1 तब् राजपाल पिलातस सिपाहिनहे आदेश देहल कि येशूहे लैजाके कोर्रा लगाऊ। 2 तब् सिपाहिन काँटक मुकुट गुँथके येशूक मुन्टामे घलादेलाँ। और हुँकिन्हे बैजनी रङ्गके लुग्गा घलादेलाँ। 3 तब् ओइने हुँकिन्हे सलाम करना सुरु करदेलाँ, जसिन कि ओइने चिल्लाके हुँकार आदर करतताँ, "यहूदिनके रज्वक जय!" तबजाके ओइने हुँकिन्हे झाँपर लगैलाँ। 4 फेनदोस्रे बाहेर निकरके राजपाल पिलातस ओइन्हे कहल, "हेरो, मै यिहिहे तुहुरिन्के थेन बाहेर नानतुँ, और तुहुरिन्हे जनाई चहथुँ, मै यकरमे कुछु गल्ती नै देख्नु।"

5 तब् काँटक मुकुट और बैजनी रङ्गके लुग्गा घालल येशू बाहेर नानगिलाँ। और राजपाल पिलातस ओइन्हे कहल, "यी मनैयाहे हेरो!" 6 जब मुख्य पुजारीनके और मन्दिरके चौकिदर्वन येशूहे देख्लाँ। तब ओइने चिल्लाके असिक कलाँ, "उहिहे क्रूसमे टाँगो, उहिहे क्रूसमे टाँगो!" राजपाल पिलातस ओइन्हे कहल, "तुहुरेहे यिहिहे लैजाके क्रूसमे टाँगो, काकरेकी मै यकरमे कुछु गल्ती नै देख्नु!" 7 यहूदी दलके नेतन उहिहे जवाफ देलाँ, "हमार एकथो मोशक नियम कानुन बा। और उ मोशक नियम कानुन अनुसार यिहिहे मुहिक पर्हिस। काकरेकी यी अपनहे परमेश्वरके छावा बताइल बा।" 8 यी बात सुनके राजपाल पिलातस महा जोरसे डरागिल। 9 ऊ फेनदोस्रे महलके भित्तर पैँठ्गिल, और येशूहे पुँछल, "तुँ कहाँक हुइतो?" पर येशू उहिहे कुछु जवाफ नै देलाँ। 10 तबेकमारे राजपाल पिलातस हुँकिन्हे कहल, "तुँ महिन्से काकरे नै बोलथुइतो? का तुहिन्हे पता नै हो कि तुहिन्हे छोरे सेक्ना अधिकार मोरिक थेन बा, और तुहिन्हे क्रूसमे टंग्ना अधिकार फेन मोरिक थेन बा।" 11 येशू जवाफ देलाँ, "यदि अप्निहे परमेश्वरके ओहोँरसे नै देगिल रहत कलेसे मोरिकमे अप्निक कुछु अधिकार नै रना रहे। तबेकमारे महिन्हे अप्निक हाँथेम देहुइया आकुर धेउर पापके दोषी बा।" 12 तबेकमारे राजपाल पिलातसके हुँकिन्हे छोरदेना मन रहिस। पर भीड़के मनै चिल्ला चिल्लाके असिक कलाँ, "यदि अप्नि यी मनैयाहे छोरदेबी कलेसे अप्नि महाराजक संघरिया नै हुइती। काकरेकी जे अपनेहे रज्वा हुइतुँ कहिके दाबी करत, ऊ महाराजक दुश्मन हो।" 13 यी बात सुनके राजपाल पिलातस येशूहे बाहेर नानल, और ऊ न्याय करना सिंहासनमे बैठल। उ सिंहासन असिन ठाउँमे बनल रहे, जहाँ चापर-चापर पठरा बिछाइल रहिँत। जिहिहे हिब्रू भाषामे गब्बथा कहिजाइत। 14 उ दिन तयारीक दिन रहे, जोन बिसैँना दिनसे आघेक दिन रहत। और यी वहे समय रहे, जोन हप्तामे निस्तार-तिहुवार मनाजाए। लगभग दुपहरके समय रहे। तब राजपाल पिलातस भीड़के मनैनहे कहल, "हेरो, तुहुरिन्के रज्वाहे!" 15 पर ओइने असिक कहिके चिल्लाई लग्लाँ, "उहिहे मुवादारो, उहिहे मुवादारो, उहिहे क्रूसमे टाँगो!" राजपाल पिलातस ओइन्हे पुँछल, "का मै तुहुरिन्के रज्वाहे क्रूसमे टाँगु?" मुख्य पुजारीनके जवाफ देलाँ, "महाराजा बाहेक हमार दोसुर कौनो रज्वा नै हो।" 16 तब् राजपाल पिलातस येशूहे क्रूसमे टाँगक लग ओइन्के जिम्मा लगादेहल।

17 तब सिपाहिनके येशूहे अपन जिम्मामे लैलेलाँ। ओइने हुँकार क्रूस हुँकिनेहे बोकैलिन। और ओइने हुँकिन्हे यरुशलेम शहरमेसे बाहेर खोप्री कना ठाउँमे लैगिलाँ, जिहिहे हिब्रू भाषामे गलगथा कहिजाइत। 18 वहाँ ओइने येशूक संग दुईथो औरे मनैनहे फेन क्रूसमे टँगैलाँ। एकथोहे एक पाँजर और दोसुरहे दोसुर पाँजर और येशूहे बिच्चेम टँगैलाँ। 19 राजपाल पिलातस एकथो दोष-पत्र फेन लिखल, और क्रूसमे येशूक मुन्टक उप्पर लग्वादेहल। ओम्ने असिके लिखल रहे, "नासरत गाउँक येशू, यहूदिनके रज्वा।" 20 यी दोष-पत्र बहुत्ते यहूदी मनै पहरलाँ। काकरेकी येशूहे क्रूसमे टाँगल ठाउँ यरुशलेम शहरके लग्गेहेँ रहे। यी दोष-पत्र हिब्रू, ल्याटिन और ग्रीक भाषामे लिखल रहे। 21 यहूदिनके मुख्य पुजारीन राजपाल पिलातसहे कलाँ, " ‘यहूदिनके रज्वा’ कहिके ना लिखी। पर ‘यी कहल कि मै यहूदिनके रज्वा हुइतुँ।’ कहिके लिख्दी।" 22 राजपाल पिलातस जवाफ देहल, "मै ज्या लिख्नु, उ नै बदलजाई।" 23 जब सिपाहिनके येशूहे क्रूसमे टंग्लाँ। तब् ओइने हुँकार लुग्गाहे चार बखरा लगैलाँ। और चारु सिपाहिन एक-एकथो बखरा लैलेलाँ। हुँकार कुर्ता फेन लैलेलाँ, जोन लुग्गा एक्केथो रहे, और उ लुग्गा बिना सीनके तरेसे उप्परसम बिनल रहे। 24 तबेकमारे सिपाहिन एकदोसर जहनसे कलाँ, "यी भर नै फारी, पर यी केकर हुई कहिके हम्रे चिट्टा दारी।" पवित्र शास्त्रमे लिखल बात पूरा होए कहिके यी हुइल: "ओइने मोरिक लुग्गा एकदोसर जहनमे बाँटलेलाँ और कुर्ता भर चिट्टा दरलाँ।" 25 तबेकमारे सिपाहिन असिके करलाँ। पर येशूक क्रूसके लग्गे हुँकार दाई, हुँकार दाईक बाबु मरियम जे क्लोपासके जन्नी रहे, और मग्दल गाउँक मरियम ठरह्याइल रहिँत। 26 जब येशू अपन दाईहे और हुँकार प्रेम कर्लक चेलाहे एक्के थेन ठरह्याइल देख्लाँ। तब ऊ अपन दाईहे कलाँ, "हेर दाई, यी तोरिक छावा हो!" 27 तब् उ चेलाहे फेन कलाँ, "हेरो, यी तोहाँर दाई हो!" तब्बेहेँसे उ चेला मरियमहे अपन परिवारके सदस्य बनाइक लग लैगिलस।

28 ओकरपाछे येशू यी जानलेलाँ कि आब ऊ अपन सक्कु काम ओर्वासेकल बताँ। तबेकमारे पवित्र शास्त्रमे लिखल बात सच्चा साबित होए कहिके कलाँ, "महिन्हे प्यास लागल।" 29 वहाँ चुकेलेके भरल एकथो भाँरा धारल रहे। तबेकमारे आमिल जुस भरल स्पन्ज एकथो हिसपके दहियाँमे धारके केऊ हुँकार मुहसम पुगादेहल। 30 जब येशू चुकहे चिख्लाँ, तब ऊ कलाँ, "आब पूरा होगिल।" और कपार लिहुराके ऊ अपन प्राण छोरदेलाँ।

31 आब यी तयारीक दिन रहे, और दोसुर दिन बिँसैना दिन और निस्तार तिहुवार दुनु रहिँत। यी यहूदी मनैनके लग खास दिन रहिन। और यहूदी दलके नेतन नै चाहिँत कि असिन दिनमे लाहाश क्रूसमे पलिरहे। तबेकमारे ओइने राजपाल पिलातसहे कलाँ कि उ मनैनके गोरा टुरवादी ताकि ओइने झत्ते मुजाँइत। और लाहाशहे झत्ते तरे नाने सेकजाए। 32 तबेकमारे सिपाहिन येशूक संग क्रूसमे टँगागिलकमेसे आघे एकथो मनैयक गोरा टुरलाँ, तब दोसुर मनैयक गोरा टुरलाँ। 33 पर जब ओइने येशूक थेन अइलाँ ते ओइने देख्लाँ, कि येशू मुसेकल बताँ। तबेकमारे ओइने हुँकार गोरा नै टुरलाँ। 34 पर एकथो सिपाही हुँकार पस्रीमे भालालेके गोझल, और ओम्नेमेसे जुरतेहेँ खुन और पानी निक्रल। 35 जोन मनैया यी सक्कु देखल, ऊ गवाही देहल बा, ताकि तुहुरे फेन येशूकमे विश्वास करे सेको, और उहिहे पता बतिस कि ऊ सच्चा बोलता। 36 यी बात यहे कारणसे हुइल ताकि पवित्र शास्त्रमे ज्या लिखल बा उ सँच होजाए: "हुँकार कौनो फेन हड्डी नै टुटाजैहिन।" 37 और फेनदोस्रे पवित्र शास्त्रक औरे ठाउँमे असिके लिखल बा, "ओइने हुँकार ओहोँर हेरहीँ, जिहिहे ओइने गोझल बताँ।"

38 ओकरपाछे अरिमाथिया गाउँक योसेफ, जे येशूक चेला रहे। और ऊ यी बातहे यहूदी दलके नेतनके डरकमारे नुकाके धारल रहे। ऊ राजपाल पिलातसहे येशूक मुअल शरीर लैजाई भेटाऊँ कहिके बिन्ती करल। राजपाल पिलातस उहिहे अनुमति दैदेहल। तब् ऊ आके हुँकार मुअल शरीर लैगिलस। 39 तब् निकोदेमस फेन जे पहिले येशूहे भेँटा करे रातके समयमे आइल रहे। ऊ लगभग तेत्तीस किलो मूर्र और एलवा रुख्वामेसे बनागिलक मीठ बास अइना अत्तर नानल। 40 तब ओइने येशूक मुअल शरीरहे लेलाँ, और यहूदिनके दफनैना चलन अनुसार मीठ बास अइना अत्तरके संग सूतिक लुग्गक पट्टीलेके सेहेँरलाँ। 41 जहाँ येशूहे क्रूसमे टँगाइल रहिँत, उ ठाउँक लग्गे एकथो बगिया रहे। उ बगियामे एकथो लावा चिहान रहे। जोन कबु प्रयोग नै हुइल रहे। 42 तबेकमारे ओइने येशूक लाहाशहे वहे चिहानमे धारदेलाँ। काकरेकी उ लग्गेहेँ रहे, और यहूदिनके निस्तार तिहुवारके तयारीक दिन रहिन।