशू ओइन्हे पुँछ्लाँ, "तुहुरे उहिन्हे कहाँ दफ्नाइल बतो?" ओइने येशूहे कलाँ, "प्रभु, आके हेरी।" 35 येशू रुइलाँ। 36 तबेकमारे यहूदी मनै कलाँ, "हेरो, येशू उहिहे कतरा माया करिँत्।" 37 पर केऊ-केऊ कहल, "आँधर मनैयाहे देख्नाहाँ बनुइया यी, यी मनैयाहे फेन मुनासे बँचाई सेकदरताँ।" 38 तब् येशू फेनदोस्रे महा दुखि होके चिहानमे गैलाँ। उ चिहान एकथो गुफामे रहे। ओकर मोह्कर एकथो पठरालेके छोपल रहिस्। 39 येशू कलाँ, "पठराहे हटाऊ।" मुअल मनैयक दिदी मार्था हुँकिन्हे कहल, "हे प्रभु, अबसम ते ऊ गन्धाई लागल हुई, काकरेकी ओकर मुलक चार दिन होगिल बा।" 40 येशू उहिहे कलाँ, "का मै तुहिन्हे नै कनु, ‘तुँ विश्वास करबो कलेसे परमेश्वरके महिमा देख्बो?’" 41 ओइने पठराहे हटैलाँ। तब् येशू उप्पर हेरके कलाँ, "हे बाबा, मै तुहिहे धन्यवाद देहतुँ, काकरेकी तैँ मोरिक बिन्ती सुन्ले। 42 मै जानतुहुँ, कि तैँ मोरिक प्राथना रोज सुन्थे। पर यहाँ ठरह्याइल भीड़के कारण मै जोरसे कनु, ताकि तैँ महिन्हे पठैले कहिके ओइने विश्वास करिँत्।" 43 तबजाके यी बात कहिके सेकके येशू गोहरैलाँ, "लाजरस, बाहेर निकरके आजाऊ।" 44 उ मुअल मनैया ओकर हाँथ-गोरा पट्टीलेके बाँधले और अनुहार लुग्गालेके बेँह्रले बाहेर निकरके आगिल। येशू ओइन्हे कलाँ, "चिहान मनिक लुग्गा खोलदेऊ और उहिहे जाईदेऊ।"

45 मरियमहे भेँटा करे आइल बहुत यहूदी मनै येशूक करल काम देख्के हुँकारमे विश्वास करलाँ। 46 पर ओइन्मेसे केऊ भर फरिसीनके थेन गैलाँ, और येशूक करल काम बतादेलाँ। 47 तब् मुख्य पुजारीनके और फरिसीनके महासभक सदस्यनहे बलैलाँ, और ओइन्हे कलाँ, "आब हम्रे का करी? काकरेकी यी मनैया ते बहुत्ते चमत्कारके काम करता। 48 यदि हम्रे यिहिहे अस्तेके कर्ती रहेदेबी कलेसे सक्कु जाने यिहिहे ख्रीष्टके रुपमे विश्वास करहीँ, और रोमीनके आके हमार मन्दिर और हमार यहूदी जाति दुन्हुनहे नाश पारदिहीँ।" 49 पर सभक सदस्यनमेसे एकथो कैयाफा कना मनैया, जे उ सालके यहूदी प्रधान पुजारी रहे। ऊ ओइन्हे कहल, "तुहुरे कुछु फेन नै जन्थो! 50 हमार सक्कु मनै नाश हुइलसे बेन जनतनके लग एकथो मनैया मुनामे तुहुरिन्के भलाई बा कहिके तुहुरे नै जन्थो।" 51 यी उ अपने तरफसे नै कहल, पर उ सालके यहूदी प्रधान पुजारीक रुपमे ऊ यी अगमवाणी करल, कि येशूहे इजरायल देशके मनैनके लग मुए परहिन। 52 पर ओइन्के लग किल नै होके। उ परमेश्वरके दोसुर सन्तानहुँक्रिहिन्के लग फेन मुहीँ, जेने यी संसारमे छिट्कल बताँ, ताकि ओइन्हे एक्के ठाउँमे जमा करे सेकजाए। 53 तबेकमारे वहे दिनसे यहूदी दलके नेतन येशूहे मरना मन बनालेलाँ। 54 तबेकमारे येशू यी षड़यन्त्रक कारण यहूदिनके बिच्चेम खुल्लमखुल्ला नेङघुम नै करलाँ। पर वहाँसे उजाड़-ठाउँक लग्गे रहल एफ्राइम कना नगरमे गैलाँ, और वहाँ चेलनके संग बैठ्लाँ। 55 यहूदिनके निस्तार-तिहुवार लग्गेहेँ रहिन। और गाउँ-गाउँमेसे बहुत्ते मनै अपन धार्मिक चलन अनुसार अपनहे शुद्ध पारक लग निस्तार तिहुवार सुरु हुइनासे आघे यरुशलेम शहरमे गैलाँ। 56 तब् ओइने येशूहे खोज्लाँ, और ओइने मन्दिरमे ठरह्याइलमे आपसमे कहे लग्लाँ, "तुहुरिन्हे कसिन लागता, का ऊ तिहुवारमे अइहीँ?" 57 मुख्य पुजारीनके और फरिसीनके भर येशूहे गिरफ्तार करक लग ऊ कहाँ बताँ कहिके केऊ पता पाई कलेसे बतैहो कहिके अह्राइल रहिँत।