1 येशू कलाँ, "सच्चा अंगुरके बोँट मै हुइतुँ, और मोरिक बाबा किसान हो। 2 मोरिकमे जोँटल प्रत्येक दहियाँ जे फारा नै फराइत उहिहे ऊ काटदेहत। और फारा फरुइया हरेक दहियाँहे आकुर धेउर फारा फरे कहिके उहिहे फाँरत। 3 मै तुहुरिन्हे सिखाइल शिक्षासे तुहुरे आग्गिहीँ शुद्ध होसेकल बतो। 4 यदि तुहुरे मोरिक संग एकतामे पलिरबो कलेसे मै फेन तुहुरिन्के संग एकतामे पलिरहम। जसिके दहियाँ अंगुरके बोँटमे नै रही कलेसे उ अप्निहीँ फारा फराई नै सेकी। ओस्तेके तुहुरे मोरिक संग एकतामे नै रबो कलेसे तुहुरे फेन कुछु करे नै सेक्बो। 5 अंगुरके बोँट मै हुइतुँ, तुहुरे भर दहियाँ हुइतो। यदि केऊ मोरिक संग एकतामे रही, और मै ओकर संग एकतामे रहम कलेसे, उ बहुत्ते फारा फराई। काकरेकी मोरिक थेनसे अल्गे रहिके तुहुरे कुछु करे नै सेक्बो। 6 यदि केऊ मोरिक संग एकतामे नै रही कलेसे, उहिहे दहियँक हस काटके फेँकाजाइत। और जब दहियाँ सुकजाइत, तब ओइन्हे कुरह्याके आगीमे जरादेजाइत। 7 यदि तुहुरे मोरिक संग एकतामे पलिरबो, और मोरिक शिक्षा तुहुरिन्के संग एकतामे पलिरही कलेसे, तुहुरिन्हे ज्या मन लागी वहे माँगो, और मै तुहुरिन्के लग पूरा करदेहम। 8 तुहुरे बहुत्ते फारा फराके मोरिक चेला हुइतो कना साबित करबो कलेसे यिहिएसे मोरिक बाबक महिमा हुइत। 9 जसिके बाबा महिन्हे प्रेम कर्ले बा, ओस्तेहेँके मै फेन तुहुरिन्हे प्रेम कर्नु। तुहुरे मोरिक प्रेमके संग एकतामे पलिरहहो। 10 यदि मोरिक आज्ञनहे पालन करबो कलेसे तुहुरे मोरिक प्रेमके संग एकतामे पलिरबो। जसिके मै अपन बाबक आज्ञनहे पालन करल बतुँ, और ओकर प्रेमके संग एकतामे पलिरथुँ। 11 मै यी बात तुहुरिन्हे यी कारणसे कनु ताकि तुहुरिन्केमे फेन वहे आनन्द रहे, जोन मोरिकमे बा, और तुहुरे पूरा रुपमे आनन्दित होजाऊ।"

12 येशू कलाँ, "मोरिक आज्ञा यहे हो, कि जसिके मै तुहुरिन्हे प्रेम कर्नु, तुहुरे फेन एकदोसर जहनहे ओस्तेहेँके प्रेम करो। 13 केक्रो थेन यी देखाइक लग कि उ अपन संघरियनहे प्रेम करत, यिहिसे भारी आकुर कौनो तरिका नै हो कि ऊ ओइन्हे बँचाइक लग अपन ज्यान दैदेहे। 14 यदि तुहुरे मोरिक आज्ञा मन्थो कलेसे तुहुरे मोरिक संघरिया हुइतो। 15 आबसे मै तुहुरिन्हे नोकर नै कहम, काकरेकी नोकर नै जानत कि ओकर मलिक्वा का करत। पर मै तुहुरिन्हे संघरिया कहल बतुँ। काकरेकी जोन बात मै मोरिक बाबक थेनसे सुन्नु, मै उ सक्कु खुशीक खबर तुहुरिन्हे जनादेहल बतुँ। 16 महिन्हे तुहुरे नै रोज्लो, पर मै तुहुरिन्हे रोज्नु और तुहुरिन्हे नियुक्त कर्नु। ताकि तुहुरे जाऊ और फारा फराऊ, और तुहुरिन्के फारा टिकल पलिरहे। ताकि तुहुरे मोरिक नाउँमे बाबासे ज्या मंग्बो, ऊ तुहुरिन्हे दैदेहे। 17 मोरिक आज्ञा यहे हो कि तुहुरे एकदोसर जहनहे प्रेम करो।"

18 येशू कलाँ, "यदि संसारके मनै तुहुरिन्हे घृणा करथाँ कलेसे, तुहुरे जानलेहो कि तुहुरिन्हे घृणा करनासे आघे ओइने महिन्हे घृणा करलाँ। 19 यदि तुहुरे यी संसारके मनैनके हस रतो कलेसे संसारके मनै तुहुरिन्हे अपने मनै मानके प्रेम करताँ। पर तुहुरिन्के यी संसारसे कौनो सम्बन्ध नै हो। मै तुहुरिन्हे संसारमेसे चुनलेले बतुँ, तबेकमारे संसारके मनै तुहुरिन्हे घृणा करथाँ। 20 ‘नोकर घरक मलिक्वासे भारी नै रहत।’ कहिके जोन बात मै तुहुरिन्हे बताइल बतुँ, उहिहे तुहुरे सम्झले रहहो। यदि ओइने महिन्हे सतैलाँ कलेसे तुहुरिन्हे फेन सतैहीँ। यदि ओइने मोरिक शिक्षा पालन करलाँ कलेसे तुहुरिन्के शिक्षा फेन ओइने पालन करहीँ। 21 पर उ मनै तुहुरे मोरिक चेला हुइलक कारण तुहुरिन्हे यी सक्कु बात करहीँ। काकरेकी ओइने महिन्हे पठुइया परमेश्वरहे नै चिहिन्थाँ। 22 यदि मै नै अइतुँ कलेसे और ओइन्हे नै बतैतुँ कलेसे ओइने पापके दोषी नै हुइताँ। पर आब ते अपन पापहे नुकाइक लग ओइन्के थेन कुछु बहाना नै हुइतिन। 23 जे महिन्हे घृणा करत, उ मोरिक बाबाहे फेन घृणा करत। 24 यदि मै ओइन्के बिच्चेम उ चमत्कार नै कर्तुँ, जोन चमत्कार कौनो दोसुर मनैया नै करल हो कलेसे ओइने पापके दोषी नै हुइताँ। पर आब ओइने महिन्हे और मोरिक कर्लक चमत्कारहे देख्लेले बताँ। तभुन फेन ओइने महिन्हे और मोरिक बाबा दुनु जहनहे घृणा कर्ले बताँ। 25 और यी उहिहे पूरा करत, जोन ओइन्के मोशक नियम कानुनमे लिखल बतिन। ओम्ने असिके लिखल बा, ‘ओइने महिन्हे विनाकारण घृणा करलाँ।’ 26 मै परमेश्वरके ओहोँरसे तुहुरिन्के लग एकथो सहायक पठैम। यी उ आत्मा हो, जोन परमेश्वरके ओहोँरसे आइत, और सच्चाइहे देखाइत। जब ऊ आई, तब ऊ तुहुरिन्हे मोरिक बारेमे बताई। 27 और तुहुरे संसारहे मोरिक बारेमे बतैबो, काकरेकी तुहुरे सुरुएसे मोरिक संग बतो।"