यूहन्ना 20

येशू चेलनके थेन देखा पर्लक

19 वहे अँतवारके दिन संझक, जब यहूदी दलके नेतनके डरकमारे चेलनके दवार बन्द करके कोन्तीमे जमा हुइल रहिँत। तब येशू आके ओइन्के बिच्चेम ठरह्यागिलाँ, और ओइन्हे कलाँ, "तुहुरिन्हे शान्ति होए।" 20 ओइन्हे अभिवादन करके सेकके येशू ओइन्हे अपन हाँथ और पस्री मनिक घाऊ देखैलाँ। तब प्रभुहे देख्के चेलनके गजब खुशी होगिलाँ। 21 तब् येशू ओइन्हे फेनदोस्रे कलाँ, "तुहुरिन्हे शान्ति होए! जसिके बाबा महिन्हे संसारमे पठाइल, ओस्तेके मै फेन तुहुरिन्हे संसारमे पठाइतुँ।" 22 अतरा कहिके येशू ओइन्केमे फुँक्लाँ और कलाँ, "पवित्र आत्मा लेऊ। 23 यदि तुहुरे केक्रो पाप माफ करबो कलेसे ओइन्के पाप माफ होजिहिन, और जेकर पाप तुहुरे माफ नै करबो, ओइन्के पाप माफ नै हुइहिन।"