1 येशू कलाँ, "तुहुरिन्के विश्वास ना घटे कहिके मै यी बात कनु। 2 ओइने तुहुरिन्हे बैठक भवनमेसे निकारदिहीँ। और उ समय आइता, जब तुहुरिन्हे हत्या करुइया परमेश्वरके सेवा करतुँ कहिके सोँची। 3 ओइने असिके यहे कारणसे करहीँ, काकरेकी ओइने ना ते बाबाहे चिन्हल हुइँत और ना महिन्हे चिहिन्थाँ। 4 पर यी बात मै तुहुरिन्हे यहे कारणसे कनु, कि जब यी पूरा हुइना समय आई, तब् तुहुरिन्हे याद आजाई कि यी सक्कु बात मै तुहुरिन्हे पैलेहेँ कहिदेले रहुँ। जबसे तुहुरे सुरुमे मोरिक चेला बनल रहो, तबसे लेके आजसम मै तुहुरिन्हे यी बात यहे कारणसे नै कनु, काकरेकी मै तुहुरिनेके संग रहुँ।"

5 येशू कलाँ, "आब मै महिन्हे पठुइयक थेन जाइतुँ। पर ‘अप्नि कहाँ जाइती?’ कहिके तुहुरिन्मेसे महिन्हे केऊ फेन नै पुँछ्थो। 6 पर मै तुहुरिन्हे यी बात कले बतुँ, यहे कारणसे तुहुरे महा उदास बतो। 7 तभुन फेन मै तुहुरिन्हे सच्चा बात बत्वाइतुँ, मोरिक जैना तुहुरिन्के लग मजा हुई। काकरेकी मै नै गैनु कलेसे, उ सहायक तुहुरिन्के थेन नै आई। पर यदि मै गैनु कलेसे उहिहे तुहुरिन्के थेन पठादेहम। 8 और जब ऊ आई, तब ऊ संसारके मनैनहे पाप, धार्मिकता और न्यायक बारेमे ओइन्हे देखाई। 9 पापके बारेमे ओइन्हे दोषी देखाई, काकरेकी ओइने मोरिकमे विश्वास करना अस्वीकार करथाँ। 10 धार्मिकतक बारेमे ओइन्हे देखाई, काकरेकी मै बाबक थेन जाइतुँ, और तुहुरे महिन्हे फेनदोस्रे नै देख्बो। 11 और न्यायक बारेमे देखाई, काकरेकी यी संसारके शासक शैतान पैलेहेँ दोषी ठहरागिल बा। 12 मै तुहुरिन्हे आकुर बताई चहथुँ, पर अब्बे तुहुरे उ बात सहे नै सेक्बो। 13 जब उ आत्मा आई, जे परमेश्वरके बारेमे सच्चाइहे देखाइत, तब् ऊ तुहुरिन्हे सक्कु सच्चाइहे बुझाई। काकरेकी ऊ अपन इच्छासे नै बोली। पर ऊ परमेश्वरके थेनसे ज्या सुनी, ऊ वहे बोली और हुई अइना बात तुहुरिन्हे बताई। 14 ऊ मोरिक महिमा करी, काकरेकी उहिहे महिन्से ज्या मिल्हिस, तुहुरिन्हे ऊ वहे बताई। 15 ज्या चिज बाबक हो, उ मोरिक हो। तबेकमारे मै कनु, उहिहे महिन्से ज्या मिल्हिस, तुहुरिन्हे ऊ वहे बताई। 16 थोरचे समय पाछे तुहुरे महिन्हे नै देख्बो, और थोरिक समय पाछे तुहुरे महिन्हे फेनदोस्रे देख्बो।"

17 तब् येशूक कौनो-कौनो चेलनके एकदोसर जहनहे कहे लग्लाँ, "ऊ हम्रिहिन्हे का कहे खोजतताँ? कि ‘थोरचे समय पाछे तुहुरे महिन्हे नै देख्बो, और थोरिक समय पाछे तुहुरे महिन्हे फेनदोस्रे देख्बो,’ और यी फेन कि ‘काकरेकी मै बाबक थेन जाइतुँ।’" 18 तब ओइने कलाँ, "यी ‘थोरिक समय पाछे’ कलक का हो? हम्रे नै जन्थी कि ऊ का कहे खोजतताँ।" 19 येशू यी बात बुझगिलाँ कि ओइने हुँकिन्से यी बातके मतलब पुँछे खोजतताँ। तब ऊ ओइन्हे कलाँ, "का तुहुरे एकदोसुर जहनमे यी बारेमे विचार करतो कि मै तुहुरिन्हे कनु कि थोरचे समय पाछे तुहुरे महिन्हे नै देख्बो, और थोरिक समय पाछे तुहुरे महिन्हे फेनदोस्रे देख्बो? 20 जात्तिके, मै तुहुरिन्हे कहतुँ, मै मुअम ते तुहुरे रुइबो और टोँटा फारफारके रुइबो, पर संसारके मनै आनन्द मनैहीँ। तुहुरे दुखि हुइबो, पर जब मै फेनदोस्रे जित्ती होके फिर्ता हुइम, तब तुहुरिन्के दुःख आनन्दमे बदलजाई। 21 जब जन्नी मनैयक लरका पैना समय अइथिस, तब उहिहे व्यथा लग्थिस। काकरेकी ओकर दुःखके समय आइल रथिस। पर जब ऊ लरका पादारत, तब् संसारमे ओकर अइलक खुशीमे उ अपन दुःखहे बिस्राजाइत। 22 अस्तेके तुहुरिन्हे फेन अभिन ते दुःख बा, पर मै फेनदोस्रे तुहुरिन्के थेन अइम, और तुहुरे आनन्दित हुइबो। तब् केऊ फेन तुहुरिन्के आनन्द तुहुरिन्से छिनके नै लैजाई। 23 उ समय तुहुरे महिन्से कुछु नै पुँछ्बो। जात्तिके मै तुहुरिन्हे कहतुँ, यदि तुहुरे मोरिक चेला हुइलक कारण बाबासे ज्या मंग्बो, कलेसे ऊ तुहुरिन्हे दैदी। 24 अभिनसम तुहुरे मोरिक चेला हुइलक कारण कुछु नै माँगल हुइतो। माँगो, तब् तुहुरे भेटैबो। ताकि तुहुरिन्के आनन्द पूरा होजाए।"

25 येशू कलाँ, "यी बात मै तुहुरिन्हे कहकुटमे कहल बतुँ। पर उ समय आइता, कि जब मै तुहुरिन्हे कहकुटमे नै कहम। पर मै बाबक बारेमे तुहुरिन्हे फरछ्वारसे बतादेहम। 26 उ समय मोरिक चेला हुइलक कारण तुहुरे अप्निहीँ मंग्बो। और तुहुरिन्के माँगल चिजके लग महिन्हे मोरिक बाबासे बिन्ती करदेना जरुरी नै रही। 27 काकरेकी मोरिक बाबा ते अप्निहीँ तुहुरिन्हे माया करत। काकरेकी तुहुरे महिन्हे माया करलतो, और महिन्हे बाबा पठाइल कहिके विश्वास करलतो। 28 महिन्हे बाबा संसारमे पठाइल बा, और आब मै संसारहे छोरके बाबक थेन फिर्ता जाइतुँ।" 29 येशूक चेलनके कलाँ, "हेरी, आब ते अप्नि फरछ्वारसे बोलती, कहकुटमे नै बत्वाइथुइति। 30 आब हम्रे बुझगिल बती कि अप्नि सक्कु बात जन्थी, और आब किहुहे अप्निन्से पुँछे परना जरुरी नै हो। तबेकमारे हम्रे विश्वास कर्थी, कि अप्निन्हे परमेश्वर पठैले बताँ।" 31 येशू ओइन्हे जवाफ देलाँ, "का आब तुहुरे विश्वास करतो? 32 हेरो, उ समय आइता, बेन अइहीगिल बा, जब तुहुरे छिदिरबिदिर होके अपन घरे चलजिबो, और महिन्हे एक्केली छोरदेबो। तभुन फेन मै एक्केली नै हुइतुँ, काकरेकी मोरिक बाबा मोरिक संग बा। 33 मै तुहुरिन्हे यी बात यहे कारणसे कनु, ताकि तुहुरिन्हे शान्ति मिले। काकरेकी तुहुरे मोरिक चेला हुइतो। संसारमे तुहुरिन्हे कर्रा बा। पर साहस करो, काकरेकी मै संसारके शासक शैतानहे जित सेकल बतुँ।"