निकोदेमसहे येशूक शिक्षा
1 वहाँ निकोदेमस नाउँ रहल एकथो मनैया रहे, जे यहूदिनके नेता रहे और ऊ फरिसी दलके रहे। 2 एक दिन निकोदेमस रातके येशूक थेन आके हुँकिन्हे कहल, "गुरुजी, हम्रे जन्थी कि अप्निहे परमेश्वर हम्रिहिन्हे सिखाइक लग पठाइल बताँ। काकरेकी परमेश्वर संगे नै रहिहीँ कलेसे केऊ फेन अप्निक करल यी चमत्कार करे नै सेक्हीँ।" 3 येशू उहिहे जवाफ देलाँ, "जात्तिके मै तुहिन्हे कहतुँ, यदि केऊ लावा होके नै जल्मल कलेसे ऊ परमेश्वरके राजमे जाई नै सेकी।" 4 निकोदेमस हुँकिन्हे पुँछल, "बुह्राइल मनैया फेनदोस्रे कसिके जलम लेहे सेकी? का ऊ फेनदोस्रे अपन दाईक पेटेमेसे जलम लेहे सेकी?" 5 येशू उहिहे जवाफ देलाँ, "जात्तिके मै तुहिन्हे कहतुँ, जबसम कौनो मनैया पानी और आत्मासे नै जल्मी3:5 पानी और आत्मासे नै जल्मी इजकिएल 36:25-27 के अनुसार परमेश्वर इजरायलके मनैनहे आत्मामे लावा हुइनक बारेमे पानी और आत्मा दुनु शब्दक प्रयोग कर्ले बताँ कहिके निकोदेमस बुझे कहिके येशू चाहतिहिँत।, तबसम ऊ परमेश्वरके राजमे जाई नै सेकी। 6 मनै अपन लर्कनहे जीवन देथाँ, पर मनैनहे लावा जीवन पवित्र आत्मासे किल मिलत। 7 मै तुहिन्हे फेनदोस्रे जल्मे परत कनु ते अचम्म जिन मानो। 8 बयालहे जेहोँर मन लग्थिस, ओहोँरे बहत। तुँ बयालके आवाज सुन्थो, पर तुँ नै जन्थो कि उ कहाँसे आइत, और कहाँ जाइत। पवित्रआत्मामेसे जल्मल हरेक मनैया फेन ओस्तेहेँ रहत।"