यूहन्ना 9:18-23

18 देख्नाहाँ हुइलक उ मनैयक दाईबाबाहे नै पुँछतसम यहूदी दलके नेतन ऊ आँधर रहे, और देख्नाहाँ होगिलस कहिके विश्वास नै करलाँ। 19 तब् ओइने ओकर दाईबाबाहे पुँछ्लाँ, "का यी तुहुरिन्के छावा हो, जे आँधर जल्मल रहे कहिके तुहुरे कहतो? ते आब कसिके ऊ देख्नाहाँ होगिल?" 20 ओकर दाईबाबा ओइन्हे कलाँ, "हम्रे जन्थी यी हमार छावा हो, और आँधर जल्मल रहे। 21 पर आब यी कसिके देख्नाहाँ होगिल कहिके हम्रे नै जन्थी, या यिहिहे के देख्नाहाँ बनादेलिस कहिके फेन हम्रे नै जन्थी। यकर अक्किल आगिल बतिस, ज्या पुँछ्ना बा यिहिएसे पुँछो। अपन बारेमे ऊ अप्निहीँ बताई।" 22 ओकर दाई-बाबा यहूदी दलके नेतनसे डराँइत। तबेकमारे ओइने असिके कलाँ। काकरेकी केऊ येशूहे ख्रीष्ट हो कहिके स्वीकार करी कलेसे, उहिहे बैठक भवनमेसे निकारे परी कहिके यहूदी दलके नेतन आग्गिहीँ सहमत होगिल रहिँत। 23 तबेकमारे ओकर दाईबाबा कलाँ, "यकर थेन फेन ओकर जवाफ देना अक्किल बतिस, यिहिएसे पुँछो।"